Türkiyə ikinci Vətənimiz deyil, iki Vətənimizdən biridir

2016-cı ilin 15 iyulunda qardaş ölkədə legitim hakimiyyəti hərbi yolla ələ keçirmək cəhdini ilk qınayan, etiraz səsini ucaldan Azərbaycan dövləti, xalqı oldu

Müasir dövrümüz üçün xarakterik olan və tarixi köklərdən qaynaqlanan Prezident İlham Əliyevin   « Dünya miqyasında  Türkiyə və Azərbaycan qədər biri-birinə yaxın ikinci ölkə tapmaq mümkün deyil»  sözləri təkcə hər iki qardaş ölkə xalqlarının deyil, bütün türk dünyasının  birlik və həmrəylik rəmzi kimi qiymətləndirilir.

Türk dünyasının birliyi yolunda  inamlı addımlar ataraq oxşar mental dəyərlərə,  tarixə, eyni kökə malik xalqların yaxınlaşmasında  aparıcı rolunu  davam etdirən  Azərbaycan-Türkiyə qardaşlığının əbədiliyini  təsdiqləyən  tarixi faktlar çox olsa da onlardan bəzilərini xatırlatmaqla əsrlərin sınağından çıxmış bu əlaqələrin sarsılmazlığına əminlik  yaranması labüddür. Türk dünyasının öndərlərindən olan Mustafa Kamal Atatürkün  «Azərbaycan gülərsə biz də güləriz, Azərbaycan üzülərsə biz də üzüləriz» deyimi, ulu öndər Heydər Əliyevin «Biz bir millət, iki dövlət» aforizmi hər iki ölkənin xalqları tərəfindən müdriklik rəmzinə çevrilib.  Türkiyə-Azərbaycan qardaşlığının tarixi anlarını yaşadan  Sarıqamış savaşındə, Çanaqqala döyüşündə   şad günlərdə  bir olan ərənlər çətin məqamlarda da  bir olmuş, düşmənə qarşı birgə mübarizə aparmışlar. Türkiyə Cümhuriyyətinin  yarandığı   illərdə maddi  çətinliklə üzləşən qardaş ölkənin rəsmiləri kömək üçün görkəmli ictimai-siyasi xadim Nəriman Nərimanova müraciət edərək borc istədikləri zaman onun cavabı belə olur: «Qardaş qardaşa borc verməz, əl tutar!»  Birinci Dünya müharibəsi zamanı Osmanlı imperiyası ilə Rusiya imperiyası arasındakı döyüşlərdə, Sarıqamış savaşında ruslar tərəfindən  əsir götürülən,  «cəhənnəm adası» adlandırılan Nargində saxlanılan  türk əsgərlərinə həkim kimi baş çəkən Nəriman Nərimanov onların əzab-əziyyətlərini ürək ağrısı ilə dilə gətirirdi. 1918-ci ildə  Azərbaycanın bütün ərazilərində soyqırımlar  törədən erməni –bolşevik  birləşmələrinin qarşısını alan  Qafqaz İslam Ordusunun  fədakarlığını xalqımız qardaş köməyi, vəfa borcu kimi hər zaman qiymətləndirir.
