“Türk dünyasının mədəniyyət paytaxtı” adlı kitabın təqdimatı olacaq
Beynəlxalq Türk Mədəniyyəti Təşkilatının (TÜRKSOY) Türkiyə paytaxtında yerləşən baş katibliyinin binasında avqustun 1-də “Şuşa” kitabının təqdimatı olacaq. Türk dünyasının və Azərbaycanın mədəniyyət paytaxtı haqqında kitabın çapdan çıxmasına həsr olunmuş tədbirin keçirilməsinə Azərbaycan Mədəniyyət Nazirliyi və ölkəmizin Ankaradakı səfirliyi də dəstək göstərib.
TÜRKSOY-un Baş katibi Sultan Raevin adından göndərilən dəvətnamədə bundan əvvəl Türk dünyasının mədəniyyət paytaxtı elan edilmiş Şuşa şəhərinin tarixi əhəmiyyətinə diqqət yetirilir. Təşkilatın Baş katibi Şuşanı “Qarabağın tacı” və “Qafqazın incisi” adlandırır.
Elçin Əhmədov
Azərbaycan Respublikasının Prezidenti yanında Dövlət İdarəçilik Akademiyasının “Qarabağ İrsini Araşdırma Mərkəzi”nin rəhbəri, professor, siyasi elmlər doktoru, Şuşa şəhərində anadan olmuş Elçin Əhmədovun müəllifi olduğu kitabda Azərbaycanın maarifçilik beşiyi və mədəniyyət mərkəzi Şuşanın tarixi-mədəni irsi və strateji əhəmiyyətindən bəhs edilir. Qeyd edək ki, Türkiyədə nəşr edilən kitab, əziz və doğma Şuşa şəhəri işğaldan azad edildikdən sonra müəllif Elçin Əhmədovun müxtəlif məzmun və formatda 14-cü kitabıdır ki, bunlardan 10-u xarici ölkələrdə nəşr edilmişdir.
