Beynəlxalq hüquq normalarına uyğun atılan addımlar
Beynəlxalq hüququn norma və prinsiplərinə hörmətlə yanaşan Azərbaycan Respublikası dünya ölkələri arasında ədalətli, bərabərhüquqlu münasibətlərin qurulması istiqamətində öz səylərini ardıcıl şəkildə ortaya qoyur. Yeni dünya nizamının daha sivil prinsiplər üzərində qurulması ilə bağlı təşkil olunan bir sıra mühüm tədbirlərə Azərbaycan dövləti fəal şəkildə qatılır. Müzəffər Ali Baş Komandan Cənab İlham Əliyevin uğurlu daxili və xarici siyasət kursu sayəsində ölkəmizin beynəlxalq aləmdəki nüfuzu ötən hər gün daha da yüksəlir. “Yeni dünya nizamına doğru” adlı beynəlxalq forumun Bakıda təşkil olunması dövlətimizin beynəlxalq hüquq prinsiplərinin qorunması istiqamətində növbəti uğurlu cəhdi idi.
9 aprel 2025-ci il tarixində ADA Universitetində keçirilən “Yeni dünya nizamına doğru” adlı beynəlxalq forumdakı çıxışında Azərbaycan Respublikasının Prezidenti Cənab İlham Əliyev dövlətimizə münasibətdə sərgilənən ədalətsiz münasibətlərlə bağlı bir cox vacib məqamlara toxundu. Dövlət başçımız bildirdi ki, bizim Avropa Şurasından gözləntilərimiz var idi. Lakin artıq Avropa İttifaqı ilə bağlı gözləntilərimiz ciddi şəkildə dəyişib. Avropa Məhkəməsinin heç bir qərarının bizim üçün hüquqi qüvvəsi yoxdur. 19 sentyabr 2023-cü il tarixidə Qarabağ iqtisadi zonasında keçirilmiş lokal antiterror əməliyyatlarının nəticəsində sonuncu separatçı ünsürlər də silahı yerə qoyaraq təslim oldular. Azərbaycan burada da bütün addımlarını beynəlxalq hüququn normalarına uyğun atdı. Qərb mediası elə bir ab-hava yaratmaq istəyirdi ki, guya Azərbaycanda demokratik təcrübə yoxdur.
ABŞ-ın yeni dünya nizamının qurulmasındakı roluna toxunan Cənab İlham Əliyev qeyd etdi ki, Prezident Trampın başladığı iş çox ümidvericidir, lakin o, dayanmamalıdır. Azərbaycanın İslam dünyasındakı rolu müsəlman icmaları tərəfindən yüksək qiymətləndirilir. Dövlət başçımız əlavə etdi ki, Almaniya Prezidentinin administrasiyası tərəfindən səfərdən əvvəl ləğv edilmiş qeyri-qanuni işğalçı rejimin bayrağının yerləşdirilməsi ilə bağlı vəziyyətə gəlincə təbii ki bunu görəndə hamımız təəccubləndik. Həmin bəyanatda o ifadənin yer almasını Azərbaycana qarşı təhqir hesab edirik. Almaniya Prezidentinin Azərbaycana ilk səfəri münasibətlərimizdə yeni, mühüm mərhələnin əsasını qoymuş oldu.
Azərbaycan üzv olduğu bir sıra təşkilatlarda da fəal mövqe nümayiş etdirir. Belə ki, ölkəmiz Şimali Kipr Türk Respublikasının Türk Dövlətləri Təşkilatına müşahidəçi qismində qatılmasında mühüm rol oynayıb. Cənab İlham Əliyevin qeyd etdiyi kimi: Şimali Kiprdə öz dövlətinə sahib olmağa layiq qardaşlarımıza necə kömək edə biləcəyimizdən başqa bir gündəmimiz yoxdur. Dünyada cərəyan edən son hadisələr fonunda Azərbaycanın da üzərində yerləşdiyi Orta Dəhlizin əhəmiyyəti artmaqdadır. Müasir qloballaşma şəraitində iqtisadi əməkdaşlıqla bağlı Türk dövlətlərinin atdığı addımlar dünya ictimaiyyəti tərəfindən də diqqətlə izlənilir. Əminliklə söyləmək olar ki, Orta Dəhliz ideyası ən yaxın zamanda reallaşacaq və bu layihə həm yeni dünya nizamına, həm də beynəlxalq aləmdə əməkdaşlığa mühüm töhfələr verəcək.
Elvin Əlizadə,
YAP Sumqayıt şəhər təşkilatının məsləhətçisi
