Taleyinə əbədilik qələbə qisməti yazılan Lider!
Dünya siyasətçiləri arasında dövlətçilik təcrübəsi ilə fərqlənən Prezident İlham Əliyev siyasi müstəvidə, döyüş meydanında qazandığı uğurlarla bu adı şəxsiyyətində əbədiləşdirdi
2003-ü ildə keçirilən prezident seçkilərində seçicilərin 76 faizdən çoxunun etimadını qazanan, andiçmə mərasimində, mətbuata müsahibələrində hər kəsin Prezident olacağını, ona özü qədər inandığını xalqına müraciəti ilə bildirən atası ulu öndər Heydər Əliyevin layiqli davamçısı olacağını vurğulayan Prezident İlham Əliyev özü dediyi kimi nə məsuliyyətdən, nə də çətinliklərdən qorxdu. Andiçmə mərasimində xalqına vəd etdiyi sözlərini qətiyyəti, cəsarəti, xalq-iqtidar birliyi sayəsində doğrultdu.
Ulu öndər Heydər Əliyevin arzusunda olduğu Azərbaycanı dünyaya günəş kimi təqdim etmək üçün bu vəzifələri yerinə yetirmək böyük məsuliyyət, cəsarət, dövlətçilik təcrübəsi tələb edirdi. Ötən 17 il ərzində qəbul olunan Dövlət proqramlarını reallaşdırmaqla, həyata keçirilən islahatlarla qarşıya qoyulan vəzifələri yerinə yetirən Prezident İlham Əliyevin güvənc yeri xalq-iqtidar birliyi, insanların ona sonsuz etimad və məhəbbəti idi. Ötən illərdə keçirilən prezident seçkilərində qalib gələrək seçicilərin əksəriyyətinin səsini qazanan cənab İlham Əliyevə sonsuz xalq məhəbbətinin təməlində dövlət başçımızın həyata keçirdiyi uğurlu daxili və xarici siyasətə inam dururdu. Bu inamı çoxşaxəli islahatları, xüsusilə regionlarda həyata keçirilən infrastruktur layihələri, təhsilə, səhiyyənin inkişafına göstərdiyi diqqət ilə imza atan Prezident İlham Əliyevin regionlara səfərləri bölgələrimizin inkişafını daha da sürətləndirdi. Yeni iş yerlərinin açılması təmin olundu.
Qəbul olunan Dövlət proqramlarının əsasını təşkil edən regionların yeni, müasir formada tərəqqisi sahibkarlığın inkişafını sürətləndirdi. Fermer təsərrüfatlarının, emal müəssisələrinin yaradılması ilə yeni iş yerləri, təbii sərvətlərimizdən səmərəli istifadə imkanları yaradıldı. Ən müasir tələblərə cavab verən fabrik və zavodların yaradılması, xarici investorların iştirakı ilə sənaye müəssisələrinin açılması ölkəmizə əlavə investisiyalar qazandırdı. Azərbaycanın xarici bazarlarda mövqeyi möhkəmləndi. Əhalinin ərzaq və sənaye mallarına tələbatının yerli istehsal, daxili bazarlar hesabına ödənilməsi ilə kənd sakinlərinin ailə büdcəsində artımlar yarandı, insanların sosial təminatı yaxşılaşdı. Bütün şəhərlərdə, rayonlarda, kəndlərdə infrastruktur müasir tələblər səviyyəsində formalaşdı. Regionlarda qazlaşdırma prosesi davam etdirildi. İqtisadiyyatın , sənayenin və əhalinin təbii yanacağa, enerjiyə olan tələbatı tam yerinə yetirildi. Hazırda ölkə üzrə qazlaşdırmanın 100 faizə yaxınlaşması, yeni yaradılan elektrik stansiyaları hesabına enerji ilə təminatın tam ödənilməsi ölkədə davam etdirilən düzgün siyasətin nəticəsidir. Hər il magistral, kənd və şəhərlərarası yolların, körpülərin, keçidlərin salınması, bərpa olunması insanların daha rahat yaşaması naminə görülən işlərdir. Azərbaycanın yol-infrastruktur göstəricisinə görə dünyanın tanınmış maliyyə təşkilatlarının hesabatlarında qabaqcıl yerləri tutması respublikada aparılan siyasətə beynəlxalq səviyyədə verilən qiymətdir.
İqtisadiyyatın inkişafı sayəsində həyata keçirilən sosial islahatlar birbaşa əhalinin həyat tərzinin yaxşılaşmasına təsir edir. Son illərdə ölkədə həyata keçirilən əmək haqqı siyasəti, sosial islahatların genişlənməsi nəticəsində vətəndaşların əmək haqları, pensiyalar, tələbələrin təqaüdləri bir neçə dəfə artırılıb. Bu sahədə MDB dövlətləri arasında liderlik edən Azərbaycan təbii fəlakətlər nəticəsində zərər çəkən insanlara vurulan ziyanı dövlət hesabına ödəyən, qayğı göstərən yeganə ölkədir.
