Dərsliklərdə Çətinlik: Təhsilə Ayrılan Milyonlar Boşa Gedirmi?
“2025-ci ildə Azərbaycanda dərsliklərin yenilənməsi üçün 13 milyon manat vəsait ayrılıb. Lakin milyonlarla manatlıq xərclərə baxmayaraq, dərsliklərin elmi-pedaqoji keyfiyyəti, psixoloji uyğunluğu və praktik tətbiqi hələ də ciddi sual doğurur.
Mövcut dərsliklər ya sovet dövründən qalıb, ya da köhnə kserokopiya surətləri ilə tələbələrə təqdim olunur. İbtidai sinif dərsliklərində ağır lüğət, mürəkkəb cümlə quruluşu və informativ yük şagirdlərin psixoloji inkişafına uyğun deyil, bu isə öyrənmədən soyumağa gətirib çıxarır. Riyaziyyat, informatika və coğrafiya dərsliklərində isə anlayışlar arasındakı məntiqi əlaqələr yetərli qurulmayıb, vizual materiallar isə keyfiyyətsiz və qavramağa çətinlik yaradır”.
Bunu BiG.AZ-a açıqlamasında təhsil eksperti Kamran Əsədov bildirib.
O, qeyd edib ki, faktoloji və terminoloji səhvlər, təkrarçılıq, metodiki göstərişlərin natamamlığı dərsliklərin sistematik zəifliyini ortaya qoyur. Dövlət İmtahan Mərkəzinin qəbul və buraxılış imtahanlarında dərsliklərə istinadla qeydə alınan 100-dən çox sual xətası buna bariz nümunədir:
“Dünya təcrübəsində dərsliklərin hazırlanması açıq müsabiqə, ictimai iştirak və ekspertiza prinsipi ilə həyata keçirilir. Finlandiyada dərsliklər müsabiqə yolu ilə seçilir, Gürcüstanda ictimai müzakirə məcburidir, Türkiyədə isə dəyişikliklər yalnız üç ildən bir və monitorinq əsasında həyata keçirilir. Azərbaycanda isə dərslik yazımı qapalı şəkildə aparılır, bu da təkrarçılıq və məhdud pedaqoji baxışa səbəb olur.
Əgər dərslik siyasətində ciddi islahatlar aparılmasa, dövlətin ayrdığı milyonlar təhsilin inkişafına deyil, səmərəsiz xərclənməyə çevriləcək. Dərsliklər yalnız kağız üzərində bilik deyil, şagirdin dünyagörüşünü və şəxsiyyətini formalaşdıran əsas vasitədir. Bu vasitə keyfiyyətsizdirsə, təhsil sistemi bütövlükdə zərbə alır”.
