Narkomanlığın yaşadığımız cəmiyyətə ziyanı, bu bəla ilə mübarizədə təbliğat və maarifləndirmə işinin gücləndirilməsi, narkomanların müalicə və bərpasının təşkili, sağlam mühitə qaytarılması və bu sahədə olan digər problemlər bu gün aktual xarakter daşıyır.
Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizə sahəsində geniş tədbirləri özündə ehtiva edən proqramlar – Azərbaycan Respublikası Prezidentinin 15.07.2000-ci il tarixli 371 nömrəli Fərmanı ilə “Narkotik vasitələrin, psixotrop maddələrin və prekursorların qanunsuz dövriyyəsi və narkomanlığın yayılması ilə mübarizə üzrə Proqram”, 28.06.2007-ci il tarixli 2271 nömrəli Sərəncamı ilə “Narkotik vasitələrin, psixotrop maddələrin və onların prekursorlarının qanunsuz dövriyyəsi və narkomanlığın yayılması ilə mübarizə üzrə Proqram (2007-2012-ci illər üçün)”, 24.06.2013-cü il tarixli 2966 nömrəli Sərəncamı ilə “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2013-2018-ci illər üçün Dövlət Proqramı”, 2019-cu il 22 iyul tarixli 1334 nömrəli Sərəncamı ilə “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı” təsdiq edilmiş və uğurla həyata keçirilmişdir.
Görülən işlərin davamlılığını təmin etmək, respublikada narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizənin gücləndirilməsi, antinarkotik təbliğatı, ictimai maarifləndirmə işinin əhatəsinin genişləndirilməsi, müasir informasiya texnologiyalarının imkanlarından istifadə olunmaqla, narkotiklərin qanunsuz dövriyyəsinin və narkomanlığın yayılmasının maarifləndirmə yolu ilə qarşısının alınması və digər genişmiqyaslı məsələlərin həyata keçirilməsi məqsədi ilə Azərbaycan Respublikasının Prezidenti cənab İlham Əliyevin 2025-ci il 17 sentyabr tarixli 721 nömrəli Sərəncamı ilə “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2025-2030-cu illər üçün Dövlət Proqramı” təsdiq edilmişdir.
2025-ci il ərzində narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizə sahəsində rayonun hüquq-mühafizə orqanları, Mil-Muğan Regional Təhsil İdarəsinin Sabirabad rayonu üzrə Təhsil Sektoru, Mil-Muğan Regional Gənclər və İdman İdarəsi, “Sabirabad Rayon Mərkəzi Xəstəxanası” Publik Hüquqi Şəxs, şəhərin digər aidiyyəti idarə, müəssisə və təşkilatları tərəfindən müəyyən işlər görülmüşdür.
“Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2025-2030-cu illər üçün Dövlət Proqramı”nın icrasının vəziyyəti hər il Sabirabad Rayon İcra Hakimiyyəti başçısı yanında Şura iclaslarında müzakirə olunur, rayon Komissiyasının, rayon Polis şöbəsinin və digər aidiyyəti orqan rəhbərlərinin mübarizə-profilaktika tədbirləri barədə hesabatlarının dinlənilməsi təmin edilir, Şura iclasının qərarından irəli gələn zəruri məsələlərin icrası ilə bağlı aidiyyatı təşkilatlara müvafiq tapşırıqlar verilir.
