Bakı Ağır Cinayətlər Məhkəməsində ləğv edilmiş Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) sabiq icraçı direktoru Vüqar Səfərli, müvafiq vəzifələrdə çalışmış Bünyamin İsmayılov, Ədalət Vəliyev, Nadir Məmmədov, Bəxtiyar Fətullayev, Təmkin Xəlilov, Telman Tahirov, Valeh Orucov, Təhminə Yaqubova, Şahin İbrahimov və Namiq Hacıyevin cinayət işi üzrə məhkəmə prosesi davam etdirilib.
ARANTV.AZ Trend-ə istinadən bildirir ki, hakim Azər Paşayevin sədrliyi ilə keçirilən prosesdə Vüqar Səfərlinin vəkilləri müdafiə çıxışı edib.
Vəkillər bildirib ki, ittihamda Vüqar Səfərlinin 17 milyon manat mənimsədiyi qeyd olunub, “Portos” MMC-nin adına olan mənimsəməni Vüqar Səfərlinin adına yazmaq düzgün deyil.
Daha sonra prosesdə müdafiə çıxışı edən təqsirləndirilən şəxs Nadir Məmmədovun vəkili Cavanşir Süleymanov isə bildirib ki, sözügedən cinayət işində əsas məsuliyyət Əli Həsənovun, onun oğlu Şamxal Həsənlinin və qohumu Gülər Vəliyevanın üzərinə düşür.
“Mən onların məhkəməyə çağırılması üçün vəsatət verdim. Dəfələrlə məhkəmədə ifadə verməli olduqlarını bildirdim. Buna baxmayaraq, vəsatətim rədd edildi. Mənimsəməni kim edib, pulu kim yeyibsə, o da gəlib ödəsin. Nadir Məmmədova gəlincə isə o, dəymiş ziyanın 50 faizini ödəyib. İndi bu pulu Əli Həsənov ödəyib, ya oğlu ödəyib, onun fərqi yoxdur. Xahiş edirəm ki, bu nüanslar nəzərə alınsın”, – deyə vəkil bildirib.
Prosesdə son söz deyən təqsirləndirilən şəxslər Təmkin Xəlilov, Şahin İbrahimov, Ədalət Vəliyev, Təhminə Yaqubova özlərini ittihamlardan təqsirli bilməyib və məhkəmədən ədalətli qərar qəbul olunmasını xahiş ediblər.
Təqsirləndirilən şəxslər Vüqar Səfərli, Nadir Məmmədov, Bəxtiyar Fətullayev və Namiq Hacıyev isə son söz üçün məhkəmədən vaxt istəyib.
Proses dekabrın 21-də davam etdiriləcək.
Qeyd edək ki, ləğv edilmiş Kütləvi İnformasiya Vasitələrinin İnkişafına Dövlət Dəstəyi Fondunun vəzifəli şəxslərinin qanunsuz əməllərinə dair Korrupsiyaya qarşı Mübarizə Baş İdarəsində aparılmış istintaq tədbirləri ilə Fondun sabiq icraçı direktoru Vüqar Səfərlinin müvafiq vəzifələrdə çalışmış Bünyamin İsmayılov, Ədalət Vəliyev, Nadir Məmmədov və digər 7 nəfər şəxslə qabaqcadan əlbir olub vəzifə səlahiyyətlərindən sui-istifadə edərək dövlət satınalmalarına dair qanunvericiliyin tələblərinin pozulması, dövlət vəsaitlərinin təyinatı üzrə istifadə edilməməsi, tikinti normalarına əməl olunmamaqla iş həcmləri və qiymətlərinin şişirdilməsi yolu ilə dövlətə məxsus ümumilikdə 18 milyon 500 min manat məbləğində pul vəsaitinin mənimsəmə və israf etmə yolu ilə talanmasına, rəsmi sənədlərə bilə-bilə yalan məlumatlar daxil etməklə vəzifə saxtakarlığı törədilməsinə, habelə cinayət yolu ilə əldə edilmiş 5 milyon 700 min manat pul vəsaitinin leqallaşdırmasına əsaslı şübhələr müəyyən edilib.
Toplanmış sübutlar əsasında Vüqar Səfərli və digərlərinə müvafiq olaraq Cinayət Məcəlləsinin 179.4 (mənimsəmə-xüsusilə külli miqdarda ziyan vurmaqla törədildikdə), 193-1.3.2 (cinayət yolu ilə əldə edilmiş pul vəsaitlərini leqallaşdırma-külli miqdarda törədildikdə), 308.2 (vəzifə səlahiyyətlərindən sui-istifadə etmə-ağır nəticələrə səbəb olduqda), 313 (vəzifə saxtakarlığı) və digər maddələri ilə ittiham elan edilib, Vüqar Səfərli və Nadir Məmmədov barəsində məhkəmənin qərarı ilə həbs, digər şəxslər barəsində isə polisin nəzarəti altına vermə qətimkan tədbiri seçilib.
İbtidai istintaq zamanı cinayətin törədilməsi nəticəsində vurulmuş maddi ziyanın bir hissəsinin ödənilməsi təmin edilmiş, habelə təqsirləndirilən şəxslərə məxsus olan daşınar və daşınmaz əmlak və bank əmanətlərinin üzərinə həbs qoyulub.
Cinayət işi üzrə Medianın İnkişafı Agentliyi (MEDIA) zərərçəkmiş qismində tanınıb.
