Türkiyədə hava şəraiti kəskin dəyişir. Sinoptiklərin son proqnozlarına görə, temperatur yaxın günlərdə 6-10 dərəcə enəcək, güclü yağış və külək gözlənilir.
“Yeni Sabah” xəbər verir ki, Türkiyə ərazisində hava temperaturunun kəskin şəkildə aşağı düşəcəyi gözlənilir. Son hava proqnozlarına əsasən, temperaturun mövsüm normalarından 6-10 dərəcə aşağı enəcəyi bildirilir. Türkiyənin Meteorologiya Baş İdarəsi güclü yağıntı və küləklə bağlı xəbərdarlıq edib.
Həftəsonu ölkə ərazisində soyuq və yağıntılı hava şəraitinin üstünlük təşkil edəcəyi proqnozlaşdırılır. Temperaturun ən azı çərşənbə gününə qədər mövsüm normalarından aşağı qalacağı gözlənilir.
Xüsusilə ölkənin qərb bölgələrində temperaturun hiss olunacaq dərəcədə – 6-10 dərəcə azalacağı bildirilir. Günorta saatlarından etibarən göy gurultulu leysan yağışlarının təsirli olacağı ehtimal olunur.
Ümumilikdə ölkə ərazisində hava dəyişkən buludlu olacaq. Mərmərə, Daxili Egey, Aralıq dənizi bölgəsi, Mərkəzi Anadolu, Qara dəniz, Şərqi Anadolu və Cənub-Şərqi Anadolunun şimal və şərq hissələri, eləcə də Şanlıurfanın şərqində yağıntılı hava gözlənilir.
Yağıntılar əsasən yağış və leysan şəklində olacaq. Cənub və daxili bölgələrdə isə göy gurultulu yağış ehtimalı var. Qərbi və Mərkəzi Qara dənizin daxili yüksək ərazilərində, Mərkəzi Anadolunun şimalında və Şimali Egey bölgəsinin yüksək yerlərində sulu qar və qar yağacağı gözlənilir.
Bəzi bölgələrdə yağıntıların daha güclü olacağı proqnozlaşdırılır. Bu ərazilərə Mərkəzi Anadolunun şərqi, Şərqi Aralıq dənizinin daxili hissələri, Burdurun şərqi, Antalyanın daxili rayonları, Sparta, Ordu, Tokat, Tunceli, Bingöl, Muş, Bitlis, Siirt, Batman ətrafı, həmçinin Konyanın qərbi, Samsunun şərqi və Diyarbakırın şimal-şərq hissələri daxildir.
