Heyvan bazarlarında tətbiq edilən yeni baytarlıq-sanitariya qaydaları və identifikasiya tələbləri qida təhlükəsizliyi məsələsini yenidən gündəmə gətirib. Bu dəyişikliklər həm heyvanların sağlamlığına nəzarətin gücləndirilməsi, həm də istehlakçıların qorunması baxımından əhəmiyyətli hesab olunur. Əsas sual isə ondan ibarətdir ki, bu qaydalar hansı risklərin qarşısını alır və vətəndaşlar üçün nə kimi üstünlüklər yaradır.
Məsələ ilə bağlı Demokrat.az-a açıqlama verən qida eksperti İlkin Şirinov bildirib ki, heyvan bazarlarında tətbiq edilən baytarlıq və sanitariya qaydaları insanların daha təhlükəsiz qida əldə etməsinə xidmət edir.
“Bu qaydalar bazarlara xəstə heyvanların çıxarılmasının qarşısını alır, nəzarətsiz ət satışını məhdudlaşdırır və zoonoz xəstəliklərin, bruselyoz, qarayara və digər infeksiyaların bazardan insanlara, yəni qida vasitəsilə yayılmasının qarşısını alır. Ümumilikdə, bu tədbirlər “fermerdən süfrəyə” qədər olan zəncirdə məhsulun təhlükəsiz şəkildə istehlakçıya çatdırılmasını təmin edir. Əsas məqsəd heyvan mənşəli məhsulların sağlam və nəzarətli formada insanlara təqdim olunmasıdır”.
Ekspert bildirib ki, digər tərəfdən, bəzi hallarda fermer məhsullarının qeyri-qanuni yollarla satışına da rast gəlinir.
“Bu zaman baytarlıq nəzarəti həyata keçirilmir, heyvanların saxlanma şəraiti və sağlamlıq vəziyyəti yoxlanılmır. Bəzi hallarda heyvanlar bazarlardan keçmədən birbaşa satış nöqtələrinə çıxarılır. Bu isə ətin üzərində baytarlıq ştampının olmaması və müayinə prosesindən kənarda qalması deməkdir. Bütün bunları nəzərə aldıqda, baytarlıq və sanitariya qaydalarının tətbiqi birbaşa insanların sağlamlığının qorunmasına xidmət edir. Nəticə etibarilə, süfrəmizə gələn heyvan mənşəli məhsulların təhlükəsizliyi yalnız bu nəzarət mexanizmləri vasitəsilə təmin oluna bilər”.
