Kişilər niyə qadınlardan daha çox QAZANIR?
Bərabər dəyərli iş prinsipi əsasən diskriminasiyanın aradan qaldırılmasına xidmət edir. Eyni vəzifədə çalışan, eyni bacarıq və kvalifikasiyaya malik şəxslərə fərqli əmək haqqı tətbiq edilməməlidir. Bu yanaşma əmək bazarında ədalətin və şəffaflığın təmin olunmasına kömək edir. Əmək haqqı müəyyən edilərkən işçinin təhsili, təcrübəsi, məsuliyyət dərəcəsi, işin çətinliyi və iş şəraiti kimi amillər nəzərə alınır. Burada əsas prinsip ondan ibarətdir ki, cins, yaş və digər fərqləndirici xüsusiyyətlər rol oynamamalıdır.
Musavat.com xəbər verir ki, bu sözləri Axar.az-a açıqlamasında iqtisadçı Xalid Kərimli bildirib.
Onun sözlərinə görə, praktikada bu proses adətən şirkətlərin insan resursları şöbələri tərəfindən həyata keçirilir və vəzifələr üzrə xüsusi qiymətləndirmə sistemləri qurulur:
“Bəzi hallarda bu prinsipin tətbiqi işəgötürənlər üçün əlavə xərclər yarada bilər. Lakin bu, geniş yayılmış ciddi problem hesab olunmur. Əksinə, uzunmüddətli perspektivdə sosial ədaləti artırır və əmək bazarında daha sağlam mühit formalaşdırır.
Statistik olaraq bəzi hallarda kişilərin əmək haqqı qadınlardan yüksək olur, lakin bu, hər zaman birbaşa diskriminasiya ilə bağlı deyil. Bu fərqlərin əsas səbəblərindən biri əmək bazarının strukturudur. Qadınlar daha çox təhsil, səhiyyə və sosial xidmətlər kimi nisbətən aşağı maaşlı sahələrdə çalışırlar. Həmin sahələrdə isə kişi və qadınlar arasında əmək haqqı fərqi adətən olmur.
Qadınların karyerasında yaranan fasilələr də ümumi gəlir səviyyəsinə təsir göstərə bilər. Nəticə etibarilə əmək haqqı fərqləri daha çox işin xüsusiyyətləri, təcrübə, məsuliyyət və sosial faktorlarla bağlıdır”.
