Avstriyada məşhur “Hipp” markalı uşaq qidaları ilə bağlı yaşanan zəhərlənmə qalmaqalı dünya gündəmini zəbt edib.
Musavat.com xəbər verir ki, Avstriyanın Burgenland federal ərazisində laborator analizlər nəticəsində bəzi uşaq pürelərində siçan zəhəri izləri aşkar olunub.
Hadisənin miqyası genişlənərək Sloveniya, Macarıstan, Norveç və İtaliya daxil olmaqla ümumilikdə 1500 supermarketə yayılıb və məhsullar təcili geri çağırılıb. Aparılan ilkin araşdırmalar göstərir ki, bankaların qapaqları zədələnib və alt hissəsində qırmızı dairə işarələri qoyulub. İstehsalçı şirkət bunun istehsal xətası deyil, paylanma zəncirində baş vermiş “kənar müdaxilə” və təxribat ola biləcəyini bəyan edib.
Mövzu ilə bağlı Azərbaycan Qida Təhlükəsizliyi Agentliyi (AQTA) dərhal araşdırmalara başlayıb.
Agentlikdən verilən rəsmi məlumata görə, Avstriyada aşkarlanan uyğunsuzluq faktı kriminal xarakter daşıyır. Sevindirici hal budur ki, zəhər aşkarlanan 190 qramlıq xüsusi qablaşdırmadakı məhsullar Azərbaycana idxal edilməyib:
“Mediada “Hipp” əmtəə nişanlı uşaq qidası bankalarında siçan zəhəri aşkarlanması ilə bağlı yayılan məlumatlar Qida Təhlükəsizliyi Agentliyi tərəfindən araşdırılıb.
Sözügedən uyğunsuzluq faktı Avstriyada qeydə alınıb. Məsələ həmin ölkənin hüquq-mühafizə orqanları tərəfindən kriminal hal kimi araşdırılır. Belə ki, məhsulların bəzilərində qablaşdırmaya müdaxilə edildiyi ehtimal olunur. Bu da hadisənin istehsal mərhələsində deyil, paylanma və ya pərakəndə satış zəncirində qəsdən törədilmiş təxribat xarakterli olduğunu göstərir.
Bildiririk ki, uyğunsuzluq aşkarlanan məhsul 190 qramlıq qablaşdırmada məhdud sayda istehsal olunub və həmin çəkidə olan məhsullar Azərbaycana idxal edilməyib.
Hazırda digər qablaşdırmada satışı həyata keçirilən məhsullar isə ölkəyə idxal olunarkən, müvafiq şəkildə yoxlandıqdan sonra dövriyyəsinə icazə verilib. Bununla belə məsələnin həssaslığı və mediada yayılmasını nəzərə alaraq Agentliyin müfəttişləri tərəfindən satışda olan həmin məhsullardan təkrar nümunələrin götürülməsi nəzərdə tutulur. Nəticələr barədə ictimaiyyətə məlumat veriləcək”.
