Hicran Hüseynova: Şuşa dünyanın mədəniyyət mərkəzlərindən birinə çevriləcək
“Azərbaycanın mədəniyyət paytaxtı – Şuşa şəhəri haqqında” qanun layihəsi Azərbaycanın mədəniyyət paytaxtı Şuşanın statusunu və təhlükəsizliyini daha da gücləndirəcək
“Qarabağ, ümumiyyətlə, işğaldan azad edilmiş bütün ərazilərimiz bizim üçün doğmadır, əzizdir. Bizim cəsur əsgər və zabitlərimizin şücaəti nəticəsində bu torpaqlarda erməni faşizminə son qoyuldu. Lakin Şuşanın yeri başqadır. Hər qarışı şəhid, qazi qanı ilə daha da müqəddəsləşən, qəhrəman, qorxmaz oğullarımızın nəfəsi ilə daha canlanan bu gözəl diyarın hər birimiz üçün xüsusi yeri var. Şuşanın işğaldan azad edilməsinin nəinki hər bir azərbaycanlı, eləcə də bütün türk dünyası üçün tarixi, siyasi, mənəvi əhəmiyyətə malikdir. Prezident, Ali Baş Komandan İlham Əliyev tərəfindən Milli Məclisə təqdim edilən “Azərbaycanın mədəniyyət paytaxtı – Şuşa şəhəri haqqında” qanun layihəsi Azərbaycanın mədəniyyət paytaxtı Şuşanın statusunu və təhlükəsizliyini daha da gücləndirəcəkdir.”
Bu fikirləri “İki sahil”ə açıqlamasında Milli Məclisin Ailə, qadın və uşaq məsələləri komitəsinin sədri, professor Hicran Hüseynova deyib.
H.Hüseynova qeyd edib ki, həmin qanun layihəsinə görə Azərbaycanın mədəniyyət paytaxtı Şuşa şəhərinin inzibati sərhədləri daxilində Şuşa Şəhəri Dövlət Qoruğu yaradılır: “Sənəddə həmçinin, Şuşa ərazisində və onun mühafizə zonasında hüquqi tənzimləmə, abidələrin bərpası, qorunması, öyrənilməsi, istifadəsi və təbliği, ətraf mühitin mühafizəsi, Şuşa ərazisində tikinti, memarlıq və şəhərsalma fəaliyyəti, o cümlədən mühüm sosial infrastrukturun təşkili və idarə edilməsi, sahibkarlıq, reklam, turizm və digər fəaliyyətləri, eləcə də Şuşada beynəlxalq səviyyəli tədbirlərin keçirilməsi öz əksini tapmışdır. Bütövlükdə, qanun layihəsi yüksək səviyyədə hazırlanıb və konseptual baxımdan mükəmməl bir sənəddir.”
Milli Məclisin Ailə, qadın və uşaq məsələləri komitəsinin sədri vurğulayıb ki, bu sənədin həm strateji, siyasi əhəmiyyəti vardır: “Bu qanundan Şuşanın gələcəkdə yalnız Cənubi Qafqazın deyil, ümumiyyətlə, dünyanın mədəniyyət mərkəzlərindən birinə çevriləcək. 30 illik fasilədən sonra Qarabağa qovuşmuşuq və bizim hər birimiz maksimum çalışmalıyıq və dünyaya sübut etməliyik ki, Qarabağ Azərbaycandır! Bir daha torpaqlarımızı işğaldan azad edən, Azərbaycanın ərazi bütövlüyünü bərpa edən və bu istiqamətdə siyasi iradə və qətiyyət göstərən Prezident, Müzəffər Ali Baş Komandan cənab İlham Əliyevə minnətdarıq. Bu münasibətlə xalqımızı təbrik edirik.”
