“Cərimənin tətbiq olunması insanı hər hansı hüquqa zidd hərəkətdən çəkindirmək məqsədi daşıyır. O elə bir adekvat məbləğdə təyin olunur ki, insan onu dərk etsin ki, hüququ pozarsa, nə qədər maddi təzminat ödəməli olacaq”.
Bunu “Yeni Sabah”a Milli Məclisin Əmək və sosial siyasət Komitəsinin sədri Musa Quliyev bildirib.
Deputat qeyd edib ki, cərimələr hüquq pozuntularının qarşısını almaq üçün profilaktik tədbir kimi nəzərdə tutulur:
“Burada nə minimum əməkhaqqı, nə də şəxsin gəliri nəzərə alınır. Cərimənin tətbiq olunması insanı hər hansı hüquqa zidd hərəkətdən çəkindirmək məqsədi daşıyır. O elə bir adekvat məbləğdə təyin olunur ki, həmin insan onu dərk etsin ki, hüququ pozarsa, nə qədər maddi təzminat ödəməli olacaq. Bu mənada, cərimə hüquqpozmanın qarşısını almaqdan ötrü profilaktik tədbir kimi nəzərdə tutulur. Yəni hüququ pozduqdan sonra şəxsə cəza kimi nəzərdə tutulmur.
Əgər ikinci planda nəzərdə tutulsaydı, yəni hüququ pozduqdan sonra təyin olunan cəza kimi tətbiq edilsəydi, o zaman, bəli, minimum əməkhaqqı və orta aylıq əməkhaqqı nəzərə alınardı. Amma belə hallarda, cərimələr profilaktik məqsədlə bu məbləğdə təyin olunur ki, insanlar bilərəkdən mövcud qaydaları pozmasınlar”.
M. Quliyev diqqətə çatdırıb ki, cərimələr cəmiyyətdə bəzi mənfi hallarla bağlı önləyici mahiyyət də daşıyır:
“Məsələn, siqaret kötüyünün yerə atılması ilə bağlı tətbiq olunan cərimə həm də siqaret çəkmənin məhdudlaşdırılmasına yönəlmiş bir addımdır. Yəni siqaret çəkmək üçün ayrılmayan yerlərdə kimsə siqaret çəkirsə, təbii olaraq kötüyü təyin olunmamış yerə atacaq.
Eyni zamanda, uşaqların gözü qabağında siqaret çəkmək hər halda siqaretin gizli də olsa, reklamıdır. Bütün bunlar nəzərə alınaraq, yüksək məbləğdə cərimələr müəyyən olunur ki, profilaktik məqsədlə həm siqaret çəkmənin qarşısı alınsın, həm də ekologiya çirklənməsin”.
Xatırladaq ki, son illərdə Milli Məclisdə bir sıra sahələr üzrə cərimələr misli görünməmiş dərəcədə artıb. Əhalinin açıq narazılığı ilə qarşılanan bu artımlar zamanı hansı meyrın əsas götürüldüyü anlaşılmır.
