Qarşıdan gələn qəbul imtahanları abituriyentlər və onların valideynləri üçün həyəcanlı bir dövrün başlanğıcını bildirir. Statistikaya görə, son illərdə ölkənin ali təhsil müəssisələrinə qəbul olan tələbələrin sayında artım müşahidə olunur.
Belə ki, 2024-2025-ci tədris ili üçün ali təhsil müəssisələrinə 74 min nəfərdən çox şəxs qəbul olunub. 2005-ci və 2017-ci illərlə müqayisədə qəbul sayı müvafiq olaraq 2.2 dəfə və 1.7 dəfə artıb.
Bəs builki qəbul imtahanlarında hansı yeniliklər gözlənilir?
Musavat.com bildirir ki, təhsil eksperti Kamran Əsədov bu il qəbul imtahanlarında bəzi ixtisaslar üzrə keçid ballarının artacağını deyib.
Ekspert qeyd edib ki, bu il ali təhsil müəssisələrinə ərizə verənlərin sayı ötən illərlə müqayisədə çoxdur, bu isə qəbul prosesi zamanı ciddi rəqabətin yaranmasına səbəb olacaq:
“126 mindən çox şəxs bu il ali təhsil müəssisələrinin bakalavr pilləsinə qəbul olmaq üçün sənəd verib. Həmçinin 11-ci sinif bazasından kolleclərə sənəd verənlərin sayında keçən illərlə müqayisədə hədsiz ərizə artımı var. Təbii ki, bu rəqəmlər bu il keçirilən qəbul imtahanlarından sonra xüsusən 1-ci və 3-cü ixtisas qruplarında müsabiqə şərtlərinin müəyyən qədər gərginləşəcəyinin proqnozunu verməyə əsas yaradır.
Buraxılış imtahanlarında orta və yüksək bal toplayan abituriyentlərin çoxluğu da keçid ballarına təsir edəcək.
Bu il 1-ci ixtisas qrupunda informasiya texnologiyaları, kompüter mühəndisliyi və proseslərin avtomatlaşdırılması ixtisaslarında daha ciddi rəqabət olacaq. Xüsusən tədrisin ingilis dilində aparıldığı ixtisaslarda, İqtisad Universitetində, Bakı Ali Neft Məktəbində, həmçinin Neft və Sənaye Universitetinin tədrisi ingilis dilində aparılan IT ixtisaslarında biz balların keçən illə müqayisədə müəyyən qədər artmasını proqnozlaşdırırıq.
Həmçinin Qarabağ Universitetində tibbi ixtisasın yaradılması da bu ixtisas üzrə keçid ballarının artacağını göstərir”.
