“Azarım, bezarım su ilə axıb getsin” – Lənkəranda Su çərşənbəsindən reportaj VİDEO
Bu gün Novruzun ilk çərşənbəsi, yazın müjdəçisi olan Su çərşənbəsidir. Su həyatın mənbəyi, aydınlığın və saflığın rəmzi olduğundan, bu çərşənbədə onun müqəddəs mahiyyəti ön plana çıxır. Xalq arasında “Əvvəl çərşənbə”, “Gözəl çərşənbə”, Sular Novruzu” və “Gül çərşənbəsi” kimi də tanınır və bu gün müxtəlif adət-inanclarla müşayiət olunur.
Xatırlatma: Bu il Su çərşənbəsi fevralın 25-nə, Od çərşənbəsi martın 4-nə, Yel çərşənbəsi martın 11-nə, İlaxır, yaxud da Torpaq çərşənbəsi isə martın 18-nə təsadüf edir.
AZƏRTAC-ın bölgə müxbiri xəbər verir ki, Lənkəranda Su çərşənbəsi xüsusi ənənələrlə qeyd edilir. İnsanlar bulaq və çaylardan su gətirir, suyun üzərindən atılaraq arzularını diləyir və su falına baxırlar. İnanca görə, axar sudan götürülən su saflıq və şəfa mənbəyi, dərdlərə çarə hesab olunur.
“Novruzun ilk çərşənbəsi olan Su çərşənbəsi bizim üçün çox əhəmiyyətlidir. Bu günün bizə uğur, aydınlıq və su kimi paklıq gətirməsini diləyirik. İnanca görə, axar sudan “Azarım, bezarım su ilə axıb getsin” deyib keçirlər ki, ilboyu xəstəliklərdən uzaq olsunlar. Bundan başqa, axar sudan evə gətirib həyət-bacaya, ev-eşiyə səpirlər ki, illəri ruzi-bərəkətli olsun. Xəstələrin yaralarına səpirlər ki, tez sağalsınlar”, – deyə 1 saylı Boladi kənd klubunun nümayəndəsi Samirə Ağayeva bildirir.
Axşam süfrəyə təmiz su qoyulur və ailə üzvləri həmin sudan içərək, bir-birilərinə sağlamlıq və bərəkət arzulayırlar. Xüsusilə subay qızlar su falına baxaraq, gələcəkləri haqqında məlumat almağa çalışırlar.
“Bu çərşənbə Lənkəranda xüsusi coşqu ilə qeyd olunur. Nənələrimiz və analarımız bulaq başından və çaylardan su gətirərək, evin dörd tərəfinə səpərdilər. Bu ənənəni biz də yaşadırıq. Evin künclərinə, ağaclara su səpir, mal-qaraya həmin sudan veririk. Bu sulardan yeməklər hazırlanır, ailə üzvləri isə həmin su ilə yuyunurlar. Bu günün vacib inanclarından biri də su falına baxmaqdır. Xüsusilə subay qızlar gecə su falına baxırlar. Bunun üçün axar sudan gətirilmiş suya müxtəlif nişanələr atılır və onların suyun üzərindəki hərəkətinə görə yozum olunur. Əgər bu çərşənbə günü qar yağarsa, ilimiz daha bərəkətli olar. Çünki qar tez əriyir və torpaq isinir, təbiət yenilənir. Bu isə bərəkət, bolluq və yeni həyatın başlanğıcı deməkdir”, – deyə 1 saylı Boladi kənd klubunun müdiri Şahnaz Rzayeva qeyd edib.
Qeyd edək ki, yaz fəslinin Azərbaycana daxil olması martın 20-si Bakı vaxtı ilə saat 13:01:25-ə təsadüf edəcək. Bu zaman gecə ilə gündüz bərabərləşir. Günəş Cənub yarımkürəsindən Şimal yarımkürəsinə keçir. Həmin andan Şimal yarımkürəsində yaz, Cənub yarımkürəsində isə payız fəsli başlayır. Yaz fəslinin uzunluğu 92 gün 17 saat 40 dəqiqə 46 saniyə olacaq.