Sabirabad Rayon İcra Hakimiyyəti yanında fəaliyyət göstərən Narkomanlığa və narkotik vasitələrin qanunsuz dövriyyəsinə qarşı mübarizə üzrə rayon Komissiyası tərəfindən narkotik vasitələrin və psixotrop maddələrin qanunsuz dövriyyəsinə qarşı mübarizə sahəsində həyata keçirilən tədbirlər, bu sahədə müşahidə olunan ümumi tendensiyalar, narahatlıq doğuran məqamlar, dövlət orqanlarının gündəlik fəaliyyətində meydana çıxan problemlərin xarakteri (təşkilati, nəzəri, praktik və s.), onların aradan qaldırılması və müvafiq orqanın fəaliyyətinin səmərəliliyinin artırılması məqsədi ilə görülən və təklif olunan tədbirlər, xarici dövlətlərdə tətbiq olunan qabaqcıl üsullar, və narkomanlığa qarşı mübarizə ilə əlaqədar digər məsələlər üzrə müzakirələr aparılmışdır. Narkomanlığın yaşadığımız cəmiyyətə ziyanı bu bəla ilə mübarizədə təbliğat və maarifləndirmə işinin gücləndirilməsi, narkomanların müalicə və bərpasının təşkili,sağlam mühitə qaytarılması və digər aktual problemlərlə bağlı konfranslar, müşavirələr keçirilmiş, kollec, lisey və orta ixtisas təhsil müəssisələrində mühazirələr oxunmuş, bu məsələlərə kütləvi informasiya vasitələrində geniş yer verilmişdir.
Belə ki, Azərbaycan Respublikası Prezidentinin 2025-ci il 17 sentyabr tarixli 721 nömrəli Sərəncamı ilə təsdiq edilmiş “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2025-2030-cu illər üçün Dövlət Proqramı”ndan irəli gələn vəzifələrin yerinə yetirilməsi ilə bağlı Tədbirlər Planına uyğun olaraq rayonun ümumtəhsil məktəblərində “Hamılıqla narkomaniyaya yox deyək!”, “Narkotikdən uzaq ol-sağlam yaşa”, “Narkomaniya əsrimizin bəlasıdır”, “Sabahkı gələcəyimizi narkotik vasitələrdən qoruyaq”, devizi altında birgə maarifləndirici görüşlər keçirilmişdir. Keçirilən tədbirlərdə IX, X və XI siniflərin şagirdləri, məktəbin pedaqoji kollektivləri, rayon Polis şöbəsinin əməkdaşları, Narkoloji Dispanserin həkimləri və Komissiya üzvləri iştirak etmişlər.
Gənclər arasında sağlam həyat tərzini təbliğ etmək məqsədilə Sabirabad Rayon İcra Hakimiyyətinin başçısının, rayon hüquq-mühafizə orqanlarının rəhbərlərinin və əməkdaşlarının iştirakı ilə mütəmadi olaraq rayonun tam orta məktəblərində “Narkotik vasitələr insanları uçuruma aparır”, “Narkomaniyaya-əsrin bəlasına yox deyək”, “Narkomaniya qarşı mübarizə” mövzularında IX-XI sinif şagirdləri ilə maarifləndirici tədbirlər keçirilmişdir. Tədbirdə, həmçinin həkim-narkoloqun, valideynlərin, müəllim və məktəb psixoloqlarının iştirakı təmin edilmişdir.
Elm vəTəhsil Nazirliyi və Səhiyyə Nazirliyi tərəfindən birgə hazırlanan təhsil, gənclər və idman təşkilatları və valideynlər üçün nəzərdə tutulmuş “Narkotik vasitələrdən və psixotrop maddələrdən sui-istifadə edən şəxslərin müəyyən edilməsi” adlı metodik vəsait ümumtəhsil məktəblərində paylanılmışdır.
Tədbirlər Planına uyğun olaraq 26 iyun-BMT-nin “Narkotiklərlə Mübarizə Günü ilə əlaqədar 15.10.2025-ci il tarixdə Sabirabad Rayon İcra Hakimiyyəti yanında Narkomanlığa və narkotik vasitələrin qanunsuz dövriyyəsinə qarşı mübarizə üzrə rayon Komissiyasının, Mil-Muğan Regional Gənclər və İdman İdarəsinin, rayon Polis şöbəsinin birgə təşkilatçılığı ilə Sabirabad Peşə liseyində tələbələr arasında antinarkotik təbliğat işini gücləndirmək məqsədilə maarifləndirici tədbir keçirilmiş, keçirilən tədbirdə narkomaniyanın cəmiyyətə mənfi təsiri, törətdiyi fəsadlar, zərərli vərdişlərin fəsadlarından və insan sağlamlığına göstərdiyi mənfi təsirlərdən, dünyanın ən böyük bəlası olan narkomanlığa qarşı aparılan mübarizə barədə tədbir iştirakçılarına geniş məlumat verilmiş, iştirakçılara mövzuya aid maarifləndirici materialllar paylanılmışdır.
