Şahmatçılarımız Serbiyanı darmadağın etdi
Bu gün Gürcüstanın Batumi şəhərində keçirilən 43-cü Ümumdünya Şahmat Olimpiadasında son gündür.
ARANTV.AZ xəbər verir ki, XI turda medal şansını itirmiş kişi millimiz Serbiya ilə qarşılaşıb.
Ardıcıl dörd görüşdə qələbə üzünə həsrət qalan millimiz turnirdə qapını bərk çırpıb. Belə ki, Şəhriyar Məmmədyarovun oynamadığı turda millimiz 4:0 qalib gəlib.
Teymur Rəcəbov Duşan Popoviçdən, Arkadi Naydiç Miloş Roqanoviçdən, Rauf Məmmədov Marko Neneziçdən, Eltac Səfərli Velimir İviçdən üstün olub. Bununla da millimiz turniri 15 xalla başa vurub.
Medal şansı qalan qadın millimiz isə Vyetnamla 2:2 edib. Günay Məmmədzadə Ti Kim Punq Voya qalib gəlib. Zeynəb Məmmədyarova Le Tao Nquyen Famla, Gülnar Məmmədova Ti Bao Tram Hoanqla heç-heçə edib. Ülviyyə Fətəliyeva isə Ti Mai Hunq Nquyenə uduzub.
Bununla da qadın millimiz turniri 16 xalla başa vurub. Komandamızın neçənci sıranı tutduğu bütün görüşlər başa çatdıqdan sonra bilinəcək. oxu.az
