Azərbaycan dünyada minalarla ən çox çirklənmiş ölkələrdən biri hesab olunur. Ölkəmizin 11 660 kvadrat metr ərazisi mina və partlayıcı maddələrlə çirklənmiş vəziyyətdədir.
Publika.az xəbər verir ki, bunu Azərbaycan Respublikası Minatəmizləmə Agentliyinin (ANAMA) İdarə Heyətinin sədri Vüqar Süleymanov BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində “Münaqişədən sonrakı şəhər bərpası: Hümanitar minatəmizləmə fəaliyyətinin kritik rolu” adlı tədbirdə deyib.
O bildirib ki, hazırda torpaqlarımızda basdırılmış 1 milyondan çox mina və hərbi sursat irimiqyaslı yenidənqurma və tikinti-bərpa işlərinə ciddi şəkildə mane olur.
Mina çirklənməsinin insan amilinə və sosial həyata birbaşa mənfi təsirlərindən bəhs edən ANAMA sədri post-münaqişə dövründə çox sayda vətəndaşımızın bu bəlanın qurbanı olduğunu vurğulayıb:
“Mina təhlükəsinin insan həyatına təsiri olduqca ağırdır və münaqişədən sonra bir çox insan bu fəsadların qurbanına çevrilib. Bir mühüm amili mütləq qeyd etməliyik: humanitar minatəmizləmə əməliyyatları aparılmadan azad edilmiş ərazilərdə heç bir halda yenidənqurma və şəhərsalma layihələrinin icrası reallaşa bilməz. Çünki təhlükəsizlik bərpa prosesinin təməl şərtidir”.
