Milli həmrəyliyin simvolu
Azərbaycan Respublikasının Dövlət bayrağı Azərbaycan vətəndaşlarının milli həmrəyliyinin, vahid məfkurə ətrafında sıx birləşməsinin başlıca amillərindən biridir
Hər bir dövləti digərlərindən fərqləndirən və seçdirən xüsusi rəmzləri vardır. Azərbaycan Respublikasının Konstitusiyasına əsasən, Dövlət bayrağı, Azərbaycan Respublikasının gerbi və Azərbaycan Respublikasının Dövlət himni Dövlətimizin rəmzləri kimi qəbul edilmişdir.
Bu gün Azərbaycanın üçrəngli bayrağı hər birimizin and yeridir. Xüsusən, Qarabağ torpaqlarını qarış-qarış azad edən Müzəffər Azərbaycan Ordusunun qürurla bayrağımızı sancaraq qələbəmizi elan etməsi, Zəfər Günümüzdə dünyanın müxtəlif yerlərində yaşayan azərbaycanlıların bayrağımızı yüksəyə ucaldaraq məğrurluqla nümayişi hər kəsin yaxşı yadındadır. Bayrağımız dövlətimizin suverenliyinin, şərəfinin rəmzidir.
Üçrəngli bayrağımız ilk dəfə 1918-ci ilin noyabr ayının 9-da Azərbaycan Xalq Cümhuriyyətinin iclasında qəbul edilərək Azərbaycan Xalq Cümhuriyyəti Nazirlər Şurasının binası (indiki Azərbaycan Respublikasının Dövlət Neft Şirkətinin “Azneft” İstehsalat Birliyinin binası) üzərində ucaldılmışdır. Dövlət statusuna malik bu bayraq Azərbaycan Xalq Cümhuriyyətinin 1920-ci il aprel ayının 27-də süqutundan sonra may ayının 3-də Azərbaycan parlamentinin binası üzərindən endirilmışdır.
Sovet imperiyasının müstəmləkə siyasətindən azad olma istəyini bəyan edərkən xalqımız yenidən üçrəngli bayrağımızı ucaltdı.
1990-cı il noyabr ayının 17-də Naxçıvan Muxtar Respublikası Ali Məclisinin sədri, Ulu Öndər Heydər Əliyevin təşəbbüsü və rəhbərliyi ilə baş tutmuş sessiyada üçrəngli bayraq Naxçıvan Muxtar Respublikasının dövlət bayrağı kimi təsdiqləndi. Eyni zamanda, bu bayrağın Azərbaycanın dövlət rəmzi kimi tanınması ilə əlaqədar Azərbaycan SSR Ali Soveti qarşısında vəsatət qaldırıldı. 1991-ci il fevral ayının 5-də isə Azərbaycan Respublikasının Ali Soveti bu vəsatətə əsasən, üçrəngli bayrağımızı yenidən Azərbaycanın Dövlət Bayrağı kimi qəbul edilməsi haqqında qərar qəbul etdi.
Azərbaycan Respublikasının Prezidenti cənab İlham Əliyevin 2009-cu il noyabr ayının 17-də imzaladığı Sərəncama əsasən, hər il noyabrın 9-u ölkədə Dövlət Bayrağı Günü kimi qeyd edilir.
2010-cu il sentyabr ayının 1-də isə Bakıda Dövlət Bayrağı Meydanının təntənəli açılışı olmuşdur. Azərbaycan Respublikasının Prezidenti cənab İlham Əliyev Dövlət Bayrağı haqqında demişdir: “Bizim bayrağımız qürur mənbəyimizdir. Bizim bayrağımız canımızdır, ürəyimizdir. Bu gün Azərbaycanın hər bir yerində Dövlət bayrağı dalğalanır. Azərbaycan ərazi bütövlüyünü bərpa edəndən sonra milli Dövlət bayrağımız bu gün hələ də işğal altında olan torpaqlarda qaldırılacaqdır. Bizim bayrağımız Dağlıq Qarabağda, Xankəndidə, Şuşada dalğalanacaqdır. O günü biz hər an öz işimizlə yaxınlaşdırmalıyıq və yaxınlaşdırırıq. Eşq olsun, Azərbaycan bayrağına!”.
2020-ci ildə 44 günlük müharibədə Ali Baş Komandan İlham Əliyevin ərazi bütövlüyümüzün təmini sahəsində uğurlu siyasəti və Müzəffər Azərbaycan Ordusunun sayəsində torpaqlarımız 30 illik işğaldan azad edildi. 2021-ci il yanvarın 15-də cənab Prezident İlham Əliyev Şuşa şəhərində üçrəngli bayrağımızı ucaldarkən hərbçilərlə görüşdə qeyd etmişdir: “Bakıda möhtəşəm Dövlət Bayrağı Meydanı açılanda mən çıxış edərkən demişdim ki, gün gələcək və Azərbaycan bayrağı işğal edilmiş torpaqlarda, o cümlədən Şuşada qaldırılacaqdır. Bax, bu gün gəldi. Biz buraya qalib kimi gəlmişik, bayrağı da qaldırmışıq, azad edilmiş bütün torpaqlarda Azərbaycan bayrağı dalğalanır”.
Bahar Məmmədova,
Bakı şəhəri, Xətai rayon İlqar Mirzəyev adına 98 №li tam orta məktəbin Təlim Tərbiyə İşləri üzrə direktor müavini,
YAP Xətai rayon təşkilatının ərazi partiya təşkilat sədri
