Mikayıl Cabbarov: “Qanunsuz tikililərin leqallaşdırılması ehtiyatla aparılmalıdır”
“1991-ci ildən 2003-cü ilə qədər keçmiş Qarabağ münaqişə ilə bağlı çoxsaylı çətinliklər yaşanıb”.
Musavat.com-un əməkdaşı xəbər verir ki, bu fikirləri iqtisadiyyat naziri Mikayıl Cabbarov WUF13 çərçivəsində “Dünyada qeyri-rəsmi yaşayış məntəqələrinin və gecəqonduların mənzil təminatı üçün dəyişdirilməsi” adlı tədbirdə çıxışı zamanı bildirib.
Nazir Azərbaycanın tarixinə nəzər salaraq bildirib ki, 2003-cü ildən qaçqın və məcburi köçkünlərin problemləri tədricən həll olunmağa başladı:
“Qarabağ işğaldan azad edildikdən sonra isə “Böyük Qayıdış” Proqramı çərçivəsində məcburi köçkünlər yurdlarına qayıtmağa başladılar. Bu, mənzil təminatına düşən yükün azalmasına töhfə verir.
Yaxın zamanda bir sıra addımlar atılıb. Biz balanslı olmalıyıq. Vətəndaşların sosial ehtiyacları qorunmalıdır. Eyni zamanda hüquqi imtiyazlara diqqət etmək lazımdır”.
İqtisadi aspektlərdən danışan nazir qeyd edib ki, kölgə iqtisadiyyatının mövcudluğu ilə bağlı problemlər var:
“Qanunsuz tikililərin leqallaşdırılması ehtiyatla aparılmalıdır. Bəsit amnistiya qısamüddətli sosial problemləri həll etsə də, gələcəkdə kənd təsərrüfatı torpaqlarına, meşə sahələrinə, su ehtiyatlarına və kritik infrastruktur zonalarına təzyiqi artıra bilər.
7 il ərzində qeyri-rəsmi prosesləri leqallaşdırmağa başladıq. Beləliklə, artıq gəlirlər qeydiyyata alınır. Hesab edirəm ki, icmaları təqdim etməklə problemləri həll etmək olar”,-deyə M.Cabbarov vurğulayıb.
Nigar Həsənli
Musavat.com
