9 noyabr mənim üçün sadəcə bir tarix deyil Azərbaycan dövlətinə, rəmzlərimizə olan hörmətin, ehtiramın təcəssümüdür. 2009-cu il 17 noyabrda verilmiş qərara əsasən bu gün hər il ölkəmizdə Dövlət Bayrağı Günü kimi qeyd olunur və rəsmi olaraq qeyri-iş günüdür.
Bayraq Gününün kökü Azərbaycan Xalq Cümhuriyyətinə dayanır. 1918-ci ilin 9 noyabrında üçrəngli bayrağımız Bakıda keçirilən hökumət iclasında qəbul edilir və həmin binanın üzərində qaldırılır. Bu bayraq 1920-ci ilin aprel ayınadək dövlət bayrağı statusunda olub.
Bayrağımızın rəngləri boşuna seçilməyib onun arxasında bütöv bir ideya dayanır: türkçülük, müasirlik və islamçılıq. Bu düstur XX əsrin əvvəllərində Əli bəy Hüseynzadə tərəfindən formalaşdırılıb. Üç rəng millət olaraq dəyərlərimizə, azadlıq ideyalarımıza və ümumbəşəri prinsiplərə bağlılığımızın rəmzidir.
1990-cı il 17 noyabrda, Naxçıvan Muxtar Respublikasında keçirilən sessiyada Ulu Öndər Heydər Əliyevin təşəbbüsü ilə üçrəngli bayraq yenidən təsdiq olunur. Bu, sadəcə bir qərar deyildi milli kimliyimizin yenidən dirçəlişi idi. Həmin gün 1918-də qəbul olunmuş bayraq rəsmi olaraq salonun içində ucaldılır və Naxçıvanın dövlət bayrağı kimi qəbul edilir.
Naxçıvan Ali Məclisi üçrəngli bayrağın bütün Azərbaycan üçün rəsmi dövlət rəmzi kimi tanınması barədə təşəbbüs göstərir. 1991-ci il 5 fevralda bu məsələ təsdiq edilir və bayrağımız yenidən Azərbaycan Respublikasının dövlət bayrağı elan olunur. Heydər Əliyev bu qərarın Azərbaycan üçün böyük təsirindən danışaraq bildirirdi ki, Naxçıvan üzərində üçrəngli bayraq 1990-cı il 17 noyabrda, respublika səviyyəsində isə 1991-ci il 5 fevralda dalğalanmağa başlayıb.
1991-ci il 18 oktyabrda qəbul olunan Konstitusiya Aktı ilə Azərbaycan Xalq Cümhuriyyətinin rəmzləri o cümlədən üçrəngli bayraq bərpa edilir.
Bayrağımız üç üfüqi zolaqdan ibarətdir:
mavi — türk mənşəyimizi,
qırmızı — müasirliyimizi,
yaşıl — islamı ifadə edir.
Qırmızı hissənin ortasında ağ aypara və səkkizguşəli ulduz var.
Konstitusiyaya görə hər bir vətəndaş bayrağa, gerbə və himnə hörmət etməlidir. Bu rəmzlərə qarşı hörmətsizlik qanunla məsuliyyət yaradır.
Dövlət bayrağının hansı hallarda və necə istifadə olunması ayrıca qanunla tənzimlənir. Bayrağa münasibətdə həm diqqət, həm də məsuliyyət tələb olunur.
Bakıda yaradılan Dövlət Bayrağı Meydanı bu rəmzə verilən dəyərin ən gözəl nümunələrindəndir. Meydan 2010-cu ildə açılıb, orada Dövlət Bayrağı Muzeyi də fəaliyyət göstərir. Muzeydə həm bizim, həm də tarix boyu müxtəlif dövlətlərin bayraqları, ümumilikdə 400-ə yaxın eksponat nümayiş etdirilib.
2024-cü il noyabrın 8-də meydan yenilənmiş şəkildə yenidən açıldı və dünyada ən böyük bayraq burada dalğalandı. Muzeydə Vətən müharibəsinə həsr olunmuş “Zəfər qalereyası” da yer alır.
Dövlət Bayrağı bizim birliyimizin, milli identikliyimizin rəmzidir. Millət olaraq varlığımızın, dövlətə sahib çıxma gücümüzün ən aydın ifadələrindən biridir.
44 günlük Vətən müharibəsindən sonra azad olunmuş şəhərlərimizdə üçrəngli bayrağımız yenidən ucaldıldı. Bu görüntülər bizim kimliyimizin, gücümüzün, sabaha inamımızın ən parlaq ifadəsidir.
Jalə Mehdiyeva
Ağstafa rayon Heydər Əliyev Mərkəzinin əməkdaşı
