Azərbaycanda bəzi ət xörəkləri süfrəyə qatıqla verilir, ət xörəklərini yeyəndə biz ayran, dovğa içirik. Sağlamlıq baxımından bu düzgün deyil.
Ət insan orqanizmin normal fəaliyyəti üçün ən vacib məhsullardan biridir. Ət orqanizmi aminturşular, vitaminlər, minerallarla təmin edir. Bu minerallardan ən vacib olanı dəmirdir. Dəmirin əsas hissəsini biz məhz ət məhsullarından alırıq.
ARANTV.AZ bildirir ki, dəmir insan orqanizmində olduqca böyük rol oynayır, oksigenin saxlanması və daşımasında iştirak edir. Oksigensiz insan orqanizmi yaşaya bilməz.
Bundan əlavə dəmir qanayaratma proseslərində iştirak edir, immun sisteminin normal fəaliyyəti üçün çox vacibdir, qalxanvari vəzi hormonların istehsalında, qaraciyərdə gedən proseslərdə (zəhərli maddələrin parçalanmasında və s.), DNT-ın sintezində və bir çox digər vacib proseslərdə iştirak edir. Dəmir xərçəng hüceyrələrinin inkişafını ləngidir. Orqanizmdə dəmirin çatışmazlığı ciddi pozulma sayılan anemiya xəstəliyinə (qanazlığı) səbəb olur.
Bəzi maddələr orqanizmdə dəmirin mənimlənilməsi proseslərini sürətləndirir (C, B qrupu vitaminləri və s.), digərləri isə əksinə pozur. Dəmirin mənimsənilməsini pozan maddələr arasında kalsium və fosfor da var. Süd məhsulları kalsium və fosforla zəngin olduğundan onların ətlə birlikdə qəbulu dəmirin mənimsənilməsinə mənfi təsir edir. Bu o deməkdir ki, ətlə birlikdə və ya ət xörəklərindən dərhal sonra istənilən süd məhsullarını qəbul etmək düzgün deyil.
Tək süd məhsulları deyil, çay və qəhvədə olan bəzi maddələr də dəmirin mənimsənilməsini pozur. Bu səbəbdən həkimlər ət xörəklərindən sonra çay və ya qəhvə içməyi tövsiyə etmirlər.
