Türkiyənin Gənclər və İdman Nazirliyi yanında Gənclərlə İş Baş İdarəsi növbəti Türkiyə – Azərbaycan Gənclik Mübadilə Proqramının (Türkiye-Azərbaycan Gənclik Değişimi Programı) iştirakçılarının siyahısını açıqlayıb.
AZƏRTAC xəbər verir ki, sentyabrın 1-dən 6-dək Bakıda və Azərbaycanın digər şəhərlərində həyata keçiriləcək proqramın 10 əsas iştirakçısı ilə yanaşı, eyni sayda ehtiyat namizəd də seçilib.
Azərbaycan Gənclər və İdman Nazirliyinin dəstəyi ilə həyata keçirilən proqram çərçivəsində gənc Türkiyə vətəndaşları könüllülük fəaliyyətlərində, mədəni tədbirlərdə iştirak edəcək, Azərbaycanın tarixi və mədəni irsi ilə daha yaxından tanış olacaqlar. Xüsusən, Heydər Əliyev Mərkəzinə və ADA Universitetinə səfər, tələbə gənclər təşkilatlarının nümayəndələri ilə görüşlər planlaşdırılıb.
Türkiyənin Gənclər və İdman Nazirliyi bütün nəqliyyat xərclərini, həmçinin proqram iştirakçılarının yaşayış və yemək xərclərini qarşılayacaq.
Ramin Abdullayev
AZƏRTAC-ın xüsusi müxbiri
Ankara
