Ana dilimiz hər bir xalqın varlığını, mənəviyyatını və tarixi köklərini ifadə edən ən mühüm milli dəyərdir. Dil yalnız ünsiyyət vasitəsi deyil, həm də bir millətin mənəvi sərvətini, dünyagörüşünü və mədəniyyətini yaşadan canlı abidədir. Azərbaycan dili də əsrlər boyu xalqımızın milli kimliyinin qorunmasında və milli müstəqillik uğrunda mübarizəsində əsas rəmzlərdən biri olmuşdur.
Azərbaycan xalqı tarixi boyunca çoxsaylı çətinliklərə, işğal və təzyiqlərə məruz qalsa da, ana dilimizi qorumaq və yaşatmaq uğrunda mübarizədən heç vaxt vaz keçməmişdir. XIX əsrdə milli oyanış dövründə maarifçilərimiz – Mirzə Fətəli Axundzadə, Həsən bəy Zərdabi və başqaları ana dilimizin inkişafını milli tərəqqinin əsas şərti kimi dəyərləndirirdilər. “Əkinçi” qəzetinin nəşri, ədəbi dilin formalaşdırılması və ana dilində maarifçilik ideyalarının yayılması xalqımızın milli özünüdərkinin güclənməsində mühüm rol oynadı.
XX əsrdə müstəqillik uğrunda mübarizə aparan ziyalılarımız da ana dilinə xüsusi önəm verirdilər. 1918-ci ildə Azərbaycan Xalq Cümhuriyyətinin dövlət dili kimi Azərbaycan türkcəsinin qəbul olunması tarixi bir hadisə idi. Bu qərar xalqımızın milli varlığını dünyaya bəyan etməsinin rəmzi oldu.
Sovet dövründə müxtəlif təzyiqlərə baxmayaraq, Azərbaycan dili xalqımızın kimliyini qoruyub saxladı. Ulu Öndər Heydər Əliyevin rəhbərliyi ilə 1978-ci il Konstitusiyasında Azərbaycan dilinə dövlət dili statusu verilməsi milli özünüdərkin möhkəmlənməsi baxımından mühüm addım idi. Müstəqilliyin bərpasından sonra isə Azərbaycan dili dövlətin və millətin əsas sütunlarından birinə çevrildi.
Bu gün ana dilimiz yalnız ünsiyyət vasitəsi deyil, həm də milli müstəqilliyimizin, milli qürurumuzun və dövlətçiliyimizin rəmzidir. Azərbaycan Respublikasının Konstitusiyasında Azərbaycan dilinə dövlət dili kimi xüsusi yer ayrılması, onun qorunması və inkişaf etdirilməsi istiqamətində görülən işlər dilimizin mövqeyini daha da möhkəmləndirir.
Nəticə olaraq, ana dilimiz milli kimliyimizin, azadlıq və müstəqilliyimizin təməl dayağıdır. Hər bir azərbaycanlı üçün onu qorumaq, öyrənmək və gələcək nəsillərə ötürmək müqəddəs vəzifədir. Çünki dilini yaşadan millət tarixdə silinməz iz buraxır və müstəqilliyini əbədi edir.
Elməddin Əsgərxanov. YAP Bərdə rayon təşkilatının sədr müavini.
