Hadisə baş verən liseydə oğlu oxuyan Əməkdar artist: “Direktor dedi ki, şayiədir”
Əməkdar artist Aqşin Abdullayev övladının təhsil aldığı “İdrak” Liseyində silahlı insident baş verməsindən danışıb.
Musavat.com-a açıqlama verən sənətçi hadisə haqqında bu sözləri deyib:
“Yatmışdım, böyük qızım oyatdı ki, ata, liseydə güllələnmə var, Akifi götür gəl. Oğlum 5-ci sinifdə oxuyur. Halımızı təsəvvür edirsiniz? Corabsız qaçmışam. Özüm də bilmirəm ki, liseyə necə çatdım. Direktor bizə dedi ki, yalandır, şayiədir. Mən də uşağı götürüb çıxdım. Jurnalistlərə də dedim ki, yalandır, şayiədir. Sonra bəlli oldu ki, yalan deyilmiş. Videoda gülümsədiyim saniyələr var. Bunun səbəbi yanımda uşağımın olmasıdır ki, qorxmasın. İnsanlar səhv başa düşməsin”.
“Övladınız liseydə təhsilini davam etdirəcəkmi” sualına isə Əməkdar artist “Hələ bu haqda düşünməmişik. Sadəcə uşağı götürüb gəlmişəm. Direktorla da danışacağam ki, niyə dedi ki, yalandır. Ailəmlə birlikdə qərar verəcəyik”.
Qeyd edək ki, liseydə 10-cu sinif şagirdi 29 yaşlı müəllimini evdən gətirdiyi silahla güllələyib.
Könül İbrahim
Musavat.com
