Aclıq hissinin olmaması, sıx iş qrafiki və ya arıqlamağa kömək etdiyinə inanmaq səbəbi ilə səhər yeməyini ötürmək bədəndə lazımi qida maddələrinin çatışmazlığına, mədə xorasına və müxtəlif sağlamlıq problemləri riskinin artmasına səbəb ola bilər.
Hanoydakı Tam Anh Ümumi Xəstəxanasının Qidalanma və Pəhriz Departamentindən həkim Nguyen Ti Fuonq səhər yeməyinin günün ən vacib yeməyi olduğunu vurğulayıb. O, mütəmadi olaraq səhər yeməyi yetməməyin aşağıdakı risklər də daxil olmaqla sağlamlığa çoxsaylı mənfi təsirləri ola biləcəyini izah edib:
Yorğunluq
Səhər yeməyi beynin və bədənin düzgün işləməsi üçün vacib qida və enerji verir. O olmadan maddələr mübadiləsi yavaşlayır, yorğunluğa, oyanıqlığın olmamasına, diqqəti cəmləmək və xatırlamaqda çətinliyə səbəb olur.
Piylənmə
Bir çox insanlar səhər yeməyini atlamağın arıqlamağa kömək etdiyinə inanırlar. Ancaq Fuonq izah edib ki, bu, yanlış fikirdir. Əslində, səhər yeməyini atlamaq tez-tez aclığın artmasına səbəb olur. Nəticədə nahar və şam yeməyində daha böyük porsiyalı yeməklər və ya qaçırılmış qidaları kompensasiya etmək üçün atışdırmalae olur. Bu da həddindən artıq kalori qəbuluna və zamanla çəki artımına səbəb ola bilər.
Xroniki xəstəliklərin riskinin artması
Səhər yeməyi maddələr mübadiləsini sürətləndirir və qanda şəkərin səviyyəsini sabitləşdirir. Onu ötürmək qan şəkərinin müvəqqəti aşağı düşməsinə səbəb ola bilər ki, bu da bədəni tarazlığı bərpa etmək üçün hormonları buraxmağa sövq edir. Qanda şəkərin səviyyələrindəki bu dalğalanmalar 2-ci tip diabet üçün əsas risk faktoru olan insulin müqavimətini artıra bilər.
Mədə və onikibarmaq bağırsaq xoraları
Yeməkləri ötürdükdə mədə turşusu istehsal olunmağa davam edir. Lakin onu zərərsizləşdirmək üçün qida olmur. Bu, mədə selikli qişasını zədələyə, mədə və onikibarmaq bağırsağın xorasına səbəb ola bilər.
Səhər yeməyini atlamaq da mədə-bağırsaq xərçəngi, o cümlədən yemək borusu, mədə, bağırsaq, qaraciyər və öd yollarının xərçəngi riskinin artması ilə əlaqələndirilmişdir.
Öd daşları
Yemək öd kisəsinin həzm üçün bağırsaqlara öd buraxmasını stimullaşdırır. Uzun müddət yeməyi atlamaq öd durğunluğuna səbəb olur. Bu durğunluq xolesterol və öd duzlarının kristallaşmasına, öd kisəsində daşların əmələ gəlməsinə səbəb ola bilər.
Bundan əlavə, yeməkləri atlamaq bağırsaq hərəkətliliyini azalda bilər, qəbizlik riskini artırır və nəcislə artıq xolesterinin xaric edilməsini yavaşlada bilər. Bu, öd daşlarının meydana gəlməsinə daha da kömək edir.
Fuonq bütün dörd qida qrupunu özündə birləşdirən sağlam, balanslı və qidalı səhər yeməyi tövsiyə edir: zülal (yumurta, süd, yağsız ət və lobya), mürəkkəb karbohidratlar (yulaf, qəhvəyi düyü, qarabaşaq yarması, bütün taxıl çörəyi, şirin kartof və qarğıdalı), sağlam yağlar (qoz-fındıq, meyvə və tərəvəz kimi).
Nubar Süleymanova, “İki sahil”
