Məlum olduğu kimim ötən gün ali məktəblərə ixtisas seçim təsdiqi başa çatdı. Statistikadan məlum olur ki, I ixtisas qrupu RK alt qrupu üzrə 12955 plan yeri uğrunda 11819, Rİ alt qrupunda isə 7430 plan yeri uğrunda 6848 abituriyent mübarizə aparır. Ümumilikdə 20385 plan yerinə qarşı 23918 abituriyent və subbakalavr elektron ixtisas seçimini təsdiq edib. Bu isə o deməkdir ki, I ixtisas qrupu üzrə faktiki olaraq 3533 nəfər abituriyent və subbakalavr müsabiqədən keçə bilməyəcək, yəni kəsiləcək.
II ixtisas qrupu üzrə 14935 plan yeri uğrunda 12702 abituriyent mübarizə aparır. 19039 abituriyent və subbakalavr elektron ixtisas seçimini təsdiq edib. Bu isə o deməkdir ki, II ixtisas qrupu üzrə faktiki olaraq 4104 nəfər abituriyent və subbakalavr müsabiqədən keçə bilməyəcək, yəni kəsiləcək.
III ixtisas qrupu DT alt qrupu üzrə 13558 plan yeri uğrunda 24087, TC alt qrupunda isə 2025 plan yeri uğrunda 7620 abituriyent mübarizə aparır. Ümumilikdə 15583 plan yerinə qarşı 24414 abituriyent və subbakalavr elektron ixtisas seçimini təsdiq edib. Bu isə o deməkdir ki, III ixtisas qrupu üzrə faktiki olaraq 8831 nəfər abituriyent və subbakalavr müsabiqədən keçə bilməyəcək, yəni kəsiləcək.
IV ixtisas qrupu üzrə 4732 plan yeri uğrunda 5420 abituriyent mübarizə aparır. 6966 abituriyent və subbakalavr elektron ixtisas seçimini təsdiq edib. Bu isə o deməkdir ki, IV ixtisas qrupu üzrə faktiki olaraq 2234 nəfər abituriyent və subbakalavr müsabiqədən keçə bilməyəcək, yəni kəsiləcək.
V ixtisas qrupu üzrə 4704 plan yeri uğrunda 16502-dən çox abituriyent mübarizə aparır. 16517 abituriyent və subbakalavr elektron ixtisas seçimini təsdiq edib. Bu isə o deməkdir ki, V ixtisas qrupu üzrə faktiki olaraq 11813 nəfər abituriyent və subbakalavr müsabiqədən keçə bilməyəcək, yəni kəsiləcək.
Ümumilikdə götürəndə, təxminən 30 515 abituriyent subbakalavr müsabiqəsindən kəsiləcək.
Bəs bu qədər abituriyentin müsabiqədən kənar qalmasının səbəb nədir – abituriyent sayının artması, imtahanların çətinliyi, yoxsa plan yerlərinin azlığı?
Təhsil eksperti Elçin Əfəndi Musavat.com-a açıqlamasında bildirib ki, bu il abituriyentlərin sayı ötən illərlə müqayisədə əhəmiyyətli dərəcədə artıb. Ümumilikdə ali və orta ixtisas təhsili üzrə müraciət edən abituriyentlərin sayı 131 mini ötüb:
“Ötən illərlə müqayisədə həm plan yerləri artıb, həm də dövlət sifarişli yerlərin sayı yüksəlib. Bu il ali təhsil müəssisələrinə təxminən 62 min plan yeri nəzərdə tutulub. Dövlət sifarişi üzrə isə 28 mindən çox pulsuz plan yeri ayrılıb, sosial cəhətdən həssas qrupları nəzərə alsaq, bu rəqəm 30-32 min nəfər ətrafında olur.
Lakin hələ müsabiqəyə qədər qruplar üzrə 20-25 min abituriyent 150 bala qədər nəticə əldə edə bilməyib. Faktiki plan yerləri üzrə nəzər saldıqda isə 30 min nəfərdən çox abituriyent mövcud plan yerlərindən kənarda qalacaq. Düzgün ixtisas seçimini etməyənləri də nəzərə alsaq, 32-33 min nəfər birinci turda müsabiqədən kənarda qalacaq. Ümumilikdə isə, 60 min abituriyentin ali təhsildən kənarda qalması proqnozlaşdırılır”.
Ekspert həmçinin peşə təhsilinin cəmiyyətimizdə hələ də kifayət qədər populyar olmadığını vurğulayıb:
“İş yerlərində ali təhsilə üstünlük verilməsi və peşə təhsilinə qarşı mövcud stereotiplər insanların ali təhsil almağa marağını artırır. Peşə və kollec təhsilinə marağın artırılması üçün müvafiq tədbirlər görülməli, eyni zamanda bəzi özəl ali təhsil müəssisələrinin yaradılmasına imkan verilməlidir.
Ali təhsildən kənarda qalan abituriyentlərin böyük hissəsi qeyri-qanuni yollarla xarici ölkələrdə ali təhsil almağa meylli olur. Türkiyə, Rusiya, Gürcüstan və digər Avropa ölkələrinə gedən abituriyentlər həm ölkəmizə maliyyə itkisi yaradır, həm də diplomlarının tanınması ilə bağlı problemlərlə üzləşirlər”.
Xalidə Gəray
Musavat.com
