Gündəlik yoluxma sayında kəskin artımlar yenidən qapanma tədbirlərini qaçılmaz edə bilər.
ARANTV.AZ xəbər verir ki, bunu Türkiyənin Hacəttəpə Universiteti Xəstəxanasının Anesteziologiya və Reanimasiya şöbəsinin həkimi Turanə Rəsulova deyib. O bildirib ki, yoluxma sayında azalmaların olması üçün qaydalara ciddi riayət edilməlidir.
“Tibbi maskadan düzgün istifadə edilməli, sosial məsafə saxlanılmalı, əl gigiyenasına diqqət edilməlidir. Maskalar tez-tez dəyişdirilməlidir, maskanın çöl hissəsinə əl vurulmamalıdır. Yerə tullantı şəklində maskalar atılır. Buna diqqət etmək lazımdır. Azərbaycan və Türkiyədə yoluxanların sayında oxşar sürətlə artım müşahidə edilir. Sərt karantin tədbirlərinə gəlincə, Azərbaycandakı qapanmalar yerində verilən qərarlar olub”.
T.Rəsulova COVID-19-a yoluxma sayında azalmaların olması üçün vaksinasiyasının vacibliyini vurğulayıb.
“Şəkərli diabet, hipertenziya (yüksək təzyiq) və digər xroniki xəstəliklərdən əziyyət çəkənlər üçün vaksin nəinki təhlükəli deyil, hətta daha vacibdir. Hər kəs mütləq vaksinasiya olunmalıdır və ətrafımızdakıları vaksinasiyaya təşviq etməliyik”.
