Bol oksigen, göz oxşayan təbiət və təbii məhsullar – Zaqataladan reportaj
Qarşıdan bayram tətili günləri gəlir. Əksər insanlar bu günlərdə bölgələrə üz tutur. Lakin hara getmək və necə istirahət etmək barədə bəzən qərar verə bilmirlər. Elə isə Azərbaycanın dilbər guşələrindən olan Zaqatalada fəaliyyət göstərən aqroturizm məkanlarına baş çəkmək gözəl fürsət ola bilər.
ARANTV.AZ xəbər verir ki, Zaqatalada fəaliyyət göstərən “Hope Lake” və “EKO Zaqatala” aqroturizm təsərrüflarına “Paşa Holdinq”in dəstəyi ilə Kənd Təsərrüfatı Nazirliyi tərəfindən həyata keçirilən “Şəhərdən Kəndə” layihəsi çərçivəsində mediatur təşkil edilib.
Jurnalistlər əvvəlcə Zaqatalanın “Hope Lake” – Ümid Gölü təsərrüfatında qonaq olub. Təsərrüfatın rəhbəri Hüseyn Mehdiyev iri və xırdabuynuzlu heyvanların saxlanılması, quşçuluq, balıqçılıq və təsərrüfatın digər sahələri barədə ətraflı məlumat veriib. İyirmi ilə yaxındır fəaliyyət göstərən təsərrüfatda iribuynuzlu heyvanların üstünlük təşkil etdiyini deyən Hüseyn Mehdiyev, elə oradaca inəyin südünü sağıb və odda bişirdikdən sonra qonaqlara təklif edib. Bundan başqa media işçilərinə təsərüfatda təbii məhsullarla hazırlanan təamların dadına baxılması üçün şərait yaradılıb.
Qonaqlar daha sonra Zaqatalanın Yuxarı Tala kəndində yerləşən “Eko Zaqatala” təsərrüfatına gəlib, arıçılıq təsərrüfatında müxtəlif arı məhsullarının hazırlanma qaydaları ilə yaxından tanış olublar. Təsərrüfatın rəhbəri Mövləddin Qurbanəliyevin arıxanası Böyük Qafqazın cənub yamacına yaxın, öz dili ilə desək, bir addımlığında yerləşir. Babasından əmanət qalan arıxananı illər boyu qoruyub saxlayan və inkişaf etdirən Mövləddin Qurbanəliyev son illər aqroturizm sektorunda da bir sıra layihələrə imza atıb. İndi onun arıxanasını təkcə yerli turistlər deyil, həm də xarici ölkələrin iş adamları, əcnəbi turistlər də ziyarət edir.
Bu təsərrüfatda Zaqatalaya, eləcə də bölgəyə xas milli yeməklərin bişirilməsi də nümayiş olunur. Belə ki, Zaqatala, Balakən və Qax rayonlarında xəmir xörəkləri, əsasən də maxara və sürhüllü son illərə kimi unudulmaq üzrə idi. Lakin ölkəmizdə turizm sektoru canlandıqca bu yeməklərə də maraq artmaqdadır. Bu işlərə isə Mövləddin müəlimin xanımı Lalə Qurbanəliyeva məsuldur. Lalə xanım Azərbaycan mətbəxini bütün incəliyinə kimi bilir desək, yanılmarıq. Xüsüsən o, qış aylarının ən ləzzətli xörəyi olan sürhüllü hazırlamaqda kifayət qədər təcrübəyə malikdir. Qonaq-qarası çox olanda yaxın qohumlarını və gəlinlərini də bu işə cəlb edən Lalə xanım deyir ki, aqroturizm sektoruna qoşulandan sonra yüzlərlə yerli və xarici turist onların qonağı olub. Hər kəs burada süd və un qarışığından hazırlanan günəş rəmzi olan südlü qoğala, yerli əhalinin isə maxara adlandırdığı sacüstü təama qonaq edilib.
Qeyd edək ki, “Şəhərdən Kəndə” layihəsinin məqsədi ölkəmizdə aqroturizmin inkişaf etdirilməsi, regionlarda yaşayan əhalinin məşğulluğunun artırılması, yerli fermer təsərrüfatları üçün alternativ satış kanalı, eləcə də şəhər sakinləri və xarici turistlər üçün fərqli turizm imkanlarının yaradılmasıdır.
Kənd Təsərrüfatı Nazirliyinin əməkdaşı Asiman Aslanova bildirib ki, layihə çərçivəsində bu günədək yerli və əcnəbi mütəxəssislər tərəfindən həyata keçirilən təlimlərdə 221 təsərrüfat sahibi iştirak edib. Ümumilikdə, isə layihəyə qoşulmaq üçün 200-dən çox fermer qeydiyyatdan keçib. Baxış keçirilən 177 fermer təsərrüfatından 130-u aqroturizm fəaliyyətləri üçün uyğun hesab edilib.
Asiman Aslanovanın sözlərinə görə, ölkəmizdə fəaliyyət göstərən turizm şirkətlərinin nümayəndələri üçün də belə turların təşkili nəzərdə tutulur. Belə ki, onların bölgələrdə hansı aqroturizm məkanlarının olmasını, hansı xidmətlərin təşkil edilməsini bilməsi vacibdir. Bu minvalla gələcəkdə yerli turistlər aqroturizm təsərrüfatlarına cəlb ediləcək. Növbəti mərhələdə isə xarici turizm şirkətləri, eləcə də xarici turistlər bu layihələr çərçivəsində bölgələrdəki aqroturizm məkanlarına cəlb olunacaq.
