Mayın 18-də Bakıda BMT-nin ən nüfuzlu beynəlxalq tədbirlərindən biri olan Dünya Urbanizasiya Forumunun 13-cü sessiyasının açılış mərasimi təntənəli şəkildə keçirildi. Azərbaycan Prezidenti İlham Əliyev və birinci xanım Mehriban Əliyeva bu mühüm beynəlxalq tədbirdə iştirak etdilər.
Publika.az-a açıqlama verən millət vəkili Ceyhun Məmmədov bildirdi ki, belə bir forumun məhz Azərbaycanda keçirilməsi dərin mənaya malikdir.
Onun sözlərinə görə, son illərdə ölkəmizin beynəlxalq arenada qazandığı nüfuz, həyata keçirilən genişmiqyaslı quruculuq layihələri və şəhərsalma sahəsindəki müasir yanaşmalar Azərbaycanın artıq yalnız regional deyil, qlobal miqyasda da etibarlı tərəfdaş və əməkdaşlıq mərkəzi kimi tanındığını açıq şəkildə nümayiş etdirir.
Nəsillərə layiqli mühitin təmin edilməsi
Millət vəkili qeyd etdi ki, müasir dünya sürətlə dəyişməkdədir. Urbanizasiya prosesləri, iqlim dəyişiklikləri, əhali artımı, miqrasiya axınları və yeni iqtisadi çağırışlar şəhər inkişafına tamamilə fərqli yanaşmalar tələb edir.
“Belə bir tarixi mərhələdə WUF13 kimi beynəlxalq platformaların rolu xüsusilə artır. Çünki bu tribunada müzakirə olunan məsələlər yalnız tikinti və infrastrukturla məhdudlaşmır – söhbət insanların yaşam keyfiyyətindən, sosial rifah səviyyəsindən, ekoloji sabitlikdən, davamlı inkişafdan və gələcək nəsillərə layiqli mühitin təmin edilməsindən gedir”, – deyə deputat bildirdi.
Ceyhun Məmmədov vurğuladı ki, Prezident İlham Əliyev açılış mərasimindəki nitqində Azərbaycanın zəngin tarixi-mədəni irsindən, ölkədə qorunan qədim memarlıq nümunələrindən və şəhərsalma ənənələrindən ətraflı bəhs etdi.
Deputatın sözlərinə görə, dövlət başçısı Bakının tarixi görünüşünün qorunmasının, İçərişəhər kimi dünya əhəmiyyətli abidələrin yaşadılmasının Azərbaycanın milli-mədəni dəyərlərə verdiyi önəmin bariz göstəricisi olduğunu qeyd edib. Eyni zamanda regionlarımızdakı tarixi abidələrin və qədim yaşayış məskənlərinin bərpası sahəsindəki işlər ölkəmizin mədəni irsə olan dərin məsuliyyətini açıq şəkildə ortaya qoyur.
Qarabağda tarixi kimlik və mədəni ruh yenidən dirçəldilir
Millət vəkili qeyd etdi ki, Prezident İlham Əliyev öz çıxışında işğaldan azad edilmiş Qarabağ və Şərqi Zəngəzurda aparılan genişmiqyaslı bərpa-quruculuq prosesinə xüsusi diqqət yetirib.
“Onilliklər boyu işğal altında qalaraq viran edilmiş şəhər və kəndlər yenidən qurulur, müasir infrastruktur yaradılır, tarixi və dini abidələr əvvəlki əzəmətinə qovuşdurulur. Prezident İlham Əliyev vurğuladı ki, Azərbaycan azad olunmuş torpaqlarda yalnız yeni yaşayış məntəqələri inşa etmir, həm də həmin ərazilərin tarixi kimliyini və mədəni ruhunu yenidən dirçəldir”, – deyə deputat əlavə etdi.
Ceyhun Məmmədov bildirdi ki, bu gün işğaldan azad olunmuş torpaqlarda görülən işlər beynəlxalq ictimaiyyətin diqqətlə izlədiyi mühüm inkişaf nümunəsinə çevrilib. Qısa müddət ərzində yolların, hava limanlarının, yaşayış məntəqələrinin, sosial infrastrukturun və rabitə şəbəkələrinin qurulması Azərbaycan dövlətinin gücünü, idarəçiliyin səmərəliliyini və möhkəm siyasi iradəni bütün dünyaya nümayiş etdirir: “Doğma yurd-yuvalarına qayıdan soydaşlarımızın sevinci isə həyata keçirilən dövlət siyasətinin ən dəyərli bəhrəsidir”.
Azərbaycan beynəlxalq arenada mövqeyini möhkəmləndirir
Deputat qeyd etdi ki, forum çərçivəsində davamlı şəhərsalma, sosial inklüzivlik, iqlim çağırışları, rəqəmsal transformasiya və gələcəyin şəhərləri mövzusunda aparılan müzakirələr Azərbaycanın bu sahədə beynəlxalq dialoqda fəal iştirakçı olduğunu bir daha təsdiqləyib.
Onun sözlərinə görə, bu forum ölkəmizin beynəlxalq təşkilatlarla əməkdaşlığının daha da dərinləşdirilməsi baxımından strateji əhəmiyyət kəsb edir:
“Bu gün Azərbaycan yalnız enerji, nəqliyyat-logistika və geosiyasi baxımdan deyil, humanitar və inkişaf platforması olaraq da beynəlxalq arenada mövqeyini getdikcə möhkəmləndirir. COP29-un Azərbaycanda keçirilməsinin ardınca WUF13 kimi nüfuzlu forumun da Bakıda təşkil olunması beynəlxalq birliyin ölkəmizə olan inamının və hörmətinin bariz ifadəsidir”.
Millət vəkili əlavə etdi ki, Prezident İlham Əliyevin rəhbərliyi ilə ardıcıl olaraq həyata keçirilən siyasət nəticəsində Azərbaycan regionda sabitlik, təhlükəsizlik və inkişaf məkanı kimi qəbul olunur: “Dünyanın müxtəlif bölgələrindəki münaqişələr, siyasi böhranlar və iqtisadi qeyri-sabitlik fonunda ölkəmizdəki sabit inkişaf mühiti beynəlxalq tərəfdaşlar tərəfindən yüksək dəyərləndirilir”.
Ceyhun Məmmədov sonda bildirdi ki, WUF13 forumu bir daha sübut etdi ki, Azərbaycan gələcəyə hesablanmış strateji düşüncəyə malik dövlətdir.
“Ölkəmiz müasir şəhərsalma, innovasiya, davamlı inkişaf və insan kapitalının gücləndirilməsi istiqamətində mühüm addımlar atır və bu kurs qətiyyətlə davam etdirilir. Əminliklə demək olar ki, Azərbaycanın bu gün qazandığı uğurlar, böyük beynəlxalq tədbirlərə uğurla ev sahibliyi etməsi və qlobal təşəbbüslərdə fəal iştirakı dövlətimizin artan gücünün, siyasi nüfuzunun və xalqımızın möhkəm birliyinin parlaq təcəssümüdür”, – deyə deputat fikrini tamamladı.
Müəllif: Adəm Abbaslı
