Xeyli müddətdir ki, dünyanı narahat edən təhlükələrdən biri də gözlənilən ümumdünya ərzaq qıtlığıdır. Artıq bu istiqamətdə beynəlxalq təşkilatların və aparıcı ölkələrin ciddi mesajlarını da aydın görmək olur. Ona görə də indi hər bir ölkə öz ərzaq təhlükəsizliyi üçün önəmli addımlar atmağa çalışır. Ölkəmizdə də əhalinin ərzaq məhsulları ilə etibarlı təminatı üçün məqsədyönlü tədbirlər həyata keçirilir. Xüsusilə, son bir neçə ildə 300 min hektardan çox ərazilərdə yaradılan 50- dən çox aqroparklar ərzaq bolluğunu təmin edəcək mühüm amildir.
Məlumdur ki, Rusiya-Ukrayna müharibəsi başlayandan sonra dünyada taxıl qıtlığı ilə bağlı hökm sürən narahatlığa Türkiyə Prezidenti Rəcəb Tayyib Ərdoğanın vasitəçiliyi ilə son qoyuldu. Düzdür, Azərbaycan üçün taxıl probleminin yaranacağı gözlənilən deyildi. Çünki ölkəmiz ənənəvi olaraq taxılı da, gübrəni də Rusiyadan alır. Məhz Rusiya ilə əldə edilən razılaşmalar nəticəsində Azərbaycana istənilən qədər həm gübrə, həm taxıl ixrac edə bilir. Eyni zamanda, artıq 5 ildir ki, Sumqayıt Sənaye Parkında istehsal edilən karbamid gübrələri həm fermerlərimizin tələbatını ödəyir, həm də xarici ölkələrə ixrac edilir.
O da məlumdur ki, Azərbaycanın ən məhsuldar torpaqları Qarabağ və Şərqi Zəngəzur iqtisadi rayonlarında yerləşir. Məhz bu səbəbdən də işğaldan azad olunmuş rayonlarda yeni aqroparkların yaradılması dövlətimizin qarşısında duran mühüm məsələdir.
Məlumdur ki, işğaldan əvvəl Ağdam və Füzuli taxıl istehsalı sahəsində Qarabağda aparıcı rayonlardan olublar. Bu rayonların əsas hissələrinin uzun müddət işğal altında qalması onların potensialından istifadə etməyə imkan verməyib. İlkin qiymətləndirmələr göstərir ki, işğaldan azad edilmiş ərazilərdə 200 min tona yaxın taxıl istehsalı mümkündür. Məhz ötən il işğaldan azad olunmuş və minalardan təmizlənmiş torpaqlarda əkilən taxıl sahələrindən minlərlə ton məhsul yığılmışdır.
İşğaldan azad edilən Zəngilan, Cəbrayıl, Qubadlı, Laçın və Kəlbəcər rayonları isə hevyandarlıq və üzümçülük üçün çox əlverişlidir. Artıq həmin rayonlardan Zəngilanda və Cəbrayılda 2022-ci ilin oktyabrın 26-da aqroparkların təməli qoyulub. Hər iki rayondakı təməlqoyma mərasimində Azərbaycan Prezidenti İlham Əliyevlə, Türkiyə Prezidenti Rəcəb Tayyib Ərdoğanın iştirak ediblər.
Qeyd edək ki, bu gün Azərbaycan özünü ət məhsulları ilə 90 faiz, quş əti ilə 80 faiz, süd və süd məhsulları ilə 85 faiz səviyyəsində təmin edir. Dövlət tərəfindən qarşıya qoyulan əsas məqsəd növbəti 5 il ərzində bu istiqamətlərdəki təminatı 100 faiz səviyyəsinə çatdırmaqdır.
Hazırda Azərbaycanda taxıla olan tələbatın 60 faizi yerli istehsal hesabına ödənilir, qalan 40 faizi isə idxal edilir. Ancaq dövlətin strateji hədəfində ərzaqlıq buğda ilə təminatı 80 faizə çatdırmaqdır. Buna görə aqrar sahəyə daha bir dövlət dəstəyi həyata keçirilməyə başlanılıb. Belə ki, 2023-cü ildən etibarən 5 il müddətində ərzaqlıq buğda istehsalına görə subsidiya verilir.
