Mingəçevirdə narkomaniya ilə bağlı 98 cinayət faktı aşkarlanıb
Ölkə ərazisində narkomanlığa və narkotik vasitələrin qanunsuz dövriyyəsinə qarşı aparılan mübarizə sahəsində hüquqi məsələləri tənzimləyən qanunvericilik bazasının yaradılması və bu bazanın dəyişən şəraitə və tələblərə uyğunlaşdırılması Azərbaycan dövlətinin və müvafiq qurumların əsas fəaliyyət istiqamətlərindən biri olmuşdur.
Belə ki, bu məsələ ilk dəfə Ümummilli Lider Heydər Əliyevin “Narkomanlığa və narkotik vasitələrin qanunsuz dövriyyəsinə qarşı tədbirlər haqqında” 1996-cı il 26 avqust tarixli 485 nömrəli Fərmanında öz əksini tapmaqla, insanların sağlamlığının, rifahının və mənəvi – əxlaqi dəyərlərinin qorunması və narkomanlığa, narkotiklərin qanunsuz dövriyyəsinə qarşı mübarizə ümumdövlət vəzifəsi kimi müəyyən edilmiş, həmçinin narkotiklərin qanunsuz dövriyyəsi və narkomanlıqla mübarizə sahəsində dövlət siyasətinin strateji istiqamətləri dəqiq göstərilmişdir.
Azərbaycan Respublikası Prezidentinin 2019-cu il 22 iyul tarixli 1344 nömrəli Sərəncamı ilə təsdiq edilmiş “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı” nın icrası ilə bağlı Mingəçevir şəhərində 2022-ci il ərzində bir sıra mühüm tədbirlər həyata keçirilmişdir.
Belə ki, Mingəçevir şəhər İcra Hakimiyyəti başçısı aparatı yanında fəaliyyət göstərən Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Komissiya tərəfindən hər il olduğu kimi, 2022-ci ildə də bu sahədə görüləcək işlərlə bağlı iş planı tərtib olunmuş, şəhərin aidiyyəti təşkilatlarına göndərilərək icrasına nəzarət edilmişdir.
İş planına uyğun olaraq şəhərdə fəaliyyət göstərən 1 ali, 2 orta ixtisas, 1 peşə və 22 ümumtəhsil məktəblərində təhsil alan tələbə və şagirdlərlə vaxtaşırı görüşlər təşkil olunur. Hesabat dövründə şəhərin ümumtəhsil məktəblərində “Zərərli vərdişlərin qarşısının alınması” mövzusunda tədbirlər təşkil olunmuş, şagirdlərlə maarifləndirici söhbətlər aparılmışıdır. Tədbirlərdə şəhər İcra Hakimiyyətinin, Polis şöbəsinin və Narkoloji dispanserin nümayəndələri məruzələr etmiş, şagirdlərə zərərli vərdişlərdən uzaq olmaları tövsiyə olunmuşdur. Yeniyetmə və gənclərlə “Narkotikaya yox deyək”, “Əsrin bəlası”, “Ağ ölüm” və s. mövzularda söhbətlər aparılmış, dəyirmi masalar, inşa və rəsm müsabiqələri keçirilmiş, film və videolar, çarx və lentlər nümayiş etdirilmişdir. Şəhərin təhsil müəssisələrində keçirilən tədbirlər yerli və respublika KİV-lərində işıqlandırılmışdır.
Eyni zamanda, 26 iyun-BMT-nin Narkotiklərlə Mübarizə Günü ilə əlaqədar Mingəçevir şəhərində narkomaniya, onun doğurduğu fəsadlar və s. barədə maarifləndirici tədbirlər keçirilmişdir. Yerli komissiya tərəfindən tərtib edilmiş qrafikə uyğun olaraq tədbirlər Mingəçevir Dövlət Universiteti, Tibb və Turizm kollecləri, Peşə məktəbi, şəhər Təhsil və Mədəniyyət şöbələri, Gənclər və idman idarəsi və Şəhər mərkəzi xəstəxanasında keçirilmişdir.
Hesabat dövründə narkotik vasitələrin qeyri-qanuni hazırlanması, əldə edilməsi, saxlanması və ya satışı ilə bağlı 98 cinayət faktı aşkarlanmış, həmin faktlar üzrə istintaq aparılmışdır. Məhkəmə hökmü ilə təqsirləndirilən şəxslərdən müsadirə edilmiş, eləcə də əməliyyat axtarış tədbirləri nəticəsində götürülmüş məhkəmə qərarları ilə məhv olunması nəzərdə tutulmuş narkotik vasitələr-ümumi çəkisi 312,857qram heroin, 465,61 qram qurudulmuş marixuana, 259,468 qram tiryək, 3973,79 qram marixuana, 900,69 qram çətənə, 439,386 metamfetamin həbi və 6 ədəd çətənə bitkisinin şitilləri 24 avqust 2022-ci il tarixlərdə Mingəçevir Şəhər Prokurorluğunun həyətində yandırma üsulu ilə məhv edilmişdir.
Hesabat dövründə şəhər xəstəxanası və apteklərindən qanunsuz əldə edilmiş dərman preparatlarının istifadəsinə dair cinayət faktları aşkar edilməmişdir.
2007-ci ilin may ayından başlayaraq “Xaş-xaş” şərti adı altında keçirilən cinayət axtarış tədbirləri 2022-ci il ərzində də davam etdirilmiş və cinayət faktı aşkar edilməmişdir.
Hesabat dövründə şəhər Rayonlararası Narkoloji Dispanserin stasionar şöbəsinə 48 xəstə daxil olmuşdur. Onlardan 35 nəfəri ətraf rayon əhalisi, 13 nəfəri isə şəhərdəndir. Stasionarda müalicə almış 48 xəstəyə 528 ədəd, yəni 172 litr qanəvəzedici köçürülmüşdür. Hesabat ilinin sonuna 596 xəstə dispanserdə qeydiyyata durmuşdur. Dispanserin qeydiyyatında yeniyetmələr olmamışdır. Vaxtaşırı olaraq dispanserin əməkdaşları şəhər Polis şöbəsinin əməkdaşları ilə birgə məhəllələrdə, mənzil istismar sahələrinin ərazisində, ali, orta ixtisas və ümumtəhsil məktəblərində yeniyetmə və gənclərlə görüşlər keçirir, maarifləndirici söhbətlər aparılır. Bu iş mütəmadi olaraq davam etdirildiyi üçün dispanserin ambulator şöbəsinə müraciətlər artmış və onlardan bəziləri könüllü olaraq anonim müalicəyə cəlb edilmişlər.
Əvvəlki illərdə olduğu kimi, bu müddət ərzində də “Mingəçevir” qəzetində mütəmadi olaraq narkomaniyanın insan sağlamlığına və həyatına yaratdığı təhlükə ilə əlaqədar materiallar və məqalələr hazırlanaraq geniş oxucu auditoriyasına təqdim olunmuşdur. Bildiririk ki, Mingəçevir şəhərində “Narkotik vasitələrin, psixotrop maddələrin və onların prekursorlarının qanunsuz dövriyyəsi və narkomanlığa qarşı mübarizəyə dair 2019-2024-ci illər üçün Dövlət Proqramı”nın həyata keçirilməsi ilə bağlı təsdiq edilmiş plana uyğun tədbirlərin icrası davam etdirilir və daimi nəzarətdə saxlanılır.
Hikmət Kərimov,
Mingəçevir Şəhər İcra Hakimiyyəti başçısının müavini,
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Komissiyanın sədri