Azərbaycan torpaqlarını 30 il işğal altında saxlayan Ermənistanla sərhədlərini bağlayan, artıq tarixin arxivinə göndərilmiş «Dağlıq Qarabağ münaqişəsi» ilə bağlı danışıqlarda, aparılan müzakirələrdə  Azərbaycanla eyni mövqedən çıxış edərək ərazi bütövlüyümüzün toxunulmazlığını  təkcə sözlə deyil, əməli işi ilə də təsdiqləyən  Türkiyə həqiqi mənada göstərdi ki, hər iki xalq arasındakı  bağlılıq sarsılmazdır.  Praqada keçirilən «Şərq tərəfdaşlığı» Proqramının beş illiyinə həsr olunmuş Sammitdə Türkiyənin ünvanına deyilən yalanları « Bu gün təəssüf ki,  Ermənistan prezidenti burada fürsətdən istifadə edərək Türkiyəyə yenidən hücum edir. Bunu etmək asandır. Çünki bu  masa arxasında  Türkiyə nümayəndələri yoxdur. Ancaq mən buradayam və Türkiyə-Ermənistan  sərhədinin niyə bağlı olduğunu deyə bilərəm» sözləri ilə təkzib edən Prezident İlham Əliyev hər iki qardaş ölkəni birləşdirən siyasi, mənəvi, diplomatik münasibətlərin eyni mənbədən  qaynaqlandığını  dünya ictimaiyyətinə qətiyyətlə bəyan etdi. Bu qardaşlığı  Yunanıstanın ölkəmizə yeni təyin olunmuş səfirinin etimadnaməsini qəbul edərkən Şərqi Aralıq dənizi  regionunda  Türkiyənin mövqeyini  dəstəkləməklə  bildirən  Prezident İlham Əliyevin «Sizə deyə bilərəm və bu sirr deyil ki, Türkiyə təkcə bizim dost və tərəfdaşımız yox, bizim üçün qardaş ölkədir. Biz heç bir tərəddüd etmədən Türkiyəni dəstəkləyirik və bütün hallarda dəstəkləyəcəyik. Biz eyni dəstəyi türk qardaşlarımızdan da görürük. Onlar Azərbaycanı bütün məsələlərdə dəstəkləyirlər və biz onları bütün məsələlərdə dəstəkləyirik, o cümlədən Şərqi Aralıq dənizində kəşfiyyat məsələsi ilə bağlı» sözlərinin Türkiyədə  qardaş münasibəti kimi sevinclə qarşılanması birliyimizin sarsılmazlıq nümunəsi idi.

2016-cı ilin 15 iyulunda Türkiyədə legitim hakimiyyəti hərbi yolla ələ keçirmək cəhdini ilk qınayan, etiraz səsini ucaldan da  Azərbaycan dövləti, xalqı oldu. Türkiyə Silahlı Qüvvələrinin tərkibində özünü  «Yurtda Sülh Konseyi»” adlandıran   FETOçu xainlərin əvvəlcədən hazırladıqları plana əsasən, İstanbulda Boğaziçi və Fatih Sultan Mehmet körpüsü  xalqına və dövlət  tərəfindən verilən  rütbələrinə xəyanət edən  hərbi mundirli satqınlar  tərəfindən nəzarətə götürüldü. Ankarada Prezident sarayı kompleksinin,  Türkiyə Böyük Millət Məclisinin, Nazirlər Kabinetinin, Milli İstihbarat Təşkilatı və  digər inzibati binaların qiyamçılar tərəfindən atəşə tutulması nəticəsində dövlətə xeyli maddi ziyan vuruldu,  insanlar mənəvi sarsıntılarla üzləşdilər.   Silahlı müdaxilə ilə  davam edən qiyam zamanı  bir neçə televiziya kanalları,  dövlət orqanlarının yerləşdiyi inzibati binalar dağıdıldı.  Hadisə baş verən zaman  Muğlada olan,  «Türkiyə bu cür qiyamlarla  ucuz satılacaq ölkə deyil» sözləri ilə xalqa müraciət edən  Prezident Rəcəb Tayyib Ərdoğanın xalqı qiyama qarşı birgə mübarizəyə çağırışı ilə milyonlarla Vətən fədaisi birlik nümayiş etdirdi,  meydanlara toplaşan  insanların iqtidara olan inamı, sədaqəti, etimadı,  həmrəyliyi ilə xəyanətin qarşısı  alındı.  