Azərbaycanda meyvə satışı ilə məşğul olan ticarətçilərin işdaşına görə, bazara Ermənistandan idxal edilmiş ərik satılır. Məlumata görə, onlar son günlərdə Rusiyanın tətbiq etdiyi məhdudiyyətlərə görə Ermənistan məhsullarının Azərbaycana göndərildiyini deyirlər.
Musavat.com Dövlət Gömrük Komitəsi və digər müvafiq qurumlara sorğu yollayaraq, iddianı araşdırıb.
Məlum olub ki, sözügedən iddianın həqiqiliyi ilə bağlı heç bir məlumat yoxdur.
Yeri gəlmişkən, 19-21 iyun tarixlərində Ermənistandan 371 ton ərik ixrac olunub. Ölkənin iqtisadiyyat naziri Gevorq Papoyan Telegram kanalında yazıb ki, Ermənistanın meyvə, tərəvəz, gül və bir sıra digər məhsullarının Rusiyaya ixracına məhdudiyyətlər tətbiq olunduğundan, göstərilən həcmlər əsasən üçüncü ölkələrə həyata keçirilən tədarüklərə aiddir. Avropa İttifaqı Ermənistan kənd təsərrüfatı məhsulları üçün öz bazarını açdığını bəyan edib. Artıq Latviya, Kipr, Yunanıstan, Bolqarıstan və digər ölkələrə ixrac başlayıb. Bununla belə, hazırkı ixrac həcmləri əvvəllər Rusiyaya göndərilən məhsul miqdarı ilə müqayisədə hələlik çox kiçikdir.
Xatırladaq ki, mayın 15-də Rusiyanın Baytarlıq və Fitosanitar Nəzarət üzrə Federal Xidməti (Rosselxoznadzor) daha əvvəl Rusiyaya məhsul ixracı dayandırılmış bir sıra erməni müəssisələrində yoxlamalar aparmaq niyyətində olduğunu açıqlayıb. Buna səbəb Avropa mənşəli olduğu ehtimal edilən saxta balıq məhsullarının ölkəyə gətirilməsi ilə bağlı şübhələr olub. Mayın 22-də isə güllərin idxalına məhdudiyyət tətbiq edildiyi bildirilib.
İyunun 2-dən etibarən Ermənistandan albalı, gilas, ərik, gavalı, şaftalı, nektarin, üzüm və digər çəyirdəkli meyvələrin idxalı məhdudlaşdırılıb. İyunun 3-də isə alma, armud, badımcan, kartof və quru meyvələrin də Rusiyaya gətirilməsinə müvəqqəti qadağa tətbiq olunub. Məlumata görə, Ermənistanın kənd təsərrüfatı məhsulları ixracının 90 faizindən çoxu Rusiyanın payına düşür. Bu səbəbdən ölkə son dövrlərdə məhsullarını Avropa və digər bazarlara yönəltməyə çalışsa da, yaxın perspektivdə Rusiya bazarını tam əvəz etmək asan görünmür.
Musavat.com iddianın doğruluğunu dəqiqləşdirmək üçün Dövlət Statistik Komitəsinə də sorğu ünvanlayıb. Komitədən sorğumuza cavabda bildirilib ki, 2026-cı ilin yanvar-aprel ayları ərzində Ermənistan mənşəli qida məhsulları Azərbaycana idxal olmayıb.
