Ermənistanın müxalif “Ayakve” hərəkatının bəyanatında bildirilir ki, bu ilin iyulunda – 8 avqust Vaşinqton razılaşmasından əvvəl – keçirilmiş sorğunun nəticələri kifayət qədər maraqlıdır.
Bəyanatda qeyd olunur:
“Yaxın vaxtlarda keçiriləcək yeni sorğular göstərəcək ki, bu razılaşma ictimai əhval-ruhiyyəyə necə təsir edib, baxmayaraq ki, əsaslı dəyişiklik gözlənilmir. İyul ayında keçirilmiş sorğuya əsasən, respondentlərin 74 faizi hesab edir ki, Azərbaycanla sülh mümkün deyil. Əvvəlki sorğularla müqayisədə bu göstərici əhəmiyyətli dərəcədə artıb”.
Göründüyü kimi, iyul ayından indiyə qədər o qədər də uzun müddət vaxt keçməyib. Sadəcə ortada imzalanan tarixi bir sənəd var, yəni 8 avqustda Ağ Evdə ABŞ prezidentinin iştirakı ilə Azərbaycan və Ermənistan arasında sülhdən öncə imzalanan yekun paraflanma sənədi…
İndi necə, faiz nisbəti dəyişəcəkmi?
ƏHD Partiyasının baş katibi, politoloq Niyaməddin Orduxanlı Musavat.com-a bunları deyib:
“2020-ci il Vətən müharibəsindən əvvəl bu sorğu 99 faiz təşkil edirdi. Bunun səbəbi isə xəstə erməni ideologiyası idi. Uzun illər idi ki, ermənilərə türkə nifrət aşılanırdı və Ermənistana dəstək verən dövlətlər, güclər onları arxayın salmışdılar. Ancaq 44 günlük müharibədən sonra gördülər ki, ermənilər həmin dövlətlərin və güc mərkəzlərinin əlində Azərbaycana qarşı bir oyuncaq rolunu oynayır.
2020-ci il müharibəsində Azərbaycana məğlub olan və kapitulyasiya aktına imza atan, müharibədə məğlub olan Paşinyana ermənilər növbədənkənar parlament seçkilərində səs verib hakimiyyətdə saxladılar. İndi başa düşürlər ki, Azərbaycanla ancaq sülh sazişi şəraitində yaşamalıdırlar. Cəmiyyətdə də bu səbəbdən sülhü qəbul edənlərin sayı günbəgün artır. Erməni xalqı öz gələcəyini ancaq sülhdə görməlidir. Əks halda məhv olacaqlar”.
Cavanşir ABBASLI
Musavat.com
