Mediaya yeni vergi güzəştləri: Ondan kimlər və necə faydalana biləcək?
Xəbər verildiyi kimi, Azərbaycan Respublikasının Prezidenti İlham Əliyev “Azərbaycan Respublikasının Vergi Məcəlləsində dəyişiklik edilməsi haqqında Azərbaycan Respublikasının Qanunu”nu təsdiq edib. Bununla da media subyektləri (audiovizual media subyektləri istisna olmaqla) fəaliyyətlərindən əldə etdikləri gəlirlər, reklam gəlirləri, habelə onlara verilən müvafiq maddi yardımlar gəlir, mənfəət və sadələşdirilmiş vergilərdən azad edilir. Onlar tərəfindən istehsal olunan media məhsullarının təqdim edilməsi isə əlavə dəyər vergisindən 3 il müddətinə azad olunur.
Prezident İlham Əliyevin ölkə mediasına göstərdiyi diqqətin bariz nümunəsi olan bu qərar çap və onlayn medianın inkişafına xidmət edir. Söhbət ondan gedir ki, media subyektlərinin sözügedən vergilərdən azad olunması onları 3 il müddətində xərclərini azaldacaq. Bu isə onlara digər istiqamətlərdə xərclərini artırmağa şərait yaratmaqla fəaliyyətlərini genişləndirməyə, iqtisadi müstəqilliyə nail olmağa imkan verir. Belə ki, bir qayda olaraq vergi ödənişi iqtisadi subyektlərin xərclərinin əhəmiyyətli hissəsini təşkil etməklə onların mənfəətləri azaldır. Vergidən azadetmədə isə bu vəsaitlər ya mənfəətə, ya da digər istiqamətdə xərcə çevrilə bilir.
Xüsusilə də reklam gəlirlərinin vergidən azad edilməsi bu bazarın həcminin genişlənməsinə yol açmaqla media subyektlərinin gəlirlərinin artmasına şərait yarada bilər. Belə ki, vergidən azadetmə reklamdan əldə olunan gəlirlərin gəlir, mənfəət və sadələşdirilmiş vergilərə cəlb olunmaması onların qiymətinə azaldıcı təsir etməklə iqtisadi subyektləri reklam verməyə təşviq edə bilər. Vergidən azadetmə digər tərəfdən media subyetlərinin göstərdikləri reklam xidmətləri üzrə xərclərinin azalması deməkdir. Bu baxımdan vergidən azad etmə media subyektlərinin dövlət büdcəsindən və digər mənbələrdən maliyyələşdirilmələrinin azaldılmasına və müstəqil iqtisadi fəaliyyətlərinin təmin edilməsinə xidmət edəcək.
Məhdud reklam bazarının yaratdığı vəziyyətdə dövlət büdcəsindən və digər mənbələrdən maliyyələşdirmədən yüksək səviyyədə asılılığın olması media subyektlərinin iqtisadi müstəqilliyini təhdid edir. Xüsusilə də az sayda mənbədən maliyyələşmə imkanları media subyektlərinə gəlirlərini şaxələndirməyə, iqtisadi müstəqilliklərini təmin etməyə imkan vermir. Asılılığın yüksək səviyyədə olması media subyeklərinin rəqabət imkanlarını da məhdudlaşdırmaqla onların istehsal etdikləri media məhsullarının keyfiyyətinə sirayət edir. Bu mənada iqtisadi müstəqilliyin artması keyfiyyətli media məhsullarının ortaya çıxmasına da imkan verəcək.
Medianın İnkişafı Agentliyinin icraçı direktoru Əhməd İsmayılov bildirib ki, dövlətin medianın inkişafına dəstək strategiyasından bu sahə ilə bağlı ayrı-ayrı vaxtlarda ƏDV-dən azadetmə təcrübəsi olub və bu, medianın iqtisadi vəziyyətinin yaxşılaşmasına öz müsbət təsirini göstərib. İcraçı direktor vurğulayıb ki, Azərbaycan mediasının iqtisadi dayanıqlığının gücləndirilməsi, müstəqil, güclü, fəaliyyətini günümüzün tələbləri səviyyəsində qurmağı bacaran və xalqımızın milli maraqlarını rəhbər tutan medianın inkişafı dövlət siyasətinin prioritetini təşkil edir.
