Bağınızda pomidor yetişdirirsiniz, lakin məhsul uzun müddət yaşıl qalırsa, buna görə narahat olmağa dəyməz. Bitkiyə düzgün qayğı və elmi əsaslara söykənən sadə üsullarla qırmızı, şirəli və bol məhsul əldə etmək mümkündür. Pomidorların vaxtında və keyfiyyətli yetişməsi üçün nəzərə alınmalı olan əsas məqamları təqdim edirik.
İdeal temperatur: Nə çox isti, nə də çox soyuq…
Pomidorların yetişməsi, bitki daxilindəki fermentlərin fəaliyyəti ilə birbaşa əlaqəlidir. Kaliforniya Universitetində aparılan araşdırmalara görə, bu fermentlərin optimal işləməsi üçün ideal temperatur 21–27°C aralığıdır. 30°C-dən yuxarı temperatur fermentlərin funksiyasını itirməsinə, 15°C-dən aşağı temperatur isə yetişmə prosesinin ciddi şəkildə ləngiməsinə səbəb olur.
Soyuq bölgələrdə bağbanlar istilik, küləkdən qoruyan örtüklər kimi vasitələrdən istifadə etməklə bitkilərin temperatur rejimini tənzimləyə bilərlər.
Azotun miqdarına diqqət yetirin
Torpaqda azotun həddindən artıq olması bitkinin yarpaq və gövdəsinin həddindən artıq böyüməsinə səbəb olur. Bu halda meyvə əmələ gəlməsi zəifləyir və pomidorlar yaşıl qalır. Problemin qarşısını almaq üçün:
Azotlu gübrə istifadəsini məhdudlaşdırın, torpaq nümunəsini təhlil etdirərək azot səviyyəsini nəzarətdə saxlayın.
Əsas qidalandırıcı maddələr: Fosfor, kalium və kalsium
Pomidor bitkilərinin sağlam inkişafı və keyfiyyətli məhsul verməsi üçün fosfor, kalium və kalsium böyük rol oynayır. Bu maddələrin çatışmazlığı yetişmənin ləngiməsinə və meyvə formalarının pozulmasına səbəb ola bilər. Bu məqsədlə fosfor və kalium əsaslı gübrələr tətbiq oluna bilər. Təbii alternativlər də təsirli nəticə verə bilər:
Odun külü – kalium baxımından zəngindir
Banan qabığının ekstraktı – qida dəyəri yüksək təbii mayedir
Əzilmiş yumurta qabıqları – kalsium əlavə etmək üçün idealdır
Günəş işığı və kölgədən qorunma
Pomidorların yetişməsi üçün günəş işığı vacibdir. Əgər bağçanızda ağaclar və ya tikililər kölgə salırsa, pomidor şitillərinizi daha günəşli əraziyə köçürmək tövsiyə olunur. İşıq çatışmazlığı yetişmənin ləngiməsinə səbəb ola bilər.
Budama: Məhsuldarlığın açarı
Pomidor bitkilərində düzgün budama məhsuldarlığın artırılması və meyvəyə yönəlmiş enerji istifadəsi baxımından mühüm rol oynayır. Xüsusilə, ana gövdə ilə yarpaq arasında yaranan yan budaqlar bitkinin enerjisini tükədərək məhsulun azalmasına səbəb ola bilər. Bu budaqların vaxtında kəsilməsi tövsiyə olunur.
Pomidor yetişdirmək həm zövqlü, həm də bəzi qaydalara əməl olunduqda olduqca məhsuldar bir prosesdir. Temperatur rejiminə riayət etmək, torpaq balansını qorumaq, düzgün gübrələmə və budama ilə yaşıl pomidorlarınız qısa müddətdə parlaq qırmızı, şirəli məhsula çevrilə bilər. Qeyd olunan təbii vasitələrlə də məhsuldarlığı artırmaq mümkündür.
Orxan Vahidoğlu, “İki sahil”
