“Sümük sınıqları yıxılma, yol qəzaları, idman zədələri kimi səbəblərlə yarana bilər. Bu zədələrin növünü düzgün müəyyənləşdirmək, ona uyğun müdaxilə etmək sağalma müddəti və nəticə baxımından olduqca önəmlidir”.
AZƏRTAC xəbər verir ki, bu fikirləri Səhiyyə Nazirliyinin rəsmi İnstaqram hesabındakı canlı yayım zamanı nazirliyin Elmi-Tədqiqat Travmatologiya və Ortopediya İnstitutunun baş həkimi Nizami Məmmədov açıqlayıb.
Onun sözlərinə görə, sümük sınıqları eyni cür görünə bilər, amma onların orqanizmə təsiri fərqli olur: “Əgər zədə zamanı yalnız sümük sınır və ətrafdakı dəri toxunulmaz qalırsa, bu qapalı sınıq sayılır və daha yüngül gedişli bir haldır. Bu tip zədələrdə infeksiya riski minimumdur və müalicə daha sistemli aparılır. Lakin iç toxumalarda qanama və ya sinir zədələnməsi də ola bilər. Ona görə də bu tip zədələr də ciddi qəbul edilməlidir. Əgər sınmış sümük dəriyə qədər çataraq onu cırırsa və bəzən xaricə çıxacaq qədər irəliləyirsə, bu açıq sınıq sayılır və artıq ciddi təhlükə siqnalıdır. Belə hallarda yalnız sınığın bərpası deyil, eyni zamanda, mikrob və infeksiya ilə mübarizə də ön plana keçir”.
Nizami Məmmədov bildirib ki, açıq sınıqlar travmatologiyada təcili müdaxilə tələb edən hallardandır: “Vaxtında və düzgün şəkildə müdaxilə olunmazsa, açıq sınıq infeksiyanın sümüyə yayılması kimi ağır fəsadlarla nəticələnə bilər. Hər iki halda ilkin yardım çox vacibdir. Zədələnmiş ətraf sabit saxlanmalı, xəstə mümkün qədər az tərpədilməli və dərhal həkimə çatdırılmalıdır. Açıq sınıqlarda antiseptik tədbirlər, antibiotiklərlə infeksiya əleyhinə müalicə və bəzən cərrahi müdaxilə tələb oluna bilər. Qapalı sınıqlarda isə sınığın dərəcəsinə uyğun olaraq, gips və ya cərrahiyyə üsulları tətbiq edilir. Nəticə olaraq, sümük sınıqları, açıq və ya qapalığından asılı olmayaraq mütləq şəkildə mütəxəssis tərəfindən qiymətləndirilməlidir. Zədənin xaricdən görünməməsi onun yüngül olması demək deyil”.
Baş həkim sonda qeyd edib ki, məqsəd vaxtında müdaxilə ilə tam bərpa və uzunmüddətli fəsadların qarşısını almaqdır.
