Azərbaycan Prezidenti İlham Əliyev sentyabrın 22-də Nyu-Yorkda dünyanın ən böyük investisiya şirkətlərinin rəhbərləri ilə görüşüb.
Dövlət başçısı əvvəlcə “Brookfield Asset Management” şirkətinin baş icraçı direktoru Brüs Flətt ilə görüşüb. Flətt ötən il Bakıya səfəri zamanı ölkəmizdə gördüyü iqtisadi nailiyyətlərin onda güclü təəssürat yaratdığını bildirib. O, şirkətin Azərbaycan Dövlət Neft Fondu ilə əməkdaşlığının getdikcə genişləndiyini vurğulayıb, həmçinin Vaşinqtonda Azərbaycan və Ermənistan arasında münasibətlərin normallaşdırılması istiqamətində əldə edilən nəticələrə görə təbriklərini çatdırıb. Prezident İlham Əliyev əməkdaşlığın uzunmüddətli strateji tərəfdaşlıq üçün geniş imkanlar yaratdığını qeyd edib. Görüşdə Azərbaycanın bərpaolunan enerji imkanları və ölkəmizin regional enerji mərkəzinə çevrilməsi perspektivləri də müzakirə olunub.
Daha sonra dövlət başçısı “Neuberger Berman” şirkətinin sədri və baş icraçı direktoru Corc Volker ilə görüşüb. Burada ARDNF-in 2016-cı ildən etibarən şirkətlə əməkdaşlığının ölkəmizin maliyyə sektoruna verdiyi töhfələr diqqətə çatdırılıb.
Prezident İlham Əliyevin növbəti görüşü isə “Blackstone” şirkətinin prezidenti və baş əməliyyat direktoru Conatan Qrey ilə olub. Qrey Azərbaycanda aparılan iqtisadi islahatların beynəlxalq investorlar üçün yeni imkanlar açdığını vurğulayıb və ölkəmizdə formalaşmış əlverişli mühiti yüksək qiymətləndirib.
Prezident İlham Əliyev Azərbaycanın aparıcı beynəlxalq maliyyə institutları ilə əməkdaşlığa böyük önəm verdiyini deyərək, ölkədə sabitlik və şəffaflıq prinsiplərinə əsaslanan iqtisadi mühitin yeni tərəfdaşlıqlar üçün əlverişli zəmin yaratdığını bildirib.
Qeyd edək ki, hər üç şirkət dünyanın ən iri maliyyə qurumlarındandır və görüşlər qarşı tərəfin təşəbbüsü ilə baş tutub.
İqtisadçı Natiq Cəfərli deyib ki, Azərbaycan prezidenti və hökuməti son zamanlar investisiya mühitinin yaxşılaşdırılması və daha çox investorun cəlb olunması üçün mühüm işlər görür: “Düşünürəm ki, böyük investisiya şirkətlərinin Azərbaycan prezidenti ilə görüşü ölkəmizə marağın daha da artmasına səbəb ola bilər.
Azərbaycan dövlətinin indi əsas məqsədi investisiyaları daha çox qeyri-neft sektoruna, logistika və yükdaşıma marşurutlarına yönəltməkdir. Şərq-Qərb nəqliyyat dəhlizinə, Zəngəzur dəhlizi vasitəsi ilə artan imkanlara daha çox investisiya cəlb etməkdir. Mənə elə gəlir ki, bu cür böyük investisiya şirkətləri ilə işləmək və onların Azərbaycana cəlb olunması Azərbaycan iqtisadiyyatına ciddi canlanma gətirə bilər: Yeni iş yerləri və əlavə dəyərlər yaranar. Bu tipli məsələlər qeyri-neft sektoruna keçidin sürətlənməsi baxımından kifayət qədər əhəmiyyətlidir”.
İqtisadçı Eldəniz Əmirov isə bildirib ki, artıq 4 ildən çoxdur ki, Azərbaycan dünya ictimaiyyətinə və qlobal güclərə tamam başqa bir tərəfi göstərməyi bacarıb:
“Ölkəmizin siyasi uğurunun iqtisadi sahədə təkrarlanmasına ehtiyac var. Bu konteksdə cənab prezidentin ABŞ səfəri və orada investisiya şirkətlərinin rəhbərləri ilə görüşməsi çox önəmlidir. Ölkəmizdə qanunvericilik bazası investisiya mühiti baxımından kifayət qədər təkmilləşdirilib. Rəqabət məcəlləsinin qəbul edilməsi, investisiya fəaliyyəti haqqında qanunun qəbul edilməsi, dövlət-özəl tərəfdaşlıq formatı və digər qanunvericilik aktları investisiya mühiti üçün səmərəli şərait yaradıb.
İndi xarici investorların ölkəmizə praktiki olaraq cəlb edilməsi və əməkdaşlıq formatlarının üzə çıxarılması qalır. Bu məsələdə Azərbaycan prezidentinin rolu çox böyükdür. Prezidentin nitqi, peşəkar ünsiyyət bacarığı və iqtisadiyyatın alt sahələrinə qədər yüksək bilgi səviyyəsi qarşı tərəflə danışıqların uğurla tamamlanmasına imkan verir.
Azərbaycanla əməkdaşlıq üçün şirkətlərin istiqamətləri həddindən çoxdur. Belə əməkdaşlıqlar 1994-cü ildən neft strategiyası ilə başlamışdı, indi isə qaz və alternativ enerji üzrə davam edir, qlobal investorları ölkəmizə cəlb edir. Bu baxımdan Azərbaycanın bərpa olunan enerji resursları və xammal ehtiyatları ölkəmizdə yerli istehsalın qurulmasına imkan verir”.
Şahanə Rəhimli
Musavat.com
