“Azərbaycan Silahlı Qüvvələrinin 108-ci ildönümü münasibətilə qardaş Azərbaycan xalqını və rəşadətli Azərbaycan Ordusunu ürəkdən təbrik edirəm. Son illərdə Azərbaycan Ordusu yalnız hərbi gücü ilə deyil, həm də yüksək peşəkarlığı, intizamı, vətən sevgisi, qəhrəmanlığı və müasir döyüş qabiliyyəti ilə bütün dünyaya özünü sübut etmişdir”.
Bu sözləri Musavat.com-a açıqlamasında ehtiyatda olan türkiyəli general Yücel Karauz deyib. Türkiyəli general qeyd edib ki, 44 günlük Vətən müharibəsində əldə edilən tarixi Zəfər və 2023-cü ildə ölkənin bütün ərazisində suverenliyin tam bərpası Azərbaycan xalqının milli iradəsinin, dövlət rəhbərliyinin qətiyyətinin və ordunun gücünün təntənəsidir:“Arzum budur ki, Azərbaycan Ordusu daim güclənsin, xalqı isə sülh, rifah və təhlükəsizlik içində yaşasın. Şəhidlərə Allahdan rəhmət, qazilərə cansağlığı diləyirəm. Azərbaycanın güclü ordusu bütün Türk dünyasının qürur mənbəyidir”.
Yücel Karauz Azərbaycan Ordusunun son illərdə keçdiyi inkişaf yolundan da danışıb:”Azərbaycan Ordusunun son illərdə keçdiyi inkişaf yolu dünyanın ən uğurlu hərbi transformasiya nümunələrindən biridir. Bu inkişaf yalnız yeni silahların alınması ilə məhdudlaşmayıb. Komando birliklərinin yaradılması, peşəkar şəxsi heyətin hazırlanması, xüsusi təyinatlı qüvvələrin gücləndirilməsi, pilotsuz uçuş aparatlarının effektiv istifadəsi, şəbəkə əsaslı döyüş idarəetmə sistemi və müasir hərbi təlim konsepsiyaları ordunun keyfiyyət baxımından tamamilə yeni mərhələyə yüksəlməsini təmin edib. Ən önəmlisi isə odur ki, Azərbaycan Ordusu real döyüş şəraitində öz imkanlarını sübut etmiş və qazandığı təcrübəni sonrakı islahatlara uğurla inteqrasiya etmişdir”.
Türkiyəli general həmçinin vurğulayıb ki, Azərbaycan ilə Türkiyə arasındakı hərbi əməkdaşlıq artıq klassik müttəfiqlik çərçivəsini aşaraq strateji təhlükəsizlik tərəfdaşlığı səviyyəsinə yüksəlib: ‘Birgə hərbi təlimlər, müdafiə sənayesi sahəsində əməkdaşlıq, hərbi təhsil proqramları, kəşfiyyat mübadiləsi və qarşılıqlı təcrübə paylaşımı iki ölkənin silahlı qüvvələrinin yüksək uyğunluğunu təmin edib. Xüsusilə Şuşa Bəyannaməsi bu əməkdaşlığı hüquqi və siyasi baxımdan daha da möhkəmləndirərək regionda sabitliyin əsas sütunlarından birinə çevirmişdir.
“Bir millət, iki dövlət” prinsipi hərbi sahədə konkret və praktik məzmun qazanmışdır. Bu gün Azərbaycan və Türkiyə ortaq təlimlər keçirir, eyni hərbi standartlardan istifadə edir, müdafiə sənayesi layihələrində birlikdə çalışır, zabit hazırlığında qarşılıqlı əməkdaşlıq edir və regional təhlükəsizlik məsələlərində ortaq mövqe nümayiş etdirirlər. Ən vacib məqamlardan biri isə qarşılıqlı etimaddır. İki ölkənin təhlükəsizliyi artıq bir-birini tamamlayan vahid strateji təhlükəsizlik anlayışı çərçivəsində qiymətləndirilir. Bu model Türk dünyasında gələcək təhlükəsizlik əməkdaşlığı üçün də nümunə hesab edilə bilər”.
Yücel Karauzun fikrincə, 44 günlük Vətən müharibəsi müasir hərb tarixində dərindən öyrənilən əməliyyatlardan biridir: “Azərbaycan Ordusu klassik manevr müharibəsini pilotsuz sistemlər, yüksək dəqiqlikli zərbə vasitələri, elektron mübarizə imkanları və real vaxt kəşfiyyatı ilə uğurla birləşdirərək müasir döyüş konsepsiyasının effektiv nümunəsini nümayiş etdirdi. Lakin qələbənin əsas səbəbi yalnız texnologiya deyildi. Əsgərlərin və zabitlərin yüksək mənəvi hazırlığı, vətən sevgisi, qəhrəmanlığı, güclü liderlik, peşəkar planlaşdırma və xalq–ordu birliyi bu uğurun əsas təməlini təşkil etdi. Bu təcrübə göstərdi ki, müasir müharibələrdə texnologiya nə qədər vacib olsa da, onu uğura çevirən əsas amil insan faktoru, milli birlik və strateji rəhbərlikdir. Azərbaycan Ordusunun qazandığı bu təcrübə bu gün bir çox ölkənin hərbi akademiyalarında və strateji araşdırma mərkəzlərində öyrənilən nümunələr sırasında yer alır”.