Azərbaycanın təşəbbüsü ilə reallaşan enerji və nəqliyyat layihələrinə qoşulanların sayı artır
Dövlətimizə başçılıq etdiyi son 17 ildə neft strategiyasının inkişafını diqqətdə saxlayan Prezident İlham Əliyevin təşəbbüsləri ilə əsası Ulu Öndər tərəfindən qoyulan qlobal enerji layihələrinin əhatə dairəsi genişləndirildi. Dövlət başçımızın təşəbbüslərinin reallaşması sayəsində Azərbaycan dünyanın enerji və nəqliyyat xəritəsini yenilədi. Neft –qaz kəmərləri şaxaləndi, layihələrin coğrafiyası genişləndi. Bakı-Tbilisi-Ceyhan, Bakı-Tbilisi-Ərzurum neft –qaz layihələrinin ardıcılları olan Cənub Qaz Dəhlizi, TANAP, TAP layihələrinə qoşulanların sayı artdı. Azərbaycanın təşəbbüsü ilə iki və dördtərəfli əməkdaşlıq formatı yaradıldı. Ölkəmizə artan maraq bölgədə sabitliyə etibarlı təminat yaratdı. Bu təşəbbüslər respublikamıza siyasi, iqtisadi dividend qazandırmaqla, dünyada mövqelərimizi də möhkəmləndirir. Enerji, nəqliyyat layihələri ilə Avropanın enerji təminatını ödəyən Azərbaycana beynəlxalq səviyyədə göstərilən dəstək, investisiya axını eyni zamanda ölkə iqtisadiyyatının inkişafını da sürətləndirdi. Ulu Öndər Heydər Əliyevin təşəbbüsü ilə başlanılan Tarixi İpək Yolunun bərpası, yeni istiqamətlər üzrə davam etdirilməsi, Bakı-Tbilisi-Qars dəmir yolunun çəkilişi ilə Çindən- Londona qədər uzaq məsafənin qısa müddətdə qət olunması Prezident İlham Əliyevin qətiyyəti sayəsində mümkün olmuşdur.
Azərbaycanın Ermənistan üzərində qələbəsi, Rusiya, Azərbaycan, Ermənistan arasında imzalanan Bəyanatda yer alan bəndlərin hər biri özlüyündə tarixi əhəmiyyət daşısa da, bəzi məsələlər xüsusilə diqqət əçkir. Görüləcək işlər arasında daha çox maraq doğuran, tarixi əhəmiyyəti ilə seçilən və Prezident İlham Əliyevin qətiyyətinin ifadəsi olan 9-cu maddədə əksini tapan, Azərbaycanı beynəlxalq aləmlə birləşdirən yolun bərpası daha əhəmiyyətlidir. Bəyanatın doqquzuncu bəndinə əsasən, Azərbaycanın digər rayonları ilə Naxçıvan Muxtar Respublikasını birləşdirən yeni nəqliyyat kommunikasiyalarının inşası davam etdiriləcək. «Bu 9-cu bənd sırf mənim təkidim nəticəsində Bəyanata salınmışdır. Çünki uzun illər müzakirə olunan sülh planında belə açıq-aydın müddəa yox idi. Yəni, nəzərə alınırdı ki, bütün kommunikasiyalar açılacaqdır və Naxçıvan Muxtar Respublikası ilə Azərbaycanın əsas hissəsini birləşdirən dəhliz haqqında söz getmirdi. Hesab olunurdu ki, bu ümumi ifadə bunu ehtiva edir. Burada isə konkret göstərilirdi ki, Naxçıvan Muxtar Respublikası ilə Azərbaycanın əsas hissəsi arasında dəhliz yaradılır… Bu bizim tarixi nailiyyətimizdir. Biz Naxçıvanı həm mühasirədən çıxarırıq, eyni zamanda yeni bir nəqliyyat damarını açırıq. Deyə bilərəm ki, bütün ölkələr buradan ancaq faydalanacaq. Azərbaycan öz ayrılmaz hissəsi olan Naxçıvanla birləşir, Azərbaycan Türkiyə ilə birləşir» söyləyən Prezident İlham Əliyev liderlik qətiyyətini bir daha təsdiqlədi, ölkələri birləşdirən tarixi yolun bərpasına müəlliflik imzasını atdı.
