Rusiyalı sinoptiklər 2026-cı ilin yay fəsli ilə bağlı həyəcan təbili çalır. Rusiya Hidrometeorologiya Mərkəzinin yaydığı məlumata görə, ölkənin bir çox bölgələrində temperaturun normadan kəskin dərəcədə yüksək olacağı gözlənilir.
Publika.az xəbər verir ki, mütəxəssislər xüsusilə iyun və iyul aylarında anomal istilərin qeydə alınacağını proqnozlaşdırırlar.
Məlumata görə, iyun ayında Şimal-Qərb, Volqaboyu və Ural federal dairələrində, eləcə də Krasnoyarsk diyarının şimal-qərbində orta aylıq temperatur normadan yüksək olacaq. Bunun əksinə olaraq, Primorsk diyarı və Saxalində havanın temperaturu ötən ilin iyun ayı ilə müqayisədə bir qədər sərin keçəcək.
İyul ayında isə anomal istilər Mərkəzi, Şimal-Qərb və Cənub federal dairələrinin şərq hissəsini, həmçinin Volqaboyu və Uralın böyük hissəsini bürüyəcək.
Məsələ ilə bağlı Rusiya Elmlər Akademiyasının rəhbəri Gennadi Krasnikov da ciddi xəbərdarlıq edib. O bildirib ki, Rusiyada iqlim artıq kontinentaldan kəskin kontinental iqlimə keçib.
Müəllif: Adəm