Ölkənin bütün bölgələrində, ən iri şəhərlərində  xainlərə qarşı etiraz   aksiyaları keçirildi. İyulun 16-sı səhər saatlarında  hərbi çevriliş cəhdinin qarşısı alındı və  xəyanətkar dəstənin üzvləri təslim oldular.  FETO terror təşkilatının törətdiyi dövlət çevrilişinə  cəhd hadisələrində 251 nəfər şəhid oldu, 2196 nəfər isə yaralandı.  Prezidentləri  Rəcəb Tayyib Ərdoğanın ətrafında sıx birləşən türk xalqı bu terror təşkilatının düşmənçilik niyyətlərinin  qarşısını birliyi ilə aldı.  Azərbaycan dövləti və xalqı hadisənin ilk anlarından dövlət  əleyhinə qiyamı böyük narahatlıqla izlədi, qəhrəman türk xalqına dəstəyini ifadə etdi. İstanbulun Atatürk  Hava Limanında baş verən və kütləvi insan  qırğını ilə nəticələnən terrordan sonra təşkil olunan hərbi qiyam bir daha göstərdi ki, regionda  nüfuzu artan, siyasi sabitliyin  qorunmasına töhfələr verən  Türkiyənin  qüdrətindən təşvişə düşənlər ən çirkin vasitələrə  əl atsalar belə niyyətlərinə çata bilməyəcəklər. Dahi öndər Mustafa Kamal Atatürkün «Türk əsarət qəbul etməyən bir millətdir. Türk milləti əsir olmamışdır» sözlərini dövlətə inamı ilə göstərən  xalq ən qüdrətli silahdan da güclü birliyi ilə xəyanətkarlara tarixi dərs verdi.  Hadisələr zamanı şəhid olanların adları artıq  əbədiləşdirilib. İstanbulda onların fotolarından ibarət Xatirə lövhəsi təşkil olunub,  abidə ucaldılıb. «15 İyul Şəhidlər Körpüsü» açılıb.

Yaxın tarixə nəzər salanda, ötən illərdə  Türkiyədə  baş verənləri xatırlayanda bir məqam etiraf olunur. Dünyada , regionda  iqtisadi qüdrəti artan,  beynəlxalq aləmdə güc mərkəzi kimi  sözünü qətiyyətlə söyləyən Türkiyənin   mövqeyindən    ehtiyatlanan xarici və daxili  qüvvələrin,  «Gezipark»da, Taksim meydanında keçirilən aksiyaları  «ictimaiyyətin etirazı» kimi qələmə verənlərin  növbəti cəhdi də baş tutmadı. Hərbi qiyam bir daha göstərdi ki, regionda  nüfuzu artan, siyasi sabitliyin  qorunmasına çalışan  Türkiyənin qüdrətindən təşvişə düşənlər ən çirkin vasitələrə  əl atsalar belə  xalqın gücü qarşısında üzləşdikləri  məğlubiyyətləri ilə barışmalıdırlar. Həmin günlərdə baş verən   hərbi çevriliş cəhdini  pisləyən,   hər zaman qardaş  Türkiyənin yanında olduğunu  həmkarı  Rəcəb Tayyib Ərdoğana ünvanlanan məktubunda bildirən dövlət başçımız İlham Əliyev hadisələri böyük narahatlıqla izlədiyini bəyan etməklə, qiyamın qarşısının alınmasında  şəhid olanların ailələrinə başsağlığı vermişdir: « Həmişə türk xalqının və dövlətinin yanında olan Azərbaycan xalqı və dövləti Türkiyənin Konstitusiyasına,  demokratiyasına  qarşı yönəlmiş bu cinayəti qətiyyətlə pisləyir və qəbuledilməz hesab edir. Əminəm ki, Türkiyə xalqı və hakimiyyəti  birliyini nümayiş etdirərək çevriliş cəhdinin qarşısının alınması istiqamətində  həyata keçirdiyiniz qəti tədbirlər nəticəsində  qardaş ölkədə  vəziyyət qısa zamanda sabitləşəcək və əvvəlki qaydasına düşəcəkdir.»

