Bazarlarda Tərəvəzlərin Dad və Keyfiyyəti Təhlükədə – QİDA EKSPERTİNDƏN AÇIQLAMA
Son zamanlar bazarlarda məhsul keyfiyyətində ciddi problemlər müşahidə olunur. Xiyar alanda su dadı hiss olunur, pomidor isə təəssüf ki, təbii dadından uzaq, bəzən hətta balıq kimi qoxu və dad verərək yeyilməz olur. Bu vəziyyət həm gündəlik ailə büdcəsinə, həm də sağlam qidalanma vərdişlərinə mənfi təsir göstərir.
İstehlakçılar üçün bu cür məhsulların bazarda yayılması narahatlıq doğurur və istehlakçı hüquqlarının qorunması məsələsini aktuallaşdırır.
Mövzu ilə bağlı qida eksperti Emin Tağıyev BiG.AZ-a açıqlamasında bildirdi ki, son vaxtlar bazarlarda xiyar və pomidor kimi tərəvəzlərin dadının pozulması ciddi narahatlıq doğurur. Onun sözlərinə görə, bu, adətən tərəvəzlərin düzgün yetişdirilməməsi, artıq suvarma, gübrələmə və ya saxlama şəraitinin uyğun olmaması ilə bağlıdır: “Nəticədə məhsullar təbii dadını itirir, bəzən hətta yeyilməz hala gəlir.
İstehlakçılar mümkün olduqda sertifikatlı və etibarlı mənbələrdən tərəvəz seçməli, həmçinin satıcılar məhsulların keyfiyyətinə ciddi nəzarət etməlidir. Bu tədbirlər yalnız dad və keyfiyyətin qorunmasına deyil, həm də sağlam qidalanmanın təmin edilməsinə xidmət edir”.
Müəllif: İlkin Məmmədkərimov
