Hakan Doğan: Azərbaycanlılar bizim can qardaşlarımızdır
Türkiyədə baş verən meşə yanğınlarının söndürülməsinə Azərbaycanın ilk gündən böyük dəstək verməsi bir daha bizim qardaşlığımızın əbədi olduğunu təsdiqlədi. Allah azərbaycanlı qardaşlarımızdan razı olsun. Azərbaycanlılar bizim can qardaşlarımızdır.
ARANTV.AZ xəbər verir ki, bu fikirləri AZƏRTAC-ın yanğın böhran bölgəsinə ezam olunmuş müxbirinə Mersindən gəlmiş tibb işçisi Hakan Doğan deyib.
Türkiyənin də hər zaman Azərbaycanın yanında olduğunu deyən H.Doğan bildirib ki, Mersin yanğınsöndürmə heyətinin tərkibinə qatılıb və bir həftədir yanğının qarşısının alınmasında iştirak edir. Yanğınların qarşısı alına biləcək vəziyyətdədir. Ancaq coğrafi şərait bəzən buna imkan vermir və çətinliklər yaradır. Bütün bunlara baxmayaraq yanğının tamamilə söndürülməsi istiqamətində mühüm işlər görülür.
Xatırladaq ki, qardaş ölkədə tüğyan edən meşə yanğınlarının söndürülməsi üçün Azərbaycan Respublikası Prezidentinin tapşırığına əsasən, ölkəmizdən ümumilikdə 700-dən çox şəxsi heyət, 93 yanğınsöndürmə texnikası, 1 helikopter və 1 amfibiya tipli təyyarə göndərilib.
FHN-in yanğınsöndürmə qüvvələrinin 100 əməkdaşından ibarət birinci qrup iyulun 30-da Türkiyəyə yola düşüb. Yanğınsöndürənlərimiz təyinat nöqtələrində yanğınların söndürülməsində fədakarlıqla çalışırlar.
İyulun 31-də FHN-in 1 helikopter, 53 yanğınsöndürmə və xüsusi təyinatlı xilasetmə texnikası, 1 tibbi yardım avtomobili, 220 yanğınsöndürən və xilasedicidən ibarət ikinci qrupu qardaş ölkəyə yola salınıb. Qrup Gürcüstandan keçməklə iki sutka ərzində Marmarisə çataraq birinci qrupun üzvlərinə qoşulub.
Avqustun 5-də səhər saatlarında FHN-in “BE-200ÇS” tipli amfibiya təyyarəsi qardaş ölkəyə yola düşüb. Həmin gün FHN-in 40 yanğınsöndürmə texnikası və 160 yanğınsöndürəndən ibarət üçüncü yanğın-xilasetmə qrupu da Türkiyəyə yola salınıb. Media nümayəndələrinin də yer aldığı həmin qrup artıq Türkiyə ərazisindədir və təyinat məntəqəsi istiqamətində hərəkət edir.
Avqustun 6-da axşam saatlarında FHN-in yanğın-xilasetmə qüvvələrinin 200 nəfərdən ibarət dördüncü qrupu təyyarə ilə Türkiyəyə yola salınıb.
FHN-in Türkiyədəki qüvvələrinin koordinasiyalı idarə edilməsi məqsədilə fövqəladə hallar nazirinin müavini general-leytenant Etibar Mirzəyevin başçılığı ilə qurumun məsul vəzifəli əməkdaşlarından ibarət nümayəndə heyəti qardaş ölkədədir.