Əslində 15 iyul hadisələri  Cənubi  Qafqazda  Sabitlik və Əməkdaşlıq Platformasının tərəfdarı olan Türkiyənin  sülhyaratma missiyasına əngəl törətmək naminə planlaşdırılan xəyanət idi. Pensilvaniyada  məskunlaşmaqla hadisələri idarə edən Fətullah Gülənin «camaatı»  Türkiyənin  qüdrətli dövlətlərlə  münasibətlərinə,  dünyanın enerji bazarında möhkəmlənən mövqeyinə və roluna  qısqanclıqlarını qiyamla  bildirdilər. Lakin eyni mərkəzdən idarə olunan daxili və xarici qüvvələr, Prezident Rəcəb Tayyib Ərdoğanın bölgədə  güclənən nüfuzuna  həsəd aparanlar türk xalqının gücü qarşısında  məğlub oldular. Qardaş ölkəyə  qarşı  düşmən mövqedə olan qüvvələrin planlaşdırılmış şəkildə hazırladığı belə aksiyalar, terrorlar iqtidarda olan partiyaya qarşı aparılan təxribatlar, qərəzli siyasət   mənfur niyyətlərdən qaynaqlanır.  Belə qüdrətli  ölkənin daxili işlərinə  müdaxiləyə təbii ki, yol verilə bilməzdi. Xarici qüvvələr tərəfindən idarə olunan, mövcud iqtidara qarşı  mənfi imic formalaşdırmaq niyyətindən qaynaqlanan bu qiyam  ölkə vətəndaşlarının Türkiyə iqtidarına inamı əks etdirən ictimai rəyi  üstələyə bilmədi. Beynəlxalq ictimaiyyət də  xalqın iradəsi ilə seçilmiş iqtidarı  dəstəkləyərək hərbi yolla dövlət çevrilişlərini  pislədilər.  Dünya liderləri birmənalı olaraq Türkiyənin  hazırkı iqtidarını dəstəklədiklərini rəsmi bəyan etdilər.

Bu reallığı «Türkiyə bu gün dünya miqyasında böyük bir gücdür. Türkiyə dünya gündəliyinin bir çox məsələlərində həlledici sözə malikdir. Bütün bu uğurlar mənim qardaşım Prezident Ərdoğanın liderliyi ilə əldə edilibdir. Bu gün Türkiyə uğurla, sürətlə inkişaf edir. Türkiyə Prezident Ərdoğanın liderliyi ilə çox böyük və şərəfli yol keçmişdir…Türkiyə gücləndikcə biz də güclənirik, biz də sevinirik» sözləri ilə ifadə edən dövlət başçımız İlham Əliyev qətiyyətlə bildirir ki,  Türkiyə və Azərbaycan bütün məsələlərdə bir-birinin yanındadırlar.
Bu səmimi qardaşlıq münasibətini  15 iyul hadisələri ilə bağlı  keçirdiyi görüşdə, mitinqlərdə  kənar partiyaların, həmkarlar təşkilatlarının bayraqlarının gətirilməsini məqbul hesab etməyən   Rəcəb Tayyib Ərdoğan yalnız Şimali Kipr Türk Respublikasının və Azərbaycanın bayraqlarının dalğalanacağını bildirmiş, ölkəmizə  qardaş münasibətini qısa və qəti  sözlərilə ifadə etmişdir : « Azərbaycan bizim ailəmizin üzvüdür.»  Hər iki xalq arasındakı  dostluğun sarsılmazlığını «Türkiyə ilə Azərbaycan tək ürəkdir» sözləri ilə  ifadə edən Türkiyə Prezidentinin  səmimiyyətinə Azərbaycan xalqı qardaş ölkə ilə həmrəyliyini bu sözlərlə bildirir: « Biz birlikdə güclüyük», «Türkiyə ikinci Vətənimiz deyil, iki Vətənimizdən biridir.»

