Azərbaycan–Vyetnam əlaqələrində yeni mərhələ
2025-ci il mayın 6-da Azərbaycan Respublikasının Prezidenti İlham Əliyev Vyetnamın rəsmi xəbər agentliyi olan “Vietnam News Agency”yə əhəmiyyətli bir müsahibə verib. Bu müsahibə Vyetnam Kommunist Partiyasının Baş katibi Tô Lâmın 7-8 may tarixlərində Azərbaycana dövlət səfəri öncəsində baş tutub və iki ölkə arasında əməkdaşlığın strateji perspektivlərini ön plana çıxarıb. Prezident İlham Əliyev müsahibəsində Azərbaycan və Vyetnam arasında dostluq münasibətlərinin uzun illərə söykəndiyini qeyd edib. 1959-cu ildə Prezident Ho Şi Minhin Azərbaycana səfəri, eləcə də 1983-cü ildə ümummilli lider Heydər Əliyevin Vyetnama rəsmi səfəri iki ölkə arasında diplomatik münasibətlərin tarixi təməlini qoyub. Bu səfərlər bugünkü siyasi və iqtisadi əməkdaşlığın əsasını təşkil edir.
Prezident Əliyev bildirib ki, Azərbaycan və Vyetnam arasında iqtisadi münasibətlərin inkişafı üçün geniş potensial mövcuddur. O, xüsusilə enerji sahəsində əməkdaşlığın tarixi və önəmini vurğulayaraq, 1981-ci ildə yaradılmış Vietsovpetro birgə müəssisəsinin ilk baş direktorunun azərbaycanlı Jalal Məmmədov olduğunu xatırladıb. Eyni zamanda, 2019-cu ildə SOCAR ilə Vyetnamın Binh Son neft-kimya şirkəti arasında imzalanan əməkdaşlıq sazişi iki ölkə arasında sənaye əlaqələrinin inkişafına təkan verib. Müsahibədə qeyd olunub ki, Azərbaycan və Vyetnam arasında yalnız siyasi və iqtisadi deyil, həm də mədəni və humanitar sahədə fəal əməkdaşlıq mövcuddur. Prezident Əliyev Bakıda keçirilmiş “Əfsanə Yaradıcıları” filminin nümayişi və “Vyetnam Günləri” kimi tədbirləri yüksək qiymətləndirib.
Bundan əlavə, Heydər Əliyev Fondunun Vyetnamda həyata keçirdiyi sosial layihələr – o cümlədən Ha Giang vilayətində tikilən məktəb – iki ölkə arasında dostluq əlaqələrinin humanitar ölçüsünü gücləndirir. Prezident İlham Əliyev Vyetnam Kommunist Partiyasının Baş katibi Tô Lâmın Azərbaycana səfərinin əhəmiyyətini xüsusi vurğulayaraq bildirib ki, bu səfər Azərbaycan–Vyetnam münasibətlərində yeni mərhələnin başlanğıcı ola bilər. Dövlət başçısı bu səfərin təkcə siyasi dialoqu deyil, həm də iqtisadi, mədəni və texnoloji sahələrdə əməkdaşlığı daha da genişləndirəcəyinə inam ifadə edib. Prezident İlham Əliyevin “Vietnam News Agency”yə verdiyi müsahibə Azərbaycan ilə Vyetnam arasında münasibətlərin dərinləşdirilməsi və genişləndirilməsi baxımından strateji əhəmiyyət daşıyır. Tarixi təməllər üzərində qurulmuş bu əlaqələr, qarşılıqlı hörmət və ortaq maraqlar çərçivəsində yeni əməkdaşlıq imkanlarını gündəmə gətirir. Bu müsahibə eyni zamanda Azərbaycanın Asiya ölkələri ilə münasibətlərə verdiyi önəmi bir daha təsdiqləyir.
Aydan Nəsibova,
YAP Xətai rayon təşkilatının “General Şıxlinski 56/2” ünvanı üzrə ərazi partiya təşkilatının üzvü
