31 Mart Şəhid Nuruyev İldırımın anım günü idi
Bakı Şəhər Mədəniyyət Baş İdarəsi Xəzər rayon Mərkəzləşdirilmiş Kitabxana Sisteminin Mərkəzi Kitabxanası Şəhid İldırım Nuriyev haqqında “Məlumat saatı” təşkil edib.
ARANTV.AZ xəbər verir ki, 1971-ci il oktyabrın 18-də Nuriyevlər ailəsində bir oğlan uşağı dünyaya göz açıb. Oğluna İldırım adını verib Xanəli kişi. İldırım 1978-ci ildə Lerik rayonunun Qosmalian kəndində yerləşən tam orta məktəbin birinci sinifinə qədəm qoyur. O, orta məktəbdə təhsil alarkən öz fəallığıyla digər şagirdlərdən seçilib. Tarix fənnini çox sevən İldırım, eyni zamanda bədii ədəbiyyata da böyük maraq göstərib. İldırım şahmat oynamağı,futbol oynamağı çox sevib. Onun ən böyük arzularından biri də hüquqşünas olmaq idi. Həmin illərdə İldırımın heç ağlına da gəlməzdi ki, xain qonşumuz olan ermənilər onun canından çox sevdiyi Vətəninin torpaqlarına göz dikəcək və o bu döyüşlərin birində Şəhid olacaq..
Zaman yetişir İldırım 1989-cu ilin may ayında orta məktəbi bitirir və həmin ilin oktyabr ayında hərbi xidmətə yollanır. 2 il müddətində Naxçıvan Muxtar Respublikasında xidmət edir. Hərbi xidmətdə olduğu illərdə hələ ermənilərin Qarabağa təcavüzü başlamamış, hər şey öz yolunda gedirdi. İldırım hərbi xidmətin bitməsini səbrsizliklə gözləyirdi. O, öz arzularını əks etdirən şəkillər çəkir və şeirlər yazırdı. İldırım 19 noyabr 1991-ci ildə hərbi xidməti başa vuraraq ailəsinin yanına qayıdır. Arzusunu həyata keçirib, hüquqşünas olmaq üçün ali məktəbə hazırlaşmağa başlayır. Lakin 1-ci Qarabağ döyüşlərinin başlanması ilə İldırım bu istəyindən əl çəkib, könüllü olaraq cəbhəyə yollanır. Bir çox döyüşlərdə iştirak edən İldırım Xanəli oğlu Nuruyev 31 mart 1993-cü ildə Füzuli rayonu uğrunda gedən döyüşdə başından aldığı qəlpə yarasından dünyasını dəyişir və Şəhidlik zirvəsinə ucalır. Şəhidimiz aprel ayının 1-də doğulduğu Lerik rayonunun Divağac kəndində torpağa tapşırılır.
Təhsil aldığı orta məktəbə Şəhidimizin adı verilib.
Ruhun şad olsun Şəhidim!
Unutmayın Şəhidlər vurulanda deyil, unudulanda ölər…
