Zəfərimizin memarı İlham Əliyev xalqı yeni qələbələrə aparacaq
Hər bir xalqın tarixində ən önəmli və heç vaxt unudulmayacaq bir səhifə var. O səhifə ki, onun sətirlərində qeyd olunanlar xalqın gələcəyini müəyyən edir, onu inkişaf etdirir, həm də tarixdən baş verənlərdən dərs götürməyi öyrədir. Azərbaycan xalqı da tarix boyu iri dövlətlər qurub, imperialara, böyük bir coğrafiyaya sahib olub. Son iki yüz ildə isə atalarımızın qanı-canı bahasına qurulmuş dövlətimiz xəyanətkar qonşularımızın və onlara dəstək olan böyük güclərin əli ilə parçalanıb, kiçik hissələrə bölünüb, başqa dövlətlərin tərkibinə qatılıb. Bu gün onun izləri də görünür, bu izi bizi parçalayanlar belə itirə bilməyiblər, xalqımız qonşu dövlətlərin tərkibində bu gün də varlıqlarını sürdürməkdədirlər. Canımız Azərbaycanı sovet hakimiyyəti dövründə də xırda-xırda doğrayıb “qardaş respublikalar”a peşkəş verildiyidən də xəbərimiz var. Ta ki, 27 sentyabr 2020-ci ilə qədər…
Bu Şanlı tarix 30 illik işğalın sonunun başlanğıcı idi. Qarabağ azadlığına qovuşurdu, başımızın dik durması üçün xalqımız ayağa qalxmışdı. Müzəffər Ali Baş Komandan İlham Əliyevin komandanlığı ilə qəhrəman əsgər və zabitlərimizin şücaəti, şəhidlərimizin qanı və canı bahasına torpaqlarımız işğaldan azad edilirdi. Və Azərbaycan xalqının dəstəyi, Prezident İlham Əliyevin sərkərdəliyi altında Silahlı Qüvvələrimiz 30 illik işğala son qoyaraq, ərazi bütövlüyünü bərpa etdi. Azərbaycan xalqı özü öz gücünə BMT-nin qəbul etdiyi, lakin 30 ilə yaxın bir müddətdə kağız üzərində qalmış qətnamələrini icra etdi. Ali Baş Komandan İlham Əliyev Azərbaycanı qalib ölkəyə, Azərbaycan xalqını qalib xalqa çevirdi.
Vətən müharibəsində əldə edilən möhtəşəm Zəfər, eyni zamanda, xalq-iqtidar birliyinin təntənəsi oldu, ölkəmizin gücünü, qüdrətini düşmənə və onun havadarlarına nümayiş etdirdi. Prezidentimiz həmişə böyük fəxrlə deyir ki, bu uğurların əsasında məhz ölkədəki sağlam ictimai-siyasi mühit, xalqla iqtidarın birliyi dayanır. Fəxrlə deyə bilərik ki, bu qarşılıqlı inam sayəsində Prezident İlham Əliyev xalqı bundan sonra da öz arxasınca qələbədən-qələbəyə aparacaq.
Vətən müharibəsinin ilk günündən ordumuz daim irəli gedir, mənfur düşmənə ağır, sarsıdıcı zərbələr endirir, yaşayış məntəqələrimizi bir-birinin ardınca azad edirdi. Dövlət başçımızın söylədiyi kimi desək, rəşadətli Azərbaycan Ordusu düşmənin belini qırır, başını əzirdi. Əldə edilən Qələbənin zirvəsi noyabrın 8-də Qarabağın tacı, Türk dünyasının mədəniyyət mərkəzi olan Şuşa şəhərinin azad edilməsi oldu. Prezident İlham Əliyev Şəhidlər xiyabanından xalqa müraciətində “Xoşbəxt adamam ki, ata vəsiyyətini yerinə yetirdim” deyərək səbirsizliklə gözlənilən bu müjdəni verdi.
Müharibənin taleyi Şuşa işğaldan azad edilməsi ilə həll olundu. Noyabrın 9-dan 10-na keçən gecə üçtərəfli Bəyanat imzalandı. Bəyanata əsasən, Ermənistan işğal altındakı digər rayonlarımızdan çıxmasının tarixini verdi. Kapitulyasiya aktına imza atan Ermənistan Ağdam rayonunun işğal altındakı hissəsini, Kəlbəcər və Laçın rayonlarını döyüşsüz geri qaytarmağa məcbur oldu. Beləliklə, 44 gün davam edən Vətən müharibəsində Müzəffər Ali Baş Komandanımızın rəhbərliyi ilə rəşadətli Azərbaycan Ordusu qəhrəmanlıq nümayiş etdirərək Azərbaycan xalqına tarixi Zəfər bəxş etdi. Dövlət başçımız 2020-ci il dekabrın 3-də Azərbaycan Respublikasında Zəfər Gününün təsis edilməsi haqqında Sərəncam imzaladı. Bu sərəncam Qələbəmizi əbədiləşdirildi.
Bu gün Azərbaycan Prezidenti İlham Əliyev azad edilmiş rayonlara çoxsaylı səfərləri zamanı strateji infrastruktur obyektlərinin açılışını edir, yenilərinin təməlini qoyur. Füzuli hava limanı artıq təyyarələri qəbul edir, Şuşaya gedən Zəfər yolu tamamlandı. Ağdam və Cəbrayıl şəhərlərinin bərpasına başlanıldı, Zəngilan hava limanı istifadəyə verildi. Prezidentimizin dediyi kimi, Qarabağın tezliklə cənnətə çevriləcəyi gün uzaqda deyil, keçmiş məcburi köçkünlər maksimum qısa müddətdə doğma yurdlarına qayıdacaqlar.
Zəfərin ildönümünü qeyd edərkən, mütləq qardaş Türkiyənin dəstəyini də xüsusi qeyd etməliyik. Müharibə dövründə Türkiyə ölkəmizin yanında oldu. Türkiyə Prezidenti Rəcəb Tayyib Ərdoğanın müharibə başlayan zaman “Azərbaycan tək deyil, Türkiyə onun yanındadır” – deməsi bizə ən böyük mənəvi dəstək oldu. Şuşa Bəyannaməsinin imzalanması Türkiyə-Azərbaycan münasibətlərini müttəfiqlik zirvəsinə yüksəltdi. Bu gün Azərbaycan-Türkiyə münasibətləri Prezident İlham Əliyevin də dəfələrlə vurğuladığı kimi, dünyada bənzəri olmayan qarşılıqlı etibara və etimada əsaslanır. Bizim xalqlarımızı birləşdirən yalnız etnik, dini və mədəni köklər deyil, eyni zamanda, mürəkkəb və ziddiyyətli proseslərin cərəyan etdiyi XXI əsrdə bir-birimizin yanımızda olmağımızdır.
Yaşasın Ali Baş Komandan,Yaşasın Müzəffər Azərbaycan Ordusu!
Aliyə Orucova,
YAP Pirallahı rayon təşkilatı Aparatının məsul əməkdaşı
