Rusiyada Azərbaycan vətəndaşları çıxılmaz vəziyyətdədir – FOTO
Rusiyanın Voloqda vilayəti üzrə xarici vətəndaşların müvəqqəti saxlanma mərkəzində yerləşən Azərbaycan vətəndaşları acınacaqlı vəziyyətdədirlər.
Belə ki, Voloqda vilayətinin mərkəzində, Belyayev küçəsi 21a-da ünvanında yerləşən, müxtəlif millətlərdən olan 13 nəfərdən üçü Azərbaycan vətəndaşıdır.
Bir neçə aydır ki deportasiya üçün saxlanılan azərbaycanlılar – İmişli rayon sakini, 31 yaşlı Hüseynov Fərid Nadir oğlu, Gəncə şəhər sakini, 37 yaşlı Mamedov Raul Zakir oğlu və Ağdaş rayon sakini, 49 yaşlı Yusifov Adıgözəl Mansur oğludur.
Onlar Oxu.Az-a bildirib ki, karantin səbəbindən onların deportasiyası uzadılıb:
“Mərkəzin rəhbərliyi əvvəl sənədləri, sonra da pandemiya ilə əlaqədar karantin rejimini bəhanə edərək, bizi burada dözülməz vəziyyətdə saxlayır. Sizdən xahiş edirik, bizə kömək edin. Burada vəziyyət o qədər ağırdır ki, insanlar özlərinə qəsd edirlər”.