Azərbaycanın xarici siyasəti əməkdaşlıq formatı üçün zəngin təcrübədir
Sivilizasiyalararası mərkəzə çevrilən Azərbaycan multikultural mərkəz, tolerant ölkə olduğunu dünya birliyinə yönələn sabitlik, qarşılıqlı hörmət çağırışları ilə təsdiqləyib. Təmsil olunduğu beynəlxalq təşkilatlarda iştirakı, verdiyi vədlərə sadiqliyi ilə dünya siyasətində mövqeyi möhkəmlənən, hörmət , etimad qazanan Azərbaycanda təşkil olunan humanitar tədbirlər, Ümumdünya Dini liderlərinin Zirvə görüşləri, «Bakı prosesi», NATO ilə Rusiya hərbçilərinin görüşlərinin Bakıda keçirilməsi, hazırda Qoşulmama Hərakatına, Türkdilli Dövlətlərin Əməkdaşlıq Şurasına sədrlik etməsi Prezident İlham Əliyevin siyasi iradəsinin təcəssümü, siyasi . iqtisadi, diplomatik səylərinin nəticəsidir.
Ordu quruculuğunun məntiqi nəticəsi: Torpaqlarımız işğaldan azad olundu
Azərbaycanın xarici siyasətinin əsasını təşkil edən Dağlıq Qarabağ münaqişəsinin həlli, torpaqlarımızın işğaldan azad olunması Prezident, Ali Baş Komandan İlham Əliyevin siyasi iradəsi, qətiyyəti sayəsində həllini tapdı. 44 günlük müharibədə ordu quruculuğu istiqamətində aparılan islahatların, gərgin fəaliyyətin məntiqi nəticəsi olan Qələbəmiz, Zəfər paradı ölkəmizin müdafiə qüdrətini, gücünü dünyaya bəyan etdi. Diplomatik uğurlarını döyüş meydanında təsdiqləyən Prezident İlham Əliyev müzəffər ordunun Ali Baş Komandanı kimi hərb tarixində görünməyən şücaəti ilə düşmən üzərində qələbə qazandı.
Azadlıq meydanında keçirilən Zəfər paradı Azərbaycanın Silahlı Qüvvələrinin güclü müdafiə qüdrətinə, beşinci nəsil, ən müasir hərbi texnikaya malik olduğunu göstərdi. Zəfər paradında Azərbaycan xalqının yenilməzliyindən, 44 gün davam edən Vətən müharibəsində Qələbənin qazanılması üçün xalq-iqtidar-ordu birliyindən bəhs edən Prezident, Ali Baş Komandan İlham Əliyev bildirir ki, ordu quruculuğu mənim fəaliyyətimdə həmişə birinci yerdədir: « Azərbaycan Ordusu 44 günlük müharibə dövründə elə bir məharət göstərdi ki, dünyanın ən böyük dövlətlərinin, ən güclü ordularının nümayəndələri belə bu məharətdən irəli gələn təcrübənin öyrənilməsini gələcək müharibələrin aparılması üçün zəruri sayırlar.» Bu sözlər dünyanın ən güclü 50 ordusu arasında yer alan Azərbaycan Silahlı Qüvvələrinin qazandığı uğurların etirafıdır.
«Bu 44 günün hər günü bizim şanlı tariximizdir, hər gün Azərbaycan irəli gedirdi. Bu 44 gün ərzində bir gün də olmamışdır ki, biz geri çəkilək. Biz Ermənistanın 30 ilə yaxın müddət ərzində qurduğu istehkamları yararaq keçmişik» söyləyən Prezident İlham Əliyevin xalqa müraciətlərinin hər biri Ali Baş Komandanın xalqa hesabatı, xalq-iqtidar-ordu birliyinin ifadəsi idi.
«Mən dəfələrlə Azərbaycan xalqına müraciət edərkən deyirdim ki, biz daha güclü olmalıyıq və nəyi, nə vaxt, necə etmək lazımdır, biz bilirik. Həyat göstərdi ki, vaxtında addımlar atdıq, bütün gücümüzü səfərbər edərək bir dəmir yumruq yaradıb düşmənin başını əzdik. Müharibə dövründə mən deyirdim ki, bizim dəmir yumruğumuz həm birliyimizi, həm də gücümüzü təcəssüm etdirir. Bu dəmir yumruq düşmənin belini qırdı, düşmənin başını əzdi» söyləyən Prezident İlham Əliyevin «dəmir yumruğu»nun zərbəsini dövlət başçımızın məntiqli açıqlamaları qarşısında aciz qalan ermənipərəst dairələr də hiss etdilər.
