Bakıda qətl törətməkdə təqsirli bilinən 1986-cı il təvəllüdlü Vüqar Həsənovun cinayət işi üzrə məhkəmə prosesi keçirilib.
ARANTV.AZ teleqraf.com-a istinadən bildirir ki, Vüqar Həsənov tanışı Sabir Əbdüləzimovun atasının yas mərasimində iştirak etmək üçün digər tanışı İsa Sultanovla birlikdə 15 oktyabr 2017-ci il tarixdə, saat 14 radələrində Xətai rayonunda qurulmuş çadırın yanına gəlib.
Vüqar Həsənov Sabir Əbdüləzimova başsağlığı verdikdən sonra çadıra daxil olub və əvvəllər onunla eyni məhəllədə yaşamış tanışı Elşən Məmmədovla üzbəüz oturub. Söhbət zamanı Elşən Məmmədovun Allah və islam dininin müqəddəsləri barədə qeyri-etik ifadələr işlətməsini bəhanə gətirən Vüqar Həsənov onunla mübahisə edib.
Daha sonra yas çadırından kənarda davam etdirilən mübahisə zamanı Vüqar Həsənov bıçaqla Elşən Məmmədova hücum çəkib. Ətrafda olan şəxslərin onları ayırıb, aralarındakı davanın qarşısını almağa cəhd etmələrinə, Ramil Sərdarovun isə onun bıçaq olan əlindən tutaraq saxlamasına baxmayaraq, Vüqar Həsənov dostlarının əlindən çıxıb və Elşən Məmmədovla əlbəyaxa olub.
Vüqar Həsənov Elşən Məmmədovu öldürmək məqsədilə bıçaqla Elşən Məmmədovu vurub. Elşən Məmmədov aldığı xəsarətdən hadisə yerində ölüb.
İstintaq orqanı tərəfindən Vüqar Həsənovun barəsində Cinayət Məcəlləsinin 120.2.2-ci (xuliqanlıq niyyəti ilə adam öldürmə), 221.3-cü (silahdan və ya silah qismində istifadə olunan əşyalardan istifadə edilməklə törədilməsi zərər çəkmiş şəxsə zor tətbiq olunması ilə, yaxud özgənin əmlakının məhv edilməsi və ya zədələnməsi ilə müşayiət olunan xuliqanlıq törətmək) və 228.4-cü (qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə, milli geyim ləvazimatı hesab olunan ərazilərdə və ya ovçuluq peşəsi ilə bağlı olaraq soyuq silahı gəzdirmə) maddələri ilə ittiham elan edilib.
Bakı Ağır Cinayətlər Məhkəməsinin hökmü ilə Vüqar Həsənovun əməlində cinayət tərkibi olmadığı nəticəsinə gəlinnib, ona Cinayət Məcəlləsinin 120.2.2 və 221.3-cü maddələri ilə bəraət verilib.
Cinayət Məcəlləsinin 228.4-cü maddəsi ilə təqsirli bilinən Vüqar Həsənov 9 ay müddətinə azadlıqdan məhrum edilib.
Hökmdən narazı qalan prokuror apelyasiya protesti verib. Prokuror protestində Vüqar Həsənovun cəzasının ağırlaşdırılmasını istəyib.
Bakı Apelyasiya Məhkəməsinin qərarı ilə prokurorun protesti təmin olunmayıb.
Bu qərardan narazı qalan prokuror kasasiya protesti verib. Prokuror kasasiya protestində Bakı Apelyasiya Məhkəməsinin qərarının ləğv edilməsini, işin yenidən apelyasiya instansiyasına qaytarılmasını istəyib.
Prokurorun şikayətinə Ali Məhkəmədə hakim Fərhad Kərimovun sədrliyi ilə baxılıb. Prokurorun kasasiya protesti təmin olunub.
Bakı Apelyasiya Məhkəməsinin qərarı tamamilə ləğv olunub və işin yenidən apelyasiya instansiyasında araşdırılması barədə qərar qəbul edilib.
İş materialı yenidən araşdırılması üçün Bakı Apelyasiya Məhkəməsinə göndərilib. Apelyasiya protesti araşdırılması üçün hakim Mirzəli Abbasovun icraatına verilib.
Məhkəmənin ilkin baxış iclası yanvarın 12-nə təyin olunub.
Qeyd edək kiI, bundan əvvəl də bir dəfə bu cinayət işi üzrə qərar Ali Məhkəmə tərəfindən ləğv olunub və apelyasiya intansiyasında araşdırılması barədə qərar verilib.
Bakı Apelyasiya Məhkəməsi ikici dəfə də bəraət hökmünü qüvvədə saxlayıb.
Bu dəfə apelyasiya instansiyasında üçüncü araşdırma başlanacaq.
Məhkəmədən Teleqraf.com-a bildiriblər ki, şikayət yenidən araşdırılması üçün hakim Mirzəli Abbasovun icraatına verilib.
Məhkəmənin ilkin baxış iclası yanvarın 12-nə təyin olunub.
