Düşünülmüş siyasət ölkəmizi yeni qələbələrə aparır
Əks-hücum nəticəsində 30 illik işğala son qoyan, tarixi ədaləti və ərazi bütövlüyünü bərpa edən Azərbaycan artıq həm Qafqazda, həm də Avropa Birliyində söz sahibinə çevrilib. Şanlı ordumuz Ali Baş Komandanın rəhbərliyi ilə erməni silahlı qüvvələrini əzəli torpaqlarımızdan qovmaqla regionun inkişafını müəyyənləşdirən yeni reallıq yaratdı. Məhz bu reallıq nəticəsində də Azərbaycan milli maraqlarını təmin etmək və böyük qlobal güc mərkəzlərilə münasibətlərini möhkəmləndirməklə bərabər, regional təhlükəsizlik və strateji yol-nəqliyyat kommunikasiyalarının, eləcə də sosial-iqtisadi əməkdaşlıq əlaqələrində yeni mərhələnin əsasını qoydu. Bütün bu reallıqlar qonşu ölkələrlə münasibətlərin gələcəyinə də müsbət təsir göstərəcək.
Bu gün ölkəmiz geosiyasi proseslərdə və irimiqyaslı iqtisadi layihələrdə, ilk növbədə, milli maraqlarını nəzərə alaraq iştirak edir. Bununla da yeni sosial-iqtisadi əməkdaşlıq əlaqələrinin formalaşmasına təkan verir. Bundan əlavə, Azərbaycan əsas geosiyasi mövqedə bərabərhüquqlu tərəfdaşlıq münasibətlərinin inkişaf etdirilməsində maraqlı ölkə olduğu üçün bu məsələdə böyük uğurlar da əldə etmişdir. Artıq hamıya məlumdur ki, hazırda Azərbaycan təkcə Qafqaza deyil, həm də Yaxın və Orta Şərq regionuna təsir edən ciddi bir amilə də çevrilmişdir.
İndiki qarışıq geosiyasi və geoiqtisadi reallıqlar fonunda da Azərbaycan milli maraqlarını qorumaqla yanaşı, qarşıdurmaya yox, əməkdaşlığa təkan verəcək istənilən addımı dəstəkləməsi və təşviq etməsi ilə fərqlənir.
Ölkəmizin ən başlıca siyasi amalı demokratiya, qonşu dövlətlərlə sülh şəraitində yaşamaq və tərəfdaşlıqdır. Bu gün Azərbaycan dövlətinin siyasi və iqtisadi baxımdan daha da güclənməsi, regional proseslərdə söz sahibi olması ölkənin bölgədə mədəni və siyasi təsirinin daha yüksək olmasını şərtləndirən amillərdir. Azərbaycan bu kimi imkanlarından sui-istifadə etməyərək regionda malik olduğu iqtisadi və kommunikasiya potensiyalını bölüşməyi ilə seçilmişdir.
Bu günlər tarixinin ən qüdrətli dövrünü yaşayan Azərbaycan postmüharibə dövründə keyfiyyətcə yeni olan və 2022-2030-cu illəri əhatə edən strateji mərhələyə daxil olub. Təbii ki, bu yeni mərhələ dayanıqlı inkişafı təmin etmək üçün dövlətin uzunmüddətli yüksəliş konsepsiyasının hazırlanmasını labüd edir.
Bütün dövrlərdə düşünülmüş, ölçülüb-biçilmiş qərarları ilə Azərbaycanın qlobal böhranlardan az itki ilə çıxması üçün konkret proqramlar, sosial-iqtisadi layihələr hazırlayan Prezident İlham Əliyev məhz bu dövr üçün də yol xəritəsi hesab olunan “Azərbaycan 2030: sosial-iqtisadi inkişafa dair Milli Prioritetlər”i müəyyənləşdirib. Bu sənəd qlobal iqtisadi reallıqları, eləcə də yeni inkişaf mərhələsində qarşıya qoyulmuş məqsədləri özündə ehtiva edir. Bununla yanaşı, bu ilin əsas maliyyə sənədinin-müstəqillik dövrünün ən böyük dövlət büdcəsinin gəlir və xərclərinin göstəriciləri də onu deməyə əsas verir ki, Azərbaycan postmüharibə və ondan sonrakı dövrdə də dayanıqlı inkişafını təmin edə biləcək.
Cari ilin büdcəsinin gəlir və xərclər istiqamətinə nəzər yetirdikdə aydın şəkildə görərik ki, Azərbaycan iqtisadiyyatı qlobal pandemiya dövründə belə inkişaf edib. Təbii ki, bütün bunlar son illərdə düşünülmüş addımlar, həyata keçirilən islahatlar nəticəsində reallaşıb. Bu uğurları şərtləndirən amillər Prezident İlham Əliyevin milli iqtisadiyyatın şaxələndirilməsi, investisiya və biznes mühitinin yaxşılaşdırılması, kiçik və orta sahibkarlığın dəstəklənməsi və davamlı inkişafı, iqtisadiyyatda şəffaflığın gücləndirilməsi istiqamətində gördüyü uğurlu işlərdir.
Qələbə və postmüharibə dövründə Azərbaycanın yeni geosiyasi reallıqlara olan təsiri öz əhatəsinə görə çox böyük əhəmiyyətə malikdir. Bu reallıqlar postmüharibə dövründə xalqımızın öz siyasi lideri ətrafında birliyinin elə bir ideoloji təfəkkür tərzini formalaşdırıb ki, bundan sonra qüdrətli dövlətimizin qarşısında heç kim heç vaxt heç bir təxribat törədə bilməyəcək.