Keçirilən tədbirlər zamanı narkomaniyanın fəsadlarını əks etdirən 300-ə yaxın bukletlər tədbir iştirakçılarına paylanılmış, narkomaniyanın insanlara verdiyi zərərin daha aydın görmək üçün iştirakçılara qısametrajlı filmlər və videoroliklər nümayiş olunmuşdur.
Keçirilən tədbirlər haqqında məlumatlar Sabirabad Rayon İcra Hakimiyyətinin internet səhifəsində, “Facebook” səhifəsində, Sabirabad rayonunda nəşr olunan “Kür-Araz” qəzetində dərc edilmişdir.
Dövlət başçısı cənab İlham Əliyevin yeniyetmə və gənclərə xüsusi diqqəti nəticəsində şəhərimizdə müasir standartlara cavab verən idman kompleksi inşa edilərək, onların istifadəsinə vermişdir. Yaradılmış şərait gənclərin asudə vaxtlarının səmərəli keçirilməsində və sağlam mühitdə formalaşmasında önəmli rol oynayır.
Eyni zamanda, Böyükağa Ağayev adına Ulacalı, Yusif Qasımov adına Mürsəlli kənd tam orta ümumtəhsil məktəblərində “Narkomaniyaya və erkən nikaha yox deyək”, həmçinin Mübariz Şahmurov adına Nərimankənd və Osman Mirzəyev adına Qaratəpə kənd tam orta ümumtəhsil məktəblərində “Narkomaniyaya və erkən nikaha yox deyək” mövzularında maarifləndirici tədbirlər keçirilmişdir
Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığın yayılmasına qarşı mübarizə sahəsində dövlət orqanları ilə qeyri-hökumət təşkilatları arasında qarşılıqlı, işgüzar əlaqələr və məlumat mübadiləsi keyfiyyət baxımından gücləndirilmiş, narkomanlığın profilaktikası və qarşısının alınmasında qeyri-hökumət qurumlarının yeri və rolu xeyli möhkəmləndirilmiş, fəaliyyətlərinin genişləndirilməsi istiqamətində irəliləyiş əldə olunmuşdur.
Sabirabad Rayon İcra Hakimiyyəti yanında Narkomanlığa və Narkotik vasitələrin qanunsuz dövriyyəsinə qarşı mübarizə üzrə rayon Komissiyası narkomanlığa qarşı mübarizədə əldə edilmiş müvəffəqiyyətlərlə yanaşı, hal-hazırda mövcud olan nöqsanların qətiyyətlə aradan qaldırılması üçün rayon hüquq-mühafizə orqanları, gənclər və idman, təhsil müəssisələrinin və ictimaiyyətin gücündən səmərəli istifadə etməklə bu işi tələb olunan lazımi səviyyəyə çatdırmağa səy göstərərək, Azərbaycan Respublikası Prezidentinin 2025-ci il 17 sentyabr tarixli 721 nömrəli Sərəncamı ilə təsdiq edilmiş “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2025-2030-cu illər üçün Dövlət Proqramı”nın icrası istiqamətində öz işini daha da gücləndirəcəkdir.
Həsən Həsənov,
Sabirabad Rayon İcra Hakimiyyəti başçısının birinci müavini,
Narkomanlığa və narkotik vasitələrin qanunsuz dövriyyəsinə qarşı mübarizə üzrə rayon komissiyanın sədri