Ermənistanın «yeni ərazilər» sayıqlamasının, «Bakıda görünəcəyik» kimi sərsəmləməsinin üzərindən qətiyyəti ilə əbədilik qırmızı xətt çəkən Prezident İlham Əliyev bildirdi ki, Ermənistanı döyüş meydanında məhv etdik, düşmənin belini qırdıq, ağ bayraq qaldırmağa məcbur etdik. Bu Qələbənin qazanılması ilə qaçqın, köçkün sözləri tarixə qovuşdu, Füzuli, Ağdam, Zəngilan, Kəlbəcər, Qubadlı, Laçın, Cəbrayıl, Şuşa üçrəngli bayraqlarımızla bəzəndi, doğmalarının nəfəsini duydu. Vətən müharibəsinin hər günü qəhrəmanlıq dastanı kimi mübarizlik salnaməmizə yazıldı. BMT Təhlükəsizlik Şurasının, digər beynəlxalq təşkilatların qəbul etdikləri, lakin kağız üzərində qalan qətnamələr döyüş meydanında ordumuzun gücü ilə icra olundu. « Bu onu göstərir ki, biz müharibəni həm döyüş meydanında, həm də siyasi müstəvidə qazanmışıq. Halbuki, bir çoxları, xüsusilə bu məsələ ilə məşğul olan vasitəçilər dəfələrlə demişdilər ki, münaqişənin hərbi həlli yoxdur. Amma biz sübut etdik ki, münaqişənin hərbi həlli var» söyləyən Ali Baş Komandan İlham Əliyevin başçılıq etdiyi ordumuz müasir müharibənin təcrübəsini başqalarına da öyrətdi.
Hərbi əməliyyatlar başlanan gündən xalqımızla bir olan, mənəvi, siyasi dəstək göstərən Türkiyənin Prezidenti Rəcəb Tayyib Ərdoğan, türk xalqı türk dünyasının öndərləri Mustafa Kamal Atatürkün, Heydər Əliyevin vəsiyyətlərinə sadiqliyini göstərdi: «Vətən müharibəsinin ilk günlərindən, daha doğrusu ilk saatlarından biz Türkiyənin dəstəyini hiss edirdik. Türkiyənin Cümhurbaşkanı Rəcəb Tayyib Ərdoğan ilk saatlardan Azərbaycanın haqq işinə öz dəstəyini verdi. Onun açıq, birmənalı və sərt açıqlamaları Azərbaycan xalqını çox sevindirdi. Mənim qardaşım demişdir ki, bu müharibədə Azərbaycan haqlıdır, demişdir ki, Azərbaycan tək deyil və Türkiyə hər zaman Azərbaycanın yanındadır.»
Sadalananlar son 17 ildə ölkəmimizdə qazanılan uğurlara ötəri baxış, xronoloji nəzər salmaq idi. Müstəqillik tariximizin səhifələrində yazılan uğurlarımızın məntiqi nəticəsi bu gün dünyada öz sözünü qətiyyətlə deyən, təhdidlərə, təzyiqlərə xalqla birliyi ilə cavab verən , Azərbaycanı zəfərlər məkanı kimi tanıdan Prezident İlham Əliyevin qətiyyətidir. Prezident İlham Əliyev bu tarixi missiyanı uğurla davam etdirir.
Azərbaycan xalqı sevinc dolu günlərnii yaşayır. Bu sevinci bəxş edən isə xalqın inanıb, arxasınca getdiyi, ətrafında bir yumruq kimi birləşdiyi dövlət başçısı İlham Əliyevdir.
2003-cü ildə keçirilən prezident seçkilərində cənab İlham Əliyevə xalqının gələcəyini etibar edən ulu öndər Heydər Əliyev inanırdı ki, onun başa çatdıra bilmədiklərini yüksək intellektə, siyasi hazırlığa malik layiqli davamçısı tamamlayacaq. Bu sahədə də yanılmayan Ümummilli Liderə övlad, varis kimi « hesabat» verən cənab İlham Əliyev xalqının etibarını, etimadını doğrultduğu üçün ikiqat fərəhlənir. Canından artıq sevdiyi Azərbaycanı etibarlı əllərə tapşıran Ulu Öndərin ruhu bu gün rahat və şaddır.
Qələbə sevincini, Zəfər müjdəsini Ulu Öndərin müqəddəs ruhu bölüşən Prezident İlham Əliyevin « Mən bu gün ulu öndər Heydər Əliyevin məzarını ziyarət etdim, onun ruhu qarşısında baş əydim. Ürəyimdə dedim, xoşbəxt adamam ki, ata vəsiyyətini yerinə yetirdim. Şuşanı azad etdik. Bu böyk Qələbədir. Bu gün şəhidlərimizin, Ulu Öndərin ruhu şaddır. Gözün aydın olsun, Azərbaycan! Gözünüz aydın olsun, düyna azərbaycanlıları» sözlərində xilaskarımız Ümummilli Liderə minnətdarlığımız, vəfa borcumuz ehtiva olunub. Ona görə də müzəffər ordumuzun Ali Baş Komandanı İlham Əliyevə deyirik ki, ata vəsiyyətini yerinə yetirən oğul kimi qazandığınız bütün uğurlar haqqınızdır. Qalibə layiq Qələbə Sizin alnınıza əbədilik yazılan tale qismətinizdir!
Xuraman İsmayılqızı, «İki sahil»
