Nəsilləri birləşdirən dəyərlər: Bayram Hüseynovun izi, Vüsal Bayramovun davam etdirdiyi yol
Bəzən bir insanın ömür yolu yalnız qazandığı uğurlarla deyil, yetişdirdiyi dəyərlərlə də ölçülür. Uzun illər Bərdə rayonunda təhsilin və mədəniyyətin inkişafına xidmət edən Bayram Hüseynov belə ziyalılardan biri olub.
Əmək fəaliyyətinə müəllim kimi başlayan Bayram müəllim uzun müddət Bərdə rayonunun Bu Əhmədli və Alpoud kənd məktəblərində direktor vəzifəsində çalışaraq yüzlərlə şagirdin təlim-tərbiyəsində mühüm rol oynayıb. Daha sonra Bərdə Rayon Pionerlər Evinin direktoru, ardınca isə Rayon Mədəniyyət Evinin müdiri kimi fəaliyyət göstərərək rayonun mədəni həyatının inkişafına böyük töhfələr verib.
Bayram Hüseynovun təşəbbüsləri nəticəsində Bərdədə mədəniyyət sahəsində mühüm yeniliklər həyata keçirilib. Onun o dövrün Mədəniyyət Nazirliyi ilə apardığı danışıqlar nəticəsində rayonda mövcud olan musiqi məktəbinə əlavə olaraq ikinci musiqi məktəbi yaradılıb. Bu addım Bərdədə musiqi təhsilinin genişlənməsinə, istedadlı gənclərin üzə çıxmasına və mədəni irsin inkişafına əhəmiyyətli töhfə verib.
Bu gün Bayram müəllimin aşıladığı dəyərlərin yaşaması təsadüfi deyil. Onun nəvəsi Vüsal Bayramov babasından miras qalan zəhmətsevərlik, məsuliyyət və cəmiyyətə xidmət prinsiplərini öz fəaliyyətində uğurla davam etdirir.
Vüsal Bayramov ARAN TV və Aran Media Groupun təsisçisi, publisist kimi media sahəsində fəaliyyət göstərərək region jurnalistikasının inkişafına, ictimaiyyətin operativ və obyektiv məlumatlandırılmasına töhfə verir.
Eyni zamanda o, Bərdə Rayon İcra Hakimiyyəti yanında İctimai Şuranın sədridir. Bu vəzifədə vətəndaş cəmiyyəti institutlarının inkişafı, ictimai nəzarətin gücləndirilməsi, vətəndaş müraciətlərinin araşdırılması və dövlət–vətəndaş əməkdaşlığının genişləndirilməsi istiqamətində fəaliyyət göstərir. Vüsal Bayramov 2025-ci ildə keçirilən İctimai Şuranın ilk iclasında Şuranın sədri seçilib.
Nəsilləri birləşdirən ən böyük sərvət soyad deyil, əməldir. Bayram Hüseynovun təhsil və mədəniyyət sahəsində qoyduğu dərin iz, Vüsal Bayramovun isə media və ictimai fəaliyyət sahəsində bu yolu davam etdirməsi ailədən gələn dəyərlərin, vətənə və xalqa xidmət ənənəsinin bu gün də yaşadığını göstərən gözəl nümunədir.