«Dünyada  güc mərkəzinə çevrilən  Türkiyə nə qədər qüdrətli  olsa, Azərbaycan da bir o qədər özünü rahat hiss edəcəkdir» deyimi həyatda  öz əksini tapıb. Bu baxımdan xəyanətkar planların « müəllifləri» unudurdular ki,  Türkiyə  və Azərbaycanda təxribatlar törətməklə  iki qardaşın birliyinə xələl gətirməyə çalışsalar da  buna nail ola bilməyəcəklər. «Biz nə qədər güclü olsaq, bizim həqiqətlərimiz də bir o qədər üstün olacaqdır. O qədər də bizim sözümüzü eşidəcəklər» söyləyən Prezident İlham Əliyevin sözlərini 44 gün davam edən İkinci Qarabağ müharibəsindəki siyasi qüdrətimiz, hərbi gücümüz təsdiqlədi.  Türkiyədə və Azərbaycanda sabitliyi pozmağa çalışanların qarşısı hər iki xalqın yenilməzlik rəmzi olan üçrəngli və  ay -ulduzlu qırmızı bayraqların qüdrəti,  insanların qəlbində alınmaz  qala kimi getdikcə möhkəmlənən birlik və həmrəyliyin gücü ilə alındı və alınacaq.  M. K. Atatürkün « Millətin zəkasından qaynaqlanan gücü heç bir qüvvət dayandıra bilməz» sözləri türk millətinin məğlubedilməzliyinin təsdiqlənmiş  hikmətidir. İkinci Qarabağ müharibəsindən sonra Bakıda   keçirilən Zəfər paradında, Füzuli, Artvin-Rizə Beynəlxalq Hava limanlarının açılışlarında, «TEKNOFEST Azərbaycan» festivalında Prezident İlham Əliyevlə həmkarı Rəcəb Tayyib Ərdoğanın qoşa dayanmasından təşvişə düşənlər bu gücün güdrətini heç zaman unutmamalıdırlar. Şuşada Müttəfiqlik Bəyannaməsinin imzalanması mərasimində isti münasibətləri təsdiqləyən  hər iki dövlətin başçılarının çıxışları əlamətdar  hadisə kimi tarixə yazıldı. «Bu gün biz dünya miqyasında, dünya çapında nadir əməkdaşlıq, iş birliyi, müttəfiqlik nümunəsi göstəririk» söyləyən Prezident İlham Əliyevin vurğuladığı kimi, 100 il bundan əvvəl imzalanmış Qars müqaviləsinə istinad edilən Şuşa Bəyannaməsi o deməkdir ki,  hər iki dövləti  dəmir yolu , avtomobil yolu ilə birləşdirəcək Zəngəzur dəhlizi haqqında nəinki danışılır, bu dəhliz əməli işlərlə yaradılır. «Türkiyə olaraq, azadlıq mübarizəsində olduğu kimi, bərpa işlərində də qardaşlarımıza hər cür dəstəyi veririk, verməkdə də davam edəcəyik» söyləyən  Türkiyə Prezidenti Rəcəb Tayyib Ərdoğan bildirir ki, qarşıdakı dövrdə ticari və iqtisadi əməkdaşlığımızın miqyası daha da genişləndiriləcək: «Digər tərəfdən, Azərbaycanın Cənubi Zəngəzur dəhlizi layihəsini çox əhəmiyyətli hesab edir və onu da dəstəkləyirik. Bu layihənin həyata keçirilməsi ilə Şərqdən Qərbə hər kəsin istifadə edə biləcəyi yeni bir ortaq dəhliz açılacaqdır. Bu, çox böyük əhəmiyyət kəsb edir…Bizim gücümüz Azərbaycanın gücü, Azərbaycanın gücü də bizim gücümüzdür.» Ulu öndərlər  Mustafa Kamal Atatürkün və Heydər Əliyevin xeyir-duaları ilə möhkəmlənən bu   güc  ümumi düşmənlərimizin qarşısında alınmaz qala, keçilməz sədd, canlı sipərdir.