““Azəriqaz” İB-də rəqəmsallaşma xidmət keyfiyyətini artırmaq, operativliyi təmin etmək və idarəetməni təkmilləşdirmək məqsədi daşıyır.
Bu prosesdə əsas prioritet daxili proseslərin rəqəmsallaşdırılması, xidmətlərin elektronlaşdırılması və vahid idarəetmə sisteminin qurulmasıdır”.
Musavat.com xəbər verir ki, bunu “Azəriqaz” İstehsalat Birliyinin bu gün Naxçıvan Muxtar Respublikasına təşkil etdiyi media-tur çərçivəsində keçirilən brifinqdə “Naxçıvan” RQİİ-nin Müştəri xidmətləri şöbəsinin rəisi Qənbər Qənbərov deyib.
O bildirib ki, bu çərçivədə veb və mobil versiyalı yeni proqram təminatı tətbiq olunub: “Artıq sahə işləri, müştəri xidmətləri, kommersiya əməliyyatları və şəbəkə idarəçiliyi vahid platforma üzərindən idarə edilir. Bu isə nəzarəti gücləndirir, məlumatların mərkəzləşdirilməsini və qərarvermənin sürətlənməsini təmin edir. Rəqəmsallaşma əsasən dörd istiqaməti əhatə edir: müştəri xidmətləri, kommersiya, şəbəkə və sahə işləri”.
Müştəri xidmətləri sahəsində bir çox xidmətlərin rəqəmsallaşdırıldığını deyən Q.Qənbərov deyib ki, texniki şərtlərin verilməsi, borcun olmaması barədə arayışların təqdim edilməsi, müqavilələrin bağlanması və müraciətlərin qeydiyyatı artıq elektron qaydada həyata keçirilir: “Bütün müraciətlər vahid platformada qəbul olunur və bu, proseslərin şəffaf izlənməsini və vaxtında icrasını təmin edir. Müxtəlif kanallardan daxil olan müştəri müraciətlərinin idarə olunması üçün vahid CRM sistemi yaradılıb. Sistem icra müddətlərini izləyir və gecikmə olduqda məsul şəxslərə avtomatik bildirişlər göndərir. Bu da nəzarəti və işin səmərəliliyini artırır. Həmçinin “myGov” və “m10” platformaları üzərindən elektron xidmətlər genişləndirilib. Vətəndaşlar sənədləri onlayn əldə edə və “SİMA İmza” ilə rəqəmsal şəkildə imzalaya bilirlər” .
