Rusiyada çovdar çörəyi böhranı
Musavat.com xəbər verir ki, Rusiyada çovdar istehsalının həcmi son 30 ildə kəskin şəkildə azalıb. 1990-cı illə müqayisədə ölkədə çovdar istehsalı 15 dəfə aşağı düşüb ki, bu da ənənəvi çovdar çörəyinin gələcəyini sual altına salır.
Sektor üzrə mütəxəssislər bildirirlər ki, çovdar bazarında yaranmış böhranın əsas səbəbləri aşağı satış qiymətləri və məhsuldarlığın zəif olmasıdır. Bu amillər fermerlərin çovdar əkini ilə məşğul olmasını iqtisadi cəhətdən sərfəsiz edir və nəticədə bazarda ciddi çatışmazlıq yaranır.
Rusiya Un Dəyirmançıları İttifaqının prezidenti İqor Sviridenko vəziyyəti “infarktöncəsi durum” kimi dəyərləndirib. Onun sözlərinə görə, tendensiya bu şəkildə davam edərsə, Rusiyada ənənəvi çovdar çörəyinin istehsalı tamamilə dayanmaq riski ilə üz-üzə qala bilər.
